Mhlaka 24 February 2022 iRussia yahlasela ilizwe le-Ukraine. Impi le ibangele ukuthi abantu baphume ngobunengi besiyaphephela kwezinye izindawo. a

 “Angazi lokuthi ngikuchasise ngithini ngoba kwakusesabisa kakhulu. Kwakudubuka amabhomba. Sathi sisizwa ukuthi kulezitimela ezisusa abantu lapho okulempi khona, sahle sabona kungcono ukuthi lathi sisuke. Saphuma sithwele okuyimitshaqana nje ngoba kwakungavunyelwa ukuthi sithwale imikhungulu. Sathwala amaphepha aqakathekileyo lemithi lamanzi kanye lokuncane okokudla. Safulathela konke saqonda ezitimeleni lezo lanxa amabhomba ayelokhu edubuka.”—UNataliia, ovela eKharkiv, e-Ukraine.

 “Sasingakholwa ukuthi kuzakuba lempi. Ngezwa amabhomba edubuka kwezinye izindawo kwaze kwanyikinyeka lamawindi. Ngadobha izinto eziqakathekileyo ngangena indlela. Ngasuka ngekhaya ngo-8 ekuseni ngagada isitimela esasisiya e-Lviv, ngafika ngagada ibhasi eyayisiya ePoland.”—UNadija, ovela eKharkiv, e-Ukraine.

Esihlokweni lesi sixoxa ngemibuzo elandelayo

•  Kuyini okubangela ukuthi abantu bacine beyiziphepheli?

•  Iziphepheli zingalithola ngaphi ithemba?

•  IBhayibhili lingabanceda yini abantu abayiziphepheli?

 Kuyini okubangela ukuthi abantu bacine beyiziphepheli?

 Okwenze abantu be-Ukraine bacina besiyakuba yiziphepheli yikuthi iRussia yahlasela ilizwe labo. Kodwa iBhayibhili liyasitshela ukuthi inhlupho ezinjengalezi zibangelwa kuyini:

•  Ohulumende bathwalisa nzima abantu. Izikhathi ezinengi abantu ababusayo basebenzisa kubi amandla abo becindezela abantu.—UmTshumayeli 4:1; 8:9.

•   USathane uDeveli nguye “umbusi womhlaba” futhi ubangela ukuthi abantu benze izinto ezimbi. IBhayibhili lithi: “Umhlaba wonke ungaphansi kwamandla omubi.”—UJohane 14:30; 1 UJohane 5:19.

•   Sekuleminyaka leminyaka abantu bethwele nzima ngenxa yenhlupho ezisemhlabeni, kodwa khathesi kulukhuni kakhulu ngoba siphila ezinsukwini zokucina. IBhayibhili lakhuluma kudala lathi: “Ezinsukwini zokucina kuzakuba lezikhathi ezinzima, okunzima ukuphila kuzo.” (2 KuThimothi 3:1) IBhayibhili lavela latsho ukuthi ezinsukwini zokucina kuzakuba lezimpi, lokuswelakala kokudla, lezingozi zemvelo kanye lemikhuhlane. Izinto lezi zibangela ukuthi abantu bayephephela kwezinye izindawo.—ULukha 21:10, 11.

 Iziphepheli zingalithola ngaphi ithemba?

 IBhayibhili lisitshela ukuthi uMdali wethu uJehova b uNkulunkulu ulothando njalo uyabazwela abantu abayiziphepheli lalabo abasuswe ngenkani emizini yabo. (UDutheronomi 10:18) Uthembisa ukuthi uzalungisa zonke inhlupho ezibangela ukuthi abantu babe yiziphepheli. Uzasebenzisa uhulumende wakhe osezulwini obizwa ngokuthi nguMbuso kaNkulunkulu futhi uzakhipha bonke ohulumende abakhona. (UDanyeli 2:44; UMathewu 6:10) UJehova uzasebenzisa uMbuso wakhe ukuze asuse uSathane uDeveli. (KwabaseRoma 16:20) UMbuso lo uzabusa umhlaba wonke jikelele ususe yonke imingcele ebangela ukuthi abantu babandlululane. Bonke abantu bazabe sebeyimuli emanyeneyo. Ngalesosikhathi akulamuntu ozabaleka atshiye ikhaya lakhe ngoba iBhayibhili lithembisa ukuthi: “Umuntu wonke uzahlala ngaphansi kwesihlahla sakhe sevini langaphansi kwesihlahla sakhe somkhiwa, njalo kakho ozabenza besabe, ngoba uJehova uSomandla usekhulumile.”—UMikha 4:4.

 UJehova uzasebenzisa uMbuso wakhe ukuze aqede zonke inhlupho ezibangela ukuthi abantu babe yiziphepheli. Nanzi ezinye izibonelo:

•   Izimpi. “[UJehova] uyathulisa izimpi.” (IHubo 46:9) Ukuze ufunde okunengi ngokuthi uNkulunkulu uzakwenza njani lokhu, bala isihloko esithi “Ukuthula Emhlabeni—Kuzakubakhona Njani?”

•   Ukucindezelwa Lodlakela. “[UJehova] uzabahlenga ekucindezelweni lekuhlukuluzweni.” (IHubo 72:14) Ukuze ubone ukuthi abantu bayenelisa ukutshintsha ubuntu babo obungalunganga, bala izihloko ezithi “Kuyini Okungasinceda Ukuthi Singabazondi Abanye?”

•   Ubuyanga. “[UJehova] uzabakhulula abaswelayo abakhalayo kuye.” (IHubo 72:12) Ukuze ufunde okunengi ngokuthi uNkulunkulu uzabuqeda njani ubuyanga, bala isihloko sesiZulu esithi, “Ingabe Isimo Sezomnotho Esanelisa Bonke Abantu Siyoke Sibe Khona?”

•   Ukuswelakala Kokudla. “Akuthi amabele ande elizweni lonke.” (IHubo 72:16) Ukuze ubone ukuthi uNkulunkulu uzayiqeda njani indlala emhlabeni, bala isihloko sesiNgisi esithi “A World Without Hunger?”

 IBhayibhili lingabanceda yini abantu abayiziphepheli?

 Liyabanceda sibili. IBhayibhili libanika ithemba elihle abantu abayiziphepheli futhi lilamacebo angabanceda lakhathesi ukuthi balwisane lenhlupho abahlangana lazo.

 Isimiso EsiseBhayibhilini: “Lingakhathazeki ngaloba yini, kodwa kukho konke bekani izicelo zenu kuNkulunkulu ngomthandazo langokumncenga kanye lokumbonga. Nxa lingenza njalo, ukuthula kukaNkulunkulu okwedlula konke ukuzwisisa kuzalinda izinhliziyo zenu lezingqondo zenu.”—KwabaseFiliphi 4:6, 7.

 Kutshoni? Thandaza kuNkulunkulu ucele ukuthi akuncedise uhlaliseke kungelani lokuthi isimo okuso sinjani. Bala isihloko sesiZulu esithi “Filipi 4:6, 7—‘Ningakhathazeki Ngalutho’”