“Asikavumelani ukuthi uNkulunkulu ulalo yini ibizo lokuthi nxa likhona lingaba yiliphi.”​—Usikhwicamfundo uDavid Cunningham, ebhukwini elithi Theological Studies..

UNkulunkulu wathi: “Mina nginguJehova, lelo yilo ibizo lami!” (U-Isaya 42:8) UJehova libizo lesiHebheru elitsho ukuthi, “Wenza Ukuthi Kube Khona.”

UJehova ufuna silisebenzise ibizo lakhe. IBhayibhili lithi: “Bizani ibizo lakhe, zaziseni izizwe ngalokho akwenzileyo, limemezele ukuthi ibizo lakhe liphakeme.”​—U-Isaya 12:4.

UJesu walisebenzisa ibizo likaNkulunkulu. Wathandaza kuJehova wathi: “Ngibazisile [abafundi] ibizo lakho, njalo ngizakubazisa lona.” Kungani uJesu wenza ukuthi abafundi bakhe balazi ibizo likaNkulunkulu? Waqhubeka esithi: “Ukuba uthando ongithande ngalo [Nkulunkulu] lube kibo, lami ngibe kibo.”​—UJohane 17:26, The Holy Bible in Ndebele.

Usikhwicamfundo uWalter Lowrie, obona ngezifundo eziphathelane lokholo wabhala wathi: “Umuntu ongamazi ngebizo uNkulunkulu kamazi sibili ukuthi ngumuntu okhona njalo ngeke enelise ukumthanda nxa ebona angani ungumoya nje.”

Indoda okuthiwa nguVictor yayingalovi esontweni kodwa yayicabanga ukuthi ayimazi sibili uNkulunkulu. Yathi: “Ngafunda ukuthi ibizo likaNkulunkulu nguJehova njalo kwakungani lethulwa okusemthethweni kimi. Kwakungani ngasengize ngamthola lowomuntu engasengilesikhathi eside ngisizwa okunengi ngaye. Ekucineni ngabona ukuthi ukhona sibili njalo ngaqalisa ukuba ngumngane wakhe.”

Kanti njalo, uJehova usondela eduze kwalabo abasebenzisa ibizo lakhe. IBhayibhili lithembisa lokuthi: “Labo abalaziyo ibizo lakho bazathemba kuwe, ngoba wena Jehova, kawubafulatheli abakudingayo.” (IHubo 9:10) UNkulunkulu uphinda abanike umvuzo labo abakhuleka ebizweni lakhe. IBhayibhili lithi: “Loba ngubani okhuleka ebizweni likaJehova uzasindiswa.”​—UJoweli 2:32.