Apokaripsi 14:1-20
14 Inini ndakaringisa, ndovona Vhuta rainga rakaima pa Dundhu ro Ziyoni. Pamwepo na irona, pakavonekavo mutengo waikwana kuita zana na makumarongomuna na varongomuna o zviuru* zvo vandhu vainga no zina ro vhuta no zina ra Baba waro rakatahwa pa huma.
2 Ndakazwa izwi raivha kudenga. Izwi iri, raiyezana no mwaungu wo kumwa yakawanda no kupaja ko mbheni. Izwi randakazwari, raiyezanazve no vaimbi vairija zvimadangari zvavo, veciimba.
3 Ivona vaiimba ndumbo yaiita inga ndumbo imbza pamberi po cigaro co umambo no pamberi po zvisikwa zvirongomuna zvinopona, pamwepo no vakuru. Apana waikwanisa kuimba ndumbo iyi. Vaikwanisa kuiimba basi, nga vayani vanokwana kuita zana na makumarongomuna na varongomuna o zviuru* zvo vandhu vakatengwa pasi pano.
4 Vandhu ava, avazivi kusvipiswa ngo vanakaji. Zvokadi ivona vakaita inga mbhandwe. Ivona vari kutevera Vhuta kuri kwese kwarinoenda. Vakatengwa kuvha pakati po vandhu inga mucero yo kutanga kuna Mwari no kuno Vhuta.
5 Pa muromo pavo apazivi kubuda magama o kucengejera. Ivona avana cavanopumbhwa.
6 Ndakavonazve ngirozi imweni yecimburuka pakati po denga. Iyona yainga no masoko akanaka aidikana kutokoteswa ku vandhu vanogara pasi pano; vo majinja ese, vo mavhumbo ese, vo ndimi jese no vandhu vese.
7 Iyona yaikhuwa* yeciti: “Ithyanyi Mwari, mumukuje. Ngokuti yaguma nguva yo kutonga kwake. Namatanyi wiya wakaita kudenga no pasi pano no jombe, pomwe no ndau jinobuda kumwa.”
8 Perepo yakaviya ngirozi imweni yocipiri, yeciti: “Rawa, rawa Bhabhironi Guru, raiitaya kuti majinja ese amwe vhinyu yo kuda kwaro kuita uhure.”*
9 Ngirozi imweni yocitatu yakajitevera yecikhuwa* yeciti: “Wiya anonamata cikara no cithombi caco, wodihwa cidhindho pa huma kana munyara,
10 anozomwavo vhinyu yo ushungu hwa Mwari hwakaduruhwa hucizivi kuthathanywa,* pomwe no kopo yo ushungu hwake. Mundhu uwu anozotambujwa ngo muriro no enshofre, pamberi po ngirozi jake jakacena no po Vhuta.
11 Usi hwo kutambujwa kwavo hunozokhwira mbhera narini, kwenda no kwenda. Vaya vakanamata cikara no cithombi caco, voashira cidhindho co zina raco avazozorori usiku no masikati.
12 Apo ndipona panoda kucungirira ko vakasanwa, vanozwira mutemo ja Mwari, voenderera mberi vecitenda Jesu.”
13 Ndakazwazve izwi recivha kudenga reciti: “Tarai kudari: Vanodakara vaya vanofa nguva ino kwenda mberi vakabatana na Mambo. Hina, mujimu unonanga kuti ngavazorore pa mabasa avo. Zviito zvavo zvinozovaperekeja.”
14 Ndakavonazve gore rakacena. Panyezuru pogorepo, paigara mundhu wakatojana no mwana wo mundhu. Mu musoro make mainga muno junguja ro goridhi. Iyena waibata sikeyo yakapinja.*
15 Ngirozi imweni yakabuda mu ndau yakacena yo themberi, yokhuwa* ka wiya waigara pa gore eciti: “Shandisai sikeyo yako ukotore. Ngokuti yaguma nguva yo kukotora. Zvirimwa zvo pasi pano zvaivha.”
16 Mundhu wainga akagara pa gore riya wakanghwinisa sikeyo yake pasi pano. Pasi pano pakakotohwa.
17 Ngirozi imweni yainga inosikeyo yakapinja,* yakabudavo mu ndau yakacena yo themberi. Themberi yondhoyo iri kudenga.
18 Pa artari, pakabuda ngirozi imweni yainga ino simba kupinda muriro. Yakakhuwa* kuno ngirozi iya yaingaya no sikeyo inopinja* yeciti: “Shandisa sikeyo yako yakapinja,* uceke zvicanja zvo uvha jo pasi pano, ngo kuti uvha jaivha.”
19 Ngirozi yakanghwinisa sikeyo yayo pasi pano. Iyona yakaceka zvicanja zvo uvha, yojikhandira mu ndau yakakura yo kusvinira uvha jo ushungu hwa Mwari.
20 Ndau yo kusvinira iyi, yakacikwa-cikwa kunja ko dhorobha. Mondhomo makabuda ngazi. Ngazi yondhoyo yakaguma ku muromo yo haci pa mumango unokhwedera kuita mazana matatu* o makirometro.*
Masoko o Pasi
^ 144.000.
^ 144.000.
^ Kana: “yaimima.”
^ Vonanyi Kudurujihwa ko Magama.
^ Kana: “yecimima.”
^ Kana: “kuvhengwa; kusharuja.”
^ Yakapita.
^ Kana: “yomima.”
^ Yakapita.
^ Kana: “yakamima.”
^ Inopita.
^ Yakapita.
^ 300.
^ Gama ngo Gama: 1.600, o mashitadhiyo.
