Ekisodho 32:1-35
32 Vandhu vecivona kuti Mosi wainonoka kuviya kuvha pa dundhu, vakatendeneja Aroni vomuvhunja kudari: “Mukai, tiitirei cimwari kuti cititungamirire. Ngokuti atizvizivi zvaitika na Mosi uwu, mundhu wakatibudisa mu Ejipita.”
2 Ngo kudaro, Aroni wakavavhunja kudari: “Vhisanyi biriku* jo goridhi jiri mu njeve jo vakaji venyu, vana venyu vo rume no vana venyu vokaji, mujiviise kuno.”
3 Ngo kudaro, vandhu vese vakaviisa biriku* jo goridhi jainga mu njeve, vojipekeja Aroni.
4 Iyena wakatora goridhi rovakaviisaro, worinyungurusa woita cithombe, cakatojana no mwana wo n’gombe.* Waro ivona vakatanga kunanga kudari: “Nga uwu mwari wenyu Vaiziraeri, wakamubudisa mu nyika yo Ejipita.”
5 Aroni paakavona izvi, wakavaka artari pambeji po cithombe. Perapo wakazivisa kudari: “Mangwana kunozova no mutambo wokuitira Jehovha.”
6 Ngo kudaro, vakafumira comangwanani, voita zvipo zvo kupiswa no mupiro jo kuzwana. Perapo vandhu vakagara kuti vahe no kumwa. Perapo vakamuka kuti vatambe.
7 Jehovha wakavhunja Mosi kudari: “Bzukai upinde, ngokuti vandhu vako vawakabudisa mu nyika yo Ejipita, vaita zviro zvakashata.
8 Vakasika kupauka mu gwanja randakavavhunja kuti vatevere. Vajiitira cithombe cakaezana no cimwana co n’gombe.* Ivona vari kucigwadamira no kuciitira mupiro vecinanga kuti: ‘Nga uwu mwari wenyu Vaiziraeri, wakamubudisa mu nyika yo Ejipita.’”
9 Jehovha wakavhunja Mosi kudari: “Ndavona kuti vandhu ava, vakavanga musoro.
10 Waro ndiregