OFakazi bakaJehova sebeleminyaka edlula 130 besiba lemihlangano yezabelo minyaka yonke. Khathesi imihlangano le isisiba lezinkulumo ezedlula 40, kube lezingoma, izingxoxo lamavidiyo. Ukuze imihlangano le incede bonke abayingenayo, kumele ‘babone’ konke okwenzakalayo futhi ‘bakuzwe’ kuhle. (ULukha 2:20) Iminikelo yabafowethu labodadewethu isetshenziswa njani ukuze labo abangena imihlangano le bancedakale kungelani lokuthi bahlala ngaphi?

 Izinkundla ezinengi ezisemazweni aphucukileyo zivele zilayo imitshina ye-audio leyamavidiyo. Manje yindaba sisebenzisa eyethu imitshina nxa sirenta indawo lezo ukuze singenele khona imihlangano yesabelo? Umfowethu okuthiwa nguDavid osebenza kuHlangothi lweBroadcasting olusemawofisini ethu amakhulu uthi: “Enkundleni esijayele ukuzirenta, zilutshwane ezilemitshina eyenelisa ukusebenza okwamahola adlula angu-6. Ngokwesibonelo, enkundleni zemidlalo imitshina esetshenziswa lapho ngeyokwenza izaziso nje kuphela lokudlala umculo okwesikhathi esifitshane. Ama-screen ngawokutshengisa impumela yemidlalo, uku-advethayiza lokutshengisa ezinye iziqephu zomdlalo. Kodwa thina amavidiyo siyabe sizawabukela okwelanga lonke yikho siyabe sifisa ukuthi abantu bonke abakhona bawabone kuhle futhi bazwe konke okuzabe kukhulunywa.”

 Indawo esingenela kuzo imihlangano yezabelo iyatshiyana yikho kuyabe kumele sisebenzise imitshina evumayo ukusebenza kulezondawo. Nxa izindawo okuzangenelwa kuzo imihlangano le sezikhethiwe, uHlangothi lweBroadcasting luyakhangela ukuthi indawo leyo ithwala abantu abangaki lokuthi bazabe behlezi njani. Abafowethu bayakhangela ukuthi izipikha lama-screen kuzafakwa ngaphi lokuthi kuzakhonekthwa njani besebebhala phansi zonke izinto ezizafuneka ukuze wonke umuntu enelise ukuzwa kuhle lokubona yonke into eyenzakalayo.

 Eminye imihlangano yesabelo yenziwa ngendimi ezitshiyeneyo enkundleni eyodwa, yikho kuyabe kumele abafowethu basebenze nzima ukuze uhlelo lwakhona luphume kuhle. Nxa kuyikuthi uhlelo lomhlangano luzatolikwa, labo abatolikayo yibo abaqalisa ukuzwa lokho okukhulunyiweyo besokusakazwa ezititshini ezitshiyeneyo ezisetshenziswa yilabo abakhuluma lezondimi. Imitshina yakulezinsuku esiyisebenzisayo yenza kube lula ukuthi lokho abantu abakubona kuma-screen kuhambelane lalokho abakuzwayo lanxa kukhulunywa ngezindimi ezitshiyeneyo. UDavid uthi: “Imitshina le kayilula ukuyisebenzisa yikho labo abayisebenzisayo kuyabe kumele baqeqetshwe okuzwayo.”

 Amagatsha amanengi alayo imitshina ayisebenzisa emihlanganweni minyaka yonke. Endaweni ezinjalo imitshina le isetshenziswa emihlanganweni etshiyeneyo. Igatsha le-United States lisebenzisa imali edlula $200 000 a umnyaka ngamunye ukuze kuthwalwe imitshina leyo isiya emihlanganweni etshiyeneyo. Ukuthenga imitshina emilutshwane ezasetshenziswa emihlanganweni etshiyeneyo kuyonga imali ngoba aluba bekungenjalo bekuzamele sithenge imitshina eminengi besokudingakala ukuthi ihlale ilungisiswa. Umfowethu okuthiwa nguSteven owake wancedisa ku-audio/video komunye umhlangano wesabelo owawuseCanada uthi: “Abafowethu esasisebenza labo babesiba leqiniso lokuthi akula ngitsho lento eyodwa elahlekayo. Babepakitsha yonke into, kungaba ngamabhawudo, intambo zamagetsi loba okunye nje ukuze kufike kunjalo emhlanganweni olandelayo.”

