Ekisodho 3:1-22
3 Mosi waihavisa mushambi wa Jetro vatezvara vake, mupiri wo Midhiyani. Paaiseseja mushambi ngo kumavirira ko bani, wakaguma pa dundhu ra Mwari wo cokwadi, rinozwi Horebhi.
2 Ngo kudaro, ngirozi ya Jehovha yakamubudira pa murazvu wo muriro pakati po pfiba* ro muzwa. Mosi paaigara ecisota, wakavona kuti irona aricaipsepi.
3 Ngo kudaro, Mosi wakati: “Ndinoda kukhwedera kuti ndivone kuti zvicinyi zviri kuitikaro, ngokuti andizivi kumbozvivonazve. Ngenyi pfibero* riri kubwaka kuveni ariripi kupsa?”
4 Jehovha paakavona kuti Mosi ari kukhwedera pa pfiba* ro muzwa, iyena wakamudanija eciti: “Mosi! Mosi!” Iyena wakadavira kuti: “Ndauwe.”
5 Iyena wakati: “Ucakhwedera phedo. Vhisai magwada ari musoka jako, ngokuti pauri waro pakacena.”
6 Iyena wakaenderera mberi eciti: “Inini ndiri Mwari wa baba wako, Mwari wa Abhirahama, Mwari wa Izaki na Mwari wa Jakobe.” Perapo Mosi wakafukija ku meso kwake, ngokuti waithya kuvona Mwari wo cokwadi.
7 Jehovha wakati: “Ndakavona matambujiko o vandhu vangu vari mu Ejipita. Ndakazwazve kucema* kwavo ngo ndava yo basa rovari kuvangirijwa kuita. Ndinonasazve kuziva kuti ivona vari kutambujika maningi.
8 Inini ndinozoviya kuzovaponesa mu nyara jo Vaejipita no kuvavhisa mu nyikeyo, ndovadira mu nyika yaushoni no yakakura. Nyika iyi inopopoma mukaka* no uci, ndharaundha yo Vakhanani, Vahiti, Vaamori, Vaperezi, Vahivhi no Vajebhusi.
9 Kukhuwa* ko Vaiziraeri kwaguma kondiri. Ndiri kuvona kuti Vaejipita vari kuvatambuja maningi.”
10 Waro, viya kuno, ndikutume kuti uende ka Faro. Iwewe unozovhisa vandhu vangu, Vaiziraeri, vari ku Ejipita.
11 Ngo kudaro, Mosi wakavhunja Mwari wo cokwadi kudari: “Ndini yani inini kuti ndiyende ka Faro kobudisa Vaiziraeri ku nyika yo Ejipita?”
12 Ngo kudaro, Mwari wakati: “Inini ndinozova na iwewe. Citatijo cinozovonesa kuti ndini ndakutuma nga ici: Ukabudisa vandhu vangu mu nyika yo Ejipita, imwimwi munozoviya koshandira* inini Mwari wo cokwadi pa dundhu iri.”
13 Asi Mosi wakavhunjisa Mwari wo cokwadi kuti: “Ngatiti ndaenda kuno Vaiziraeri, ndovavhunja kudari: ‘Mwari wo majicekuru enyu wandituma kwamuri.’ Asi ivona vondivhunjisa kuti: ‘Zina rake ndiyani?’ Waro inini ndinozovadavira kudini?”
14 Ngo kudaro, Mwari wakavhunja Mosi kudari: “Inini Ndinozova Zviya Zvandasana* Kuva.”* Wotizve: “Izvi ndizvona zvaunodikana kuvhunja Vaiziraeri, wiya anodanijwa kuti ‘Inini Ndinozova, wandituma kwamuri.’”
15 Mwari wakavhunjazve Mosi kudari:
“Vhunjai Vaiziraeri kudari: ‘Jehovha, Mwari wo majicekuru enyu, Mwari wa Abhirahama, Mwari wa Izaki na Mwari wa Jakobe, wandituma kwamuri.’ Iri ndirona zina rangu ro kwenda no kwenda, randinozoceukijwa ndirona ku mubarihwana no mubarihwana.
16 Wari ciendai, ukwengweneje vakuru vese vo Vaiziraeri, uvavhunje kudari: ‘Jehovha Mwari wo majicekuru enyu, Mwari wa Abhirahama, Izaki na Jakobe, wandibudira wondivhunja kudari: “Ndavona zviri kuitika kwamuri no zvamuri kuitihwa ngo Vaejipita.
17 Ngo kudaro, ndiri kumuvhunja kuti: ‘Inini ndinozomuvhisa pa kutambujwa kwamuri kuitwa ngo Vaejipita, ndomuendesa mu nyika yo Vakhanani, Vahiti, Vaamori, Vaperezi, Vahivhi no Vajebhusi. Nyika iyi inopopoma mukaka* no uci.’”’
18 “Zvokadi ivona vanozotenda zvaunonanga. Iwewe endai ka mambo wo Ejipita pamwepo no vakuru vo Iziraeri. Imwimwi munodikana kumuvhunja kudari: ‘Jehovha, Mwari wo Vahebheru, wabhuya na itusu. Ngo kudaro, tapota, titenderenyi kuti tiite hwendo hwo njiku ndhatu, kuti tiite mupiro kuna Mwari wedu Jehovha, muzvipare.’
19 Asi inini ndinonasa kuzviziva ushoni kuti mambo wo Ejipita, aazomutenderi kuti imwimwi mupinde. Anozomutendera basi kudari iyena akavangirijwa ngo ciri cese.
20 Ngo kudaro, ndinozoshandisa simba rangu kuti nditake Vaejipita ngo zviito zvangu zvese zvinoshamaisa. Perapo, iyena anozomupindisa.
21 Ndinozoita kuti imwimwi muitihwe unyasha ngo Vaejipita, kuti pamunozopinda, mutame kupinda mucina ciro.
22 Mwanakaji umwe na umwe, anodikana kukumbira nguvo no zviro zvakaithwa ngo sirivha no goridhi ku vhizinyu wake no mwanakaji wo Ejipita ari kugara pamuzi pake, motora upfumi hwese hwo Ejipita, mothika vana venyu vorume no vokaji.”
Masoko o Pasi
^ Kana: “fusiro.”
^ Kana: “fusiro.”
^ Kana: “fusi.”
^ Kurira
^ Reti
^ Kumima
^ Konamata.
^ Zvandinoda.
^ Vonanyi Masoko Okuengejera A4.
^ Reti.
