Sekuseduze Ukuthi Ukuhlupheka Kuphele!
Ake uzibone ngelihlo lengqondo uphila emhlabeni ongelakuhlupheka, umhlaba ongelabugebengu, izimpi, ukugula lezingozi zemvelo. Zibone uvuka ekuseni nsukuzonke ungasadubeki ngokucabanga ngobandlululo, ukucindezelwa kumbe ukuntshintshantshintsha komkhonomi. Kuzwakala kungamaphupho yini konke lokhu? Kuliqiniso ukuthi akula ngitsho leyodwa inhlanganiso eyasungulwa ngabantu engaletha izimo ezinjengalezi. UNkulunkulu uthembisa ukususa konke okubangela ukuthi abantu bahlupheke, okugoqela lokho esike saxoxa ngakho esihlokweni esidlulileyo. Khangela izithembiso ezilandelayo ezivela eLizwini likaNkulunkulu iBhayibhili:
UKUBUSA KUKAHULUMENDE OMUHLE
“UNkulunkulu wasezulwini uzabeka umbuso ongasoze wabhidlizwa lanini njalo ongasoze utshiyelwe abanye abantu. Uzayibhidliza yonke leyomibuso iphele, kodwa wona uzakuma laphakade.”—UDanyeli 2:44.
UMbuso kaNkulunkulu unguhulumende wasezulwini. UJesu Khristu uMbusi okhethiweyo, uzangena esikhundleni sababusi basemhlabeni futhi uzaqiniseka ukuthi intando kaNkulunkulu iyenziwa lasemhlabeni hatshi ezulwini kuphela. (UMathewu 6:9, 10) Uhulumende lo ngeke uthathelwe isikhundla ngohulumende basemhlabeni ngoba ‘ungumbuso olaphakade weNkosi loMsindisi wethu uJesu Khristu.’ Akuthandabuzwa ukuthi kuzakuba lokuthula kwaphakade.—2 UPhetro 1: 11.
AKUSOZE KUPHINDE KUBE LENKOLO YAMANGA
‘USathane uqobo uzenza ingilosi yokukhanya. Ngakho akumangalisi uma izinceku zakhe zizenza izinceku zokulunga. Isiphetho sazo sizakuba ngokufanele izenzo zazo.’—2 KwabaseKhorinte 11:14, 15.
Kuzavezwa ukuthi inkolo yamanga ingumsebenzi kaDeveli futhi izatshabalaliswa emhlabeni. Kuzanyamalala konke ukuchitheka kwegazi lobandlululo olubangelwa yinkolo. Lokhu kuzakwenza ukuthi bonke abathanda “uNkulunkulu ophilayo loqotho” bamkhonze ‘ngokholo lunye’ futhi “ngomoya langeqiniso.” Umpumela uzakuba yikuthula lomanyano.—1 KwabaseThesalonika 1:9; Kwabase-Efesu 4:5; UJohane 4:23.
ISONO SIZASUSWA EBANTWINI
‘UNkulunkulu yena uqobo uzakuba labo. Uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu, ngoba umumo omdala wezinto usudlule.’—ISambulo 21:3, 4.
UJehova uNkulunkulu uzakwenza lokhu esebenzisa iNdodana yakhe uJesu, eyanikela ngokuphila kwayo ukuze kusindiswe abantu. (UJohane 3:16) Ngesikhathi uJesu esebusa, isono sizasuswa ebantwini bonke. Ukuhlupheka kuzabe kungasekho ngoba “uNkulunkulu yena uqobo uzakuba labo” futhi “uzazesula zonke izinyembezi emehlweni abo.” Esikhathini esiseduze, ukuhlupheka kwabantu lesono kuzabe sokuyinganekwane; “abalungileyo bazazuza ilifa lelizwe bahlale kulo lanini.”—IHubo 37:29.
IZIDALWA ZOMOYA EZIMBI ZIZABE ZINGASEKHO
‘[UJesu Khristu] wabamba umgobho, inyoka endala leyana, engoMubi loba uSathane, wawubopha okweminyaka eyinkulungwane. Wawuphosela eMgodini ongelamkhawulo, wakhiya, wawuvala silikici, ukumvimbela ukuba angakhohlisi izizwe futhi.’—ISambulo 20:2, 3.