 Ukurenta imitshina esiyisebenzisa emihlanganweni yesabelo kuyadula kakhulu futhi izikhathi ezinengi imitshina yakhona iyabe ingekho esimeni esihle. Lokhu yikho okwenza sithenge eyethu imitshina. Ngokwesibonelo, kufuneka amadola angaba ngu-24 000 ukuze kuthengwe i-screen esingamamitha angu-5 ubude langu-3 ububanzi besekufuneka amadola angaba ngu-20 ukuthenga intambo eyodwa engaba ngamamitha angu-15 esetshenziswa kumamayikhi. Yikho kuqakathekile ukuthi abafowethu abakuHlangothi lweBroadcasting baxoxisane labakuHlangothi Lokuthenga ukuze ‘kubalwe izindleko’ kungakathengwa lutho. (ULukha 14:28) Nansi eminye imibuzo abazibuza yona: Imitshina esifuna ukuyithenga izanceda abantu abangaki? Kulesidingo sokuthi kuthengwe imitshina emitsha yini? Imitshina leyo izabe igcinwa ngaphi? Silabo yini abantu abazabe beyilungisa futhi silazo yini lezinto ezifunekayo ukuze kulungiswe?

 Ukuze imitshina esiyisebenzisayo ihlale okwesikhathi eside siba leqiniso lokuthi siyayilungisa. Imitshina yethu siyigcinela ezintweni eziqinileyo futhi izinto zakhona lazo ziyalungiswa ukuze zihlale zisesimeni esihle.

 Abanye abantu abangayisibo oFakazi bayake bababaze indlela amavidiyo adlalwa emihlanganweni yethu akhanya kuhle ngayo lokuthi lokho okukhulunywayo kuyezwakala. Ngokwesibonelo kulendoda esebenza kweyinye ikhampani yokusakaza eyababaza indlela uhlelo lomhlangano olwaluphume kuhle ngayo. Umfowethu okuthiwa nguJonathan ojayele ukuncedisa ukufaka imitshina ye-sound leyevidiyo emihlanganweni yesabelo uthi: “Indoda le yamangala isizwa ukuthi bonke ababekudiphathimenti le babengasozingcitshi zomsebenzi kodwa babeqeqetshwe okwesikhathi esincane nje kuphela. Wathi abantu ababesebenza ekhampanini ayekuyo kwakubathatha amalanga angu-5 ukuthi bafake imitshina le kodwa thina sasiyifake ngelanga elilodwa lengxenye.” Komunye umhlangano umaqhuzu wenkundla yakhona wathi: “Siyake sisebenze lengcitshi ezitshiyeneyo lapha kodwa asikaze sibone abantu abahlelekileyo futhi abayaziyo into abayenzayo njengani!”

 Kukuncedile yini wena ukubukela amavidiyo emihlanganweni lokuzwa konke okukhulunywayo? Engxenye lawe uyavumelana lamazwi akhulunywa ngumfowethu okuthiwa nguDavid ohlala e-England. Wathi: “Sengileminyaka engu-88 futhi ngaqalisa kudala ukungena imihlangano yesabelo. Kodwa engingakutsho yikuthi khathesi sekulula kakhulu ukuthi ngilalele lonke uhlelo lomhlangano kungelalutho olungiphambanisayo. Isikhathi awusiboni lokuthi siye ngaphi ngenxa yamavidiyo amnandi esiyabe siwabukela. Uhlelo lomhlangano luyabe lucacile futhi sifundiswa ngendlela efananayo minyaka yonke.” UMicheal ohlala eNigeria uthi: “Abafowethu labodadewethu sebesenelisa ukufunda okunengi emhlanganweni kungelalutho olubalahlekelayo ngoba bayabe besizwa konke okukhulunywayo futhi bebona lamavidiyo.”

 Ngesikhathi ungena umhlangano wesabelo kumbe oqakathekileyo walonyaka olesihloko esithi Tshela Abantu “Izindaba Ezinhle”! sicela ucabangisise ngomsebenzi owenziweyo ukuze wenelise ukuzwa lokubona konke okuyabe kusenzakala. Siyabonga kakhulu ngeminikelo yenu esekela umsebenzi lo oqakatheke kangaka. Iminikelo le ihlanganisa laleyo eliyenza ku-donate.pr2711.com.