Apokaripsi 1:1-20
1 Izvi ndizvona zvakavonesa Jesu Kristu, iyena wakazvipuwa ndi Mwari, kuti avonese varanda vake zviro zvinoda kuitika ngo kukasika. Iyena wakatuma ngirozi yake kuti iyende ku mushandiri wake Johani, komutatija zviro zvinozoitika kumbejiyo,
2 Johani wakaziviswa soko rakavha kuna Mwari no ucapupu hwakaitwa ndi Jesu Kristu no zviro zvese zvaakavona.
3 Anodakara mundhu anoverenga ngo izwi guru na vaya vanozwa masoko o uporofeti no kuteveja masoko akatahwemo, ngokuti nguva yakagajwa iri kukhwedera.
4 Inini Johani ndiri kutarira ku ungano nomwe jo ku porovhinsiya yo Aziya: Ivanyi no unyasha hucikaezaniswi no runyararo hunovha ka “Wiya aripo, waingepo no anozoviya,” no hunovha ku mujimu munomwe iri pamberi po cigaro cake co umambo,
5 no hunovha ka Jesu Kristu “Capupu Cakagondeka,” “dangwe ro kumuswa ko vakafa” no “Mutongi wo majimambo o pasi pano.”
Ndiyena wakatida, wotisujunura ku zvishaishi zvedu ngo ngazi yake.
6 Iyena wakaita kuti tive majimambo no vapiri kuna Mwari wake na Babake. Ndizvona, iyena ngaasimbhwe ave no simba mbhera narini. Ameni.
7 Vonanyi! Iyena ari kuviya mu makwiti, mundhu wese anozomuvona, na vaya vakamubayaya vanozomuvonavo; mavhumbo ese o pasi pano, anozojitaka pa diti ecicumba ngo ndava yake. Ndizvona, Ameni.
8 Jehovha* Mwari anoti: “Ndini Arfa na Omega,* Wiya aripo, waingepo no anozoviya, wo Masimba Ese.”
9 Inini Johani hama yenyu inotambujika na imwimwi, yova mu umambo na imwimwi, yocungirira na imwimwi mukuzwirana na Jesu, ndainga pa cirundu cinodanijwa kuti Patimosi ngo kubhuya ngo pamusoro pa Mwari ndeciita ucapupu hwa Jesu.
10 Ndakava mu njiku ya Mambo ngo kufemehwa, ndozwa sure kwangu izwi rakavanga rakatojana no kurira ko mbhayapaya,
11 reciti: “Zvauri kuvonari, zvitarei uzvitumire ku ungano nomwe: yo ku Efeso, yo ku Esmirna, yo ku Pergamo, yo ku Tiyatira, yo ku Sardhi, yo ku Firadhefiya no yo ku Raodhiseya.”
12 Inini ndakatendeuka kuti ndivone kuti ndiyani wainga ecibhuya na inini, pondakatendeuka, ndakavona zvigajikiro zvinomwe zvo zvibani* zvo goridhi.
13 Pakati po zvigajikiro zvo zvibani,* painga no mundhu wakatojana no mwana wo mundhu, waisimira nguvo yakareba kuguma ku soka, wosunga pa diti* ngo bhande.
14 Kusiyapo izvo, musoro wake no vhuji rake zvaicena inga ukuse hwo kucena no cando. Majiso ake aiezana no murazvu wo muriro,
15 murenje jake jaitojana no utare hwaushoni pahunonyunguruswa, izwi rake raitojana no kuvhuma ko kumwa yakawanda.
16 Mu nyara yake yo mukono muho mainga no ndhondho nomwe, pa muromo pake paibuda banga rakareba rakarojwa mativi maviri, ku meso kwake kwaiezana no kumonikira ko zuva recibhwaka ngo simba rese.
17 Pandakamuvona ndakawira pa soka jake inga mundhu wafa.
Iyena wakandicanjikira nyara yake yo mukono muho, wondivhunja kuti: “Ucathya. Inini ndiri wo kutanga no wo kupejisira,
18 na wiya anopona, ndainga ndakafa asi wari ndiri kupona mbhera narini, kwenda no kwenda. Inini ndino zvavhi zvo rufu no zvo Guva. *
19 Ngo kudaro, tarai zviro zvo wavona, zviri kuitika no zvinozoitika pasure pa izvi.
20 Cakafisika ca Mwari co ndhondho nomwe jawavona mu mukono wangu wo muho no zvigajikiro zvinomwe zvo zvibani* zvo goridhi, nga ici: Ndhondho nomwe jinoimirira ndhumwa* nomwe jo ungano nomwe, zvigajikiro zvinomwe zvo zvibani* zvinoimirira ungano nomwe.
Masoko o Pasi
^ Vonanyi Kudurujihwa ko Magama.
^ Kana: “ndini A na Z.” Gama rokuti: Arfa, rinoimirira retra yokutanga. Omega rinoimirira retra yo kupejisira yo maarfabheto o Cigiriki.
^ Zvigabhu-gabhu.
^ Zvigabhu-gabhu.
^ Kangaije: “pa hana.”
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
^ Zvigabhu-gabhu.
^ Gama ngo Gama: “ngirozi.”
^ Zvigabhu-gabhu.
