“Asisoze safa salukhohlwa uthando esalutshengiswayo!” Amazwi la akhulunywa ngomunye uDade we-Ukraine ngemva kokuzwa incwadi eyabalwa nguStephen Lett oweQula Elibusayo laboFakazi bakaJehova. Wayengomunye wabangu-165 000 abezwa izinkulumo zikaMfowethu uLett ngesikhathi evakatshele e-Ukraine mhlaka 10 lo-11 ngenyanga kaMay ngo-2014.

Incwadi leyo lezinkulumo kwatolikelwa ezindimini ezinhlanu futhi abantu ababesemaWolu angu-700 babelalele.

UMark Sanderson weQula Elibusayo laye wabalela oFakazi beRussia incwadi efananayo mhlaka 10 lo-11 May. Uhlelo lolo lwatolikelwa ezindimini ezingu-14 futhi lwalulalelwe ngoFakazi abangu-180 413. Abazalwane beBelarus labo babelulalele uhlelo lolu.

Incwadi leyo eyayivela kuQula Elibusayo yayibhalelwe wonke amabandla aseRussia lase-Ukraine. UMfowethu uSanderson wayibala ngesiRussian, futhi lokho kwenza igatsha leRussia labhala lathi: “Abazalwane bathinteka kwamancane ngoba bananzelela ukuthi iQula Elibusayo liyabathanda. Sazibonela ngawethu ukuthi iQula Elibusayo liyasithanda.”

Inhloso yencwadi leyo yayingeyokududuza lokuqinisa abazalwane ababethwaliswe nzima ngezombangazwe. Yakhuthaza abazalwane ukuthi baqhubeke ‘bengasibo bomhlaba’ ngokungangeneli kwezombangazwe.—UJohane 17:16.

IQula Elibusayo lakhuthaza abazalwane ukuthi bahlale bengamathe lolimi loJehova ngokuhlala bethandaza, betaditsha futhi becabangisisa ngeLizwi lakhe. Bakhunjuzwa ukuthi lanxa bangaze bathwale qatha amazwi kaJehova aku-Isaya 54:17 kawasoze awele phansi. Athi: “Akulasikhali esikhandelwe wena esizaphumelela.”

Incwadi evela kuQula Elibusayo yaphetha ngamazwi athi: “Siyalithanda okwamagama. Lihlala lisemicabangweni yethu futhi sihlala silikhululekela kuJehova.”

Ngesikhathi likhuluma ngokuvakatsha kwabazalwane laba ababili, igatsha le-Ukraine lathi: “Indlela iQula Elibusayo elisithanda ngayo yasitshiya singela mathe. Ukuvakatshelwa nguMfowethu uLett loMfowethu uSanderson eRussia le-Ukraine kwatshengisa ukuthi oFakazi bakaJehova babambene lokuthi uJehova loJesu ababathontisi. Lesi kwakuyisikhathi esihle sibili sokuvakatshelwa futhi sasala sizimisele ukukhonza uJehova kungelani lobunzima esihlangana labo.”