Esihlokweni leso safunda ukuthi yinye kuphela indaba eqakatheke kakhulu ebantwini lasezingilosini. Yindaba yokungcweliswa kwebizo likaJehova futhi igoqela lendaba yobukhosi, ukuthi indlela uJehova abusa ngayo yiyo yodwa eqondileyo. Ukuba qotho kwabantu lakho kuyahlanganiswa endabeni le eqakatheke kakhulu.

Kungani khathesi sesigcizelela ukuthi indaba eqakatheke kulazo zonke ngemayelana lebizo likaJehova kanye lokungcweliswa kwalo? Ake sixoxe ngezizathu ezintathu.

Esokuqala, uSathane wangcolisa ibizo likaJehova ensimini ye-Edeni. Umbuzo uSathane awubuza u-Eva wenza kwakhanya angani uJehova nguNkulunkulu oncitshanayo ofakela abantu bakhe imithetho enzima. USathane waphinda waphikisa lokho okwakukhulunywe nguNkulunkulu futhi kufanana lokuthi wayesithi uNkulunkulu ulamanga. Walingcolisa sibili ibizo likaJehova. Lokhu kwamenza waba ‘nguDeveli’ okutsho “umnyundeli.” (Joh. 8:44) U-Eva kamlalelanga uNkulunkulu yikho wahlamukela ubukhosi bakhe ngoba wawakholwa amanga kaSathane. (Gen. 3:1-6) Lalamuhla uSathane ulokhu elingcolisa ibizo likaNkulunkulu ngokufafaza amanga ngaye. Izikhathi ezinengi labo abawakholwayo amanga kaSathane bacina bengasamlaleli uJehova. Ngakho abantu bakaNkulunkulu babona ukungcoliswa kwebizo likaJehova elingcwele kuyinto embi kakhulu. Ukungcoliswa kwebizo likaJehova yiso isizathu esikhulu esibangela ukuthi kube lokuhlupheka lobubi emhlabeni.

Esesibili, uJehova uzimisele ukulwela ibizo lakhe alenze libe msulwa ukuze kuncedakale abantu lezingilosi. Lokhu kuqakatheke kakhulu kuye yikho esithi: “Ngizakwenza abantu babone sibili ukuthi ibizo lami elikhulu lingcwele.” (Hez. 36:23) UJesu laye wakwenza kwacaca ukuthi yikuphi okuqakatheke kakhulu ukwedlula konke okumele abantu bakaJehova bakuthandazele. Wathi: “Kalingcweliswe ibizo lakho.” (Mat. 6:9) Endaweni ezinengi iBhayibhili liyakugcizelela ukuqakatheka kokukhazinyuliswa kwebizo likaJehova. Nanzi ezinye izibonelo: “Nikani uJehova inkazimulo efanele ibizo lakhe.” (1 Imilan. 16:29; Hubo. 96:8) “Hlabelani lidumise ibizo lakhe elikhazimulayo.” (Hubo. 66:2) “Ngizakhazimulisa ibizo lakho kuze kube nini lanini.” (Hubo. 86:12) Ngelinye ilanga uJesu wathi esethempelini eJerusalema wathi kuyise: “Baba khazimulisa ibizo lakho.” UJehova wamphendula esezulwini wathi: “Ngilikhazimulisile futhi ngizaphinda ngilikhazimulise.—Joh. 12:28. a

Esesithathu, inhloso kaJehova izahlala ihambisana lokungcweliswa kwebizo lakhe. Cabanga ngokuthi kuzakwenzakalani ngemva kokulingwa kokucina okuzakubakhona sekwedlule iminyaka eyinkulungwane yokubusa kukaKhristu. Abantu lezingilosi bazabe belibona njani ibizo likaJehova ngalesosikhathi? Ukuze siphendule umbuzo lo kasixoxeni ngendaba ezimbili ezihambelanayo,  ukuba qotho lobukhosi bukaNkulunkulu bendawo yonke. Ngalesosikhathi kuyabe kusadingeka yini ukuthi abantu bathwale nzima ukuze babe qotho kuNkulunkulu? Kuyabe kungasadingeki ngoba bayabe bengaselasono futhi sebelingwe kwaze kwasala kucacile ukuthi baqotho. Kuyabe sekukhanya ukuthi indlela uJehova abusa ngayo yiyo enhle. Imuli yakhe esezulwini lesemhlabeni izabe isimanyene, futhi bonke bazabe sebevuma ukubuswa nguJehova. Kodwa ibizo likaJehova lizabe lilokhu liqakatheke kakhulu yini ebantwini bakhe?

Ngalesosikhathi wonke umuntu uyabe eselazi iqiniso ngoJehova futhi ibizo lakhe liyabe selingcwelisiwe. Lanxa kunjalo ibizo likaJehova lizaqhubeka liqakatheke kakhulu kubo bonke abamkhonzayo abasezulwini labasemhlabeni. Kungani lizabe liqakathekile? Ngenxa yokuthi uJehova uzaqhubeka esenza izinto ezimangalisayo. UNkulunkulu ‘uzaba yikho konke kubo bonke’ ngenxa yokuthi uJesu uzabuyisela umbuso kuye. (1 Khor. 15:28) Ngemva kwalokho abantu emhlabeni bazathola “inkululeko ekhazimulayo yabantwana bakaNkulunkulu.” (Rom. 8:21) Ngalesosikhathi uJehova uzayigcwalisa inhloso yakhe yokuba lemuli emanyeneyo ebunjwa ngabantwabakhe abasezulwini labasemhlabeni.—Efe. 1:10.

Nxa izinto zonke lezi sezenzakele imuli kaJehova esezulwini lesemhlabeni izakwenzani ngebizo likaJehova? Izakuba lesifiso esikhulu sokudumisa ibizo likaJehova elihle. UDavida waphefumulelwa ukuthi abhale athi: ‘Kadunyiswe uJehova uNkulunkulu, kwangathi ibizo lakhe elikhazimulayo lingadunyiswa kuze kube phakade.’ (Hubo. 72:18, 19) Sizaqhubeka sithola izizathu ezintsha lezithokozisayo zokudumisa ibizo likaNkulunkulu kuze kube nini lanini.

Phela ibizo likaJehova limela konke okumayelana laye. Izikhathi ezinengi nxa sicabanga ngebizo likaJehova sicabanga ngothando lwakhe. (1 Joh. 4:8) Sizahlala sikhumbula ukuthi uJehova wasidala ngoba esithanda lokuthi wasinika inhlawulo ngenxa yokuthi uyasithanda njalo sizakhumbula ukuthi indlela abusa ngayo ilungile futhi itshengisa ukuthi uyasithanda. Kanti njalo sizaqhubeka sizibonela ngawethu ukuthi uJehova uyasithanda kakhulu. Sizaqhubeka sisondela kuye uBaba wethu futhi sihlabela izingoma zokudumisa ibizo lakhe elikhazimulayo kuze kube nini lanini.—Hubo. 73:28.