Ngo-2005 omunye owesifazana we-India okuthiwa nguSowbhagya wafelwa ngumkakhe. Umkakhe wayebaphethe kuhle kakhulu yena lendodakazi yakhe eyayileminyaka emithathu okuthiwa nguMeghana. Kodwa umkakhe esefile, yena lendodakazi yakhe basala bedubeka.

 Okwaba buhlungu kakhulu kuSowbhagya yikuthi abanye basebemninela khatshana. Abangakibo basebemenza isibhonda lendodakazi yakhe futhi babehlala bebatshela ukuthi bayahlupha. USowbhagya waqalisa ukuya kwenye isonto eyayilapho ayehlala khona esiyadinga induduzo kodwa abantu bakhona babemkhangelela phansi ngenxa yokuthi wayengumyanga. USowbhagya waqalisa ukudinga umsebenzi ukuze enelise ukuzinakekela aphinde ondle lendodakazi yakhe. Wawudinga esawudinga umsebenzi kodwa kazange awuthole.

 USowbhagya uthi: “Ngasengibona umhlaba ungihlanekele, sengicabanga ukuzibulala. Kodwa ngangikwazi ukuthi nxa mina ngingafa indodakazi yami yayizasala idubeka, yikho ngabona kungcono ukuthi sife sobabili.” USowbhagya wahamba wayathenga iphoyizeni ngoba wayezibona engelancedo futhi engathandwa.

 Wathi esesitimeleni esebuyela endlini, omunye uFakazi kaJehova okuthiwa ngu-Elizabeth wamlanda waqalisa ukuxoxa laye. USowbhagya wamtshela ukuthi wayedinga umsebenzi, u-Elizabeth wasemthembisa ukuthi uzamncedisa. U-Elizabeth wamtshela lokuthi kulomuntu ayesiyamfundisa iBhayibhili. Lokhu kwammangalisa uSowbhagya ngoba lanxa wayeke wavakatshela amasonto amanengi wayengakaze ezwe ngabantu abataditsha iBhayibhili. U-Elizabeth watshela uSowbhagya ukuthi amvakatshele ukuze amtshele okunengi ngokuthi senziwa njani isifundo seBhayibhili.

 USowbhagya wathi esefikile endlini wayelokhu ecabanga ukuzibulala. Lanxa kunjalo, esinye isihlobo sathatha uMeghana sahamba sayavakatsha laye, yikho uSowbhagya wamelela ukuthi uMeghana aphenduke ukuze bayinathe bonke iphoyizeni.

 Esalindile wavakatshela u-Elizabeth owafika wamamukela ngazo zombili. U-Elizabeth wamtshengisa ibhuku elithi IBhayibhili Lifundisani Sibili? USowbhagya wathanda isihloko esithi “Bangaphi Abantu Abafileyo?” Wakhetha isihloko lesi ngenxa yokuthi wayesanda kufelwa ngumkakhe. Ngalelolanga uSowbhagya wahle wavuma ukufunda iBhayibhili.

 U-Elizabeth wanxusa uSowbhagya emhlanganweni wesabelo owawuzabakhona ngeviki elandelayo njalo uSowbhagya wavuma. Akuzwayo emhlanganweni lo kwamkhuthaza kakhulu waze wathi ufuna ukuba nguFakazi kaJehova. Esebuyela endlini evela emhlanganweni wathola umsebenzi.

 USowbhagya waqhubeka efunda iBhayibhili. Wayengasafuni ukuzibulala ngoba wayesekwazi ukuthi uphilelani. Wabhabhathizwa futhi ngemva kwesikhathi indodakazi yakhe uMeghana layo yabhabhathizwa. Khathesi bobabili bangamaphayona esikhathi sonke njalo uMeghana uyancedisa emsebenzini owenziwa kwenye iwofisi yokuhumutsha ese-India.

 USowbhagya loMeghana bayabonga kakhulu ukuthi u-Elizabeth wazinika isikhathi sokukhuluma loSowbhagya esitimeleni, watshengisa ukuthi uyamthanda futhi wamtshela leqiniso eliseBhayibhilini. Kanti njalo bayambonga kakhulu uJehova. UMeghana uthi: “Ngabe asifundiswanga iqiniso leliyana langa aluba kudala safa. Khathesi siyathokoza kakhulu. Mina lomama sisilindele ngabomvu isikhathi lapho esizaphinda sihlangane khona lobaba, simgone, simfundise ngoJehova futhi simtshele lokuthi uJehova wasisindisa njani.”