Apokaripsi 5:1-14
5 Ndakavona muphukutu munyara yo mukono muho ya Wiya wainga wakagara pa cigaro co umambo, wakatahwa mu mativi maviri wofungwa ngo zvinamiro zvinomwe.
2 Inini ndakavona ngirozi yakavanga yecikhuwa,* kuti: “Ndiyani anofanera kufunungura muphukutu no kuvhisa zvinamiro zvawo?”
3 Asi kwainga kucina mundhu kudenga, panyika kana pasi po nyika waikwanisa kufunungura muphukutu no kuvona zvakatahwemo.
4 Ndakacema* maningi ngokuti apacainga no mundhu waikwanisa kufunungura muphukutu no kuvona zvakatahwa mukati mawo.
5 Asi umwe wo vakuru wakandivhunja kuti: “Ucacema.* Izwai! Mbhondoro yo vhumbo ra Judha, muji wa Dhavhidhi, yanyisa, iyona ndiyona inokwanisa kufunungura muphukutu no zvinamiro zvawo zvinomwe.”
6 Inini ndakavona vhuta raiita inga rakafa, rakaima pakati po cigaro co umambo no pakati po zvisikwa zvinopona no pakati po vakuru. Irona rainga rino munyanga munomwe no majiso manomwe, majiso aya anoiimirira mujimu munomwe ya Mwari, yakatumwa kwenda ku nyika yese.
7 Irona rakakhwedera ngokukasika rotora muphukutu waingaya mu nyara yo mukono muho ya Wiya wakagara pacigaro co umambo.
8 Parakatora muphukutu wiya, zvisikwa zvirongomuna zvinopona no vakuru makumaviri na varongomuna vakagwadama pamberi po Vhuta, umwe na umwe wavo wainga no cimadangari no zvibasiya zvo goridhi zvaizara ngo rubani. (Rubani uhu, unoimirira mukumbiro jo vandhu vakasanwa.)
9 Ivona vaiimba ndumbo imbza veciti: “Ndimwi munofanera kutora muphukutu no kufunungura zvinamiro zvawo, ngokuti makaurawa, ngazi yenyu yotenga vandhu kuti vashandire Mwari, vecivha ku mavhumbo ese, ndimi jese, vandhu vese no ku majinja ese.
10 Imwimwi makavaita majimambo no vapiri va Mwari wedu, ivona vanozotonga nyika.”
11 Inini ndakaringira, ndozwa izwi ro ngirozi jakawanda jakatendeneja cigaro co umambo pamwepo no zvisikwa zvinopona no vakuru, mutengo wavo vainga mazana no mazana o zviuru zvakawandisisa no zviuru zvo zviuru.
12 Ivona vainanga ngo izwi guru kuti: “Vhuta rakaurawaya rinofanera kuashira simba, upfumi, uzivi, kureremejwa, kukujwa no makomborero.”
13 Ndakazwa zvisikwa zvese zvo kudenga, panyika, pasi po nyika, mu jombe no zvese zvirimo, zvecinanga kuti: “Wiya wakagara pacigaro co umambo no Vhuta, ngavakomborehwe, kureremejwa, kukujwa no simba mbhera narini, kwenda no kwenda.”
14 Zvisikwa zvirongomuna zvinopona zvainanga kuti: “Ameni!” vakuru vakagwadama vonamata Mwari.
