UYOMARA labafowabo uMarcelo loHiver bahlala esigabeni esincane saseGuatemala. UYomara waqalisa ukufunda iBhayibhili laboFakazi futhi ngokuhamba kwesikhathi abafowabo labo baqalisa ukufunda. Kodwa kwakulohlupho ngoba bonke babeyiziphofu njalo babengenelisi ukubala i-braille. Yikho owayebafundisa iBhayibhili wayebabalela indima kanye lamavesi ayesesifundweni.

Olunye uhlupho olwalukhona kwakuyikuya emihlanganweni yebandla. Babengenelisi ukuzihambela eWolu yoMbuso eyayiseduze ngoba kwakuthatha imizuzu engu-40 ukuthi bafike khona. Yikho abazalwane bahlela ukuthi bayebathatha bahambe labo emihlanganweni yonke. Kanti njalo bathi sebeqalise ukunika izinkulumo emihlanganweni yaphakathi kweviki, abazalwane bahlela ukubancedisa ukuthi bazibambe ngekhanda lezonkulumo.

NgoMay 2019 kwaqalisa ukwenziwa imihlangano yebandla esigabeni sabo. Ngalesosikhathi endaweni leyo kwasekulomunye umfowethu lodadawethu ababengamaphayona esikhathi sonke. Bazimisela ukuthi bafundise izelamani lezi ezintathu ukubala lokubhala i-braille lanxa bona babengayazi. Bahamba elayibhurari ukuze bayefundela i-braille kanye lendlela zokuyifundisa.

Ngezinyanga ezilutshwana nje uYomara loMarcelo loHiver basebeyibala kuhle i-braille njalo lokhu kwabanceda ukuthi baqinise ubungane babo loJehova. a Khathesi sebengamaphayona esikhathi sonke. UMarcelo useyinceku ekhonzayo. Bahlala bebhizi ngezinto eziphathelane lokukhonza. Ukukhuthala kwabo kukhuthaza labanye ebandleni ukuthi bakhuthale.

UYomara loMarcelo loHiver bayabonga kakhulu ukuthi abafowethu labodadewethu abasebandleni labo bayabasekela. UYomara uthi: “Kusukela siqalisa ukubona oFakazi bebesitshengisa uthando lweqiniso. UMarcelo yena uthi: “Silabangane abasithandayo ebandleni futhi sisemulini yabafowethu labodadewethu abasemhlabeni wonke abamanyaniswa luthando.” UYomara labafowabo basilindele ngabomvu isikhathi lapho umhlaba ozatshintshwa khona usiba lipharadayisi.—Hubo. 37:10, 11; Isaya. 35:5.