Imisebenzi kaSathane izabe ingasekho nxa uSathane lamadimoni sebebotshiwe baphoselwa “eMgodini ongelamkhawulo,” okutsho ukuthi bayabe bengenelisi ukwenza loba yini. Ngeke basebenzise amandla abo ukuze bahluphe abantu. Kuzabe kuyisikhathi esihle kakhulu, ukuphila emhlabeni ongela kuhlukuluzwa nguSathane lezidalwa zomoya ezimbi!
‘IZINSUKU ZOKUCINA’ ZIZAPHELA
‘Izinsuku zokucina’ zizaqedwa yilokhu uJesu akubiza ngokuthi ‘yikuhlupheka okukhulu.’ Wathi: “Ngalesosikhathi kuzakuba lokuhlupheka okukhulu, okungazange kube khona kulokhu kwadabuka umhlaba kuze kube manje—njalo kakusoze kube khona futhi.”—UMathewu 24:21.
Ukuhlupheka kuzakuba kukhulu ngomqondo wokuthi kuzabe kulezehlakalo ezesabekayo ezingakaze zenzakale. Izehlakalo lezi zizaphela “ngosuku olukhulu lukaNkulunkulu uSomandla,” okuthiwa “yi-Amagedoni.”—ISambulo 16:14, 16.
Abantu abathanda okulungileyo kuzo zonke izindawo bakhangelele ukuphela komumo lo wezinto omubi. Ake ucabange ngezinye izibusiso ezilutshwana abazazithola eMbusweni kaNkulunkulu.
UNKULUNKULU UZAKWENZA OKUDLULA LAPHA!
‘Ixuku elikhulukazi’ lizavikelwa lize liyengena emhlabeni omutsha olokuthula: ILizwi likaNkulunkulu lithi ‘ixuku elikhulukazi’ labantu okungela muntu ongalibala ‘lizaphuma ekuhluphekeni okukhulu’ futhi lizagcinwa liphila, lingeniswe emhlabeni omutsha olokulunga. (ISambulo 7:9, 10, 14; 2 UPhetro 3:13) Nxa sebesindisiwe, bazabonga uJesu Khristu, “iMvana kaNkulunkulu esusa isono somhlaba.”—UJohane 1:29.
Izibusiso ezinengi zizatholakala zivela emfundweni evela kuNkulunkulu: Emhlabeni omutsha, “umhlaba uzakuba usugcwele ulwazi lukaJehova.” (U-Isaya 11:9) Imfundo le evela kuNkulunkulu izabe igoqela imilayezo yokuthi abantu bonke bangahlalisana njani ngokuthula futhi bawuphathe kuhle umhlaba. UNkulunkulu uyathembisa esithi: “Mina nginguJehova, uNkulunkulu wakho, okufundisa lokho okuhle kakhulu kuwe, ekutshengisa indlela okumele uhambe ngayo.”—U-Isaya 48:17.
Abangane bethu abafileyo bazavuswa emathuneni: Esesemhlabeni, uJesu wavusa umngane wakhe owayesefile uLazaro. (UJohane 11:1, 5, 38-44) Yikho-ke wayetshengisa okuncane nje kwalokhu azakwenza eMbusweni kaNkulunkulu.—UJohane 5:28, 29.
Ukuthula lokulunga kuzaba khona kuze kube nini lanini: Sekubusa uKhristu, ububi buzabe bungasekho. Sikwazi njani lokhu? Ngoba uJesu wenelisa ukubona okuphakathi kwezinhliziyo njalo uzalisebenzisa ikhono lakhe leli ukuthi ahlulele phakathi kwabantu abalungileyo lababi. Labo abangafuniyo ukuntshintsha izindlela zabo ezimbi kabasoze bavunyelwe ukungena emhlabeni omutsha kaNkulunkulu.—IHubo 37:9, 10; U-Isaya 11:3, 4; 65:20; UMathewu 9:4.
Sesihlole iziphrofetho zeBhayibhili ezilutshwana nje ezitshengisa ukuthi isikhathi esihle okumangalisayo siyeza. Nxa uMbuso kaNkulunkulu usubusa emhlabeni, “ukuthula okukhulu” kuzakuba khona kuze kube nini lanini. (IHubo 37:11, 29) Zonke imbangela zokuhlupheka lobuhlungu ezihlupha abantu zizaphela. Singaba leqiniso ngalokho ngoba nguNkulunkulu othembisileyo. ‘Ngenza izinto zonke zibe zintsha! Kulobe lokhu, ngoba amazwi la aqotho njalo aliqiniso.’—ISambulo 21:5.
