UDaiane nguFakazi kaJehova oliphayona lesikhathi sonke eBrazil. Ngelinye ilanga etshumayela ngefoni waxoxa lendoda lomkayo ababefuna ukufunda okunengi eBhayibhilini. Batshela uDaiane ukuthi basebethutha besiya endaweni ekhatshana eyayingelamagetsi kanye le-inthanethi. Kanti njalo indawo leyo yayingela ngitsho uFakazi kaJehova. Ukuze benelise ukuqhubekela phambili bexoxa ngeBhayibhili, imuli le yanika uDaiane inamba yefoni esetshenziswa ngumphakathi ayengayisebenzisa ukuze abafonele. Basebevumelana ukuthi uzafona nini lesikhathi sakhona ukuze baxoxe.

 UDaiane wafona ngelanga ababelivumelene basebexoxa. Kwathi kusiyaphela amaviki amabili basebefunde kathathu.

 Kodwa wathi efona ngemva kwakhonapho wayengasayitholi imuli le. Kazange akhalale uDaiane wayelokhe efona kathathu ngeviki abesetshumayeza loba ngubani oyabe edobhe ifoni. UDaiane wacina eseqalise ukufunda labanye abantu abahlala endaweni le.

 Ngelinye ilanga uDaiane lomkakhe bathi befundisa ijaha elithile iBhayibhili besebenzisa ifoni yomphakathi, kwakulomfundisi owayeseduzane khonapho elalele ingxoxo leyo. Wasesondela eduze ukuze ayizwe kuhle indaba. Umfundisi lo wacela ukukhuluma loDaiane lomkakhe. Wabatshela ukuthi ukuthandile lokho akuzwileyo yikho laye wayesefuna ukufunda iBhayibhili.

 UDaiane lomkakhe basebefunda labantu abangu-6 iBhayibhili okuhlanganisa lomfundisi besebenzisa ifoni leyo yomphakathi. Abanye balabo abafundayo sebeke bayingena imihlangano yebandla besebenzisa ifoni. Omunye wabo walungisa ibhentshi ukuze bahlale kulo nxa befunda.

 UDaiane lomkakhe bayathokoza ukuthi benelisile ukutshumayela izindaba ezinhle zoMbuso endaweni le okunzima ukufika kuyo. UDaiane uthi, “UJehova uba leqiniso lokuthi abantu bayazizwa izindaba ezinhle kungelani lokuthi bahlala khatshana kangakanani.”