UJONATHAN, umKhoriya owazalelwa e-America wayebandlululwa kusukela esesemncane. Uthe esekhulile, wadinga indawo lapho abantu ababengasoze bambandlulule ngenxa yendlela ayekhangeleka ngayo kumbe ngenxa yalapho ayedabuka khona. Waba ngudokotela kwelinye idolobho eliseningizimu ye-Alaska, e-U.S.A., okwakulabantu abanengi ayebelapha ababefanana laye. Wayelethemba lokuthi lanxa idolobho lelo lalilomoya oqandayo, wayebalekele ukubandlululwa, okwakubuhlungu ukwedlula umoya oqanda kakhulu.

Ithemba lelo laphela eselaphe omunye umama owayeleminyaka engu-25. Umama lo wathi ephaphama ngemva kokugula kakhulu, wakhangela uJonathan ebusweni wamgolomba njalo wamthethisa, etshengisa ukuthi wayebazonda kabi abantu abadabuka eKhoriya. Into le yamzwisa ubuhlungu kakhulu uJonathan njalo yamkhumbuza ukuthi konke ayezama ukukwenza, ukuthuthela endaweni le lokuhlalisana kuhle labantu laba kwakungasoze kwenze ukuthi angabandlululwa.

 Okwenzakala kuJonathan kuliqiniso elibuhlungu kodwa esingenelisi ukulibalekela. Ubandlululo lukhona emhlabeni wonke jikelele. Kukhanya angani lapho okutholakala khona abantu, ubandlululo lalo lukhona.

Lanxa ubandlululo lukhona kuyo yonke indawo, abanengi bayalusola. Lokhu akuzwisiseki ngoba nxa kuyikuthi abantu abaluthandi kungani lwande kangaka? Abanengi abathi kabaluthandi kabananzeleli ukuthi bona ngokwabo balalo. Kungaba njalo lakuwe yini? Wena ungawuphendula njani umbuzo lo?

Kunzima ukuthi sinanzelele ukuthi lathi silalo ubandlululo oluthile ezinhliziyweni zethu kungelani lokuthi siyakunanzelela lokhu loba hatshi. IBhayibhili lichasisa ukuthi kungani kunjalo, lapho lisithi: “Inhliziyo iyakhohlisa okudlula izinto zonke.” (UJeremiya 17:9) Ngakho singazikhohlisa sicabanga ukuthi siyabathanda abantu bonke ngendlela efananayo. Kumbe singacabanga ukuthi silesizatho esizwakalayo sokuthi kungani singabathandi abantu beminye imihlobo.

Ukuze ubone ukuthi kunzima kangakanani ukuzazi ukuthi silalo yini ubandlululo ezinhliziyweni zethu, ake sithi uhamba wedwa emgwaqweni ebusuku. Ubusubona amajaha amabili ongawaziyo esiza kuwe. Akhangeleka eqinile njalo omunye wabo ulento ayithweleyo.

Ubungaphetha ngokuthi amajaha la afuna ukukuhlasela yini? Kuliqiniso ukuthi okwake kwenzakala kuwe kungenza ulimuke, kodwa kulungile yini ukuthi uthi amajaha la ayingozi kuwe? Omunye umbuzo ongabuzwa yilo, Uthe uwabona amajaha la wacabanga ukuthi angumhlobo bani? Indlela ophendula ngayo umbuzo lo ingakutshengisa ukuthi ungabe usulenhlansi yobandlululo.

Nxa singazihlola ngeqiniso, kumele sivume ukuthi sonke ezinhliziyweni zethu silenhlansi yobandlululo oluthile. IBhayibhili ngokwalo liyavuma ukuthi abanengi bayabandlulula, lapho lisithi: “Abantu bakhangela isimo somuntu.” (1 USamuyeli 16:7) Njengoba sonke silodubo lolu, olujayele ukuba lempumela emibi, singaba yini lethemba lokunqoba kumbe ukuqeda ubandlululo ekuphileni kwethu? Njalo kuzafika yini isikhathi lapho umhlaba wonke oyabe ungasela bandlululo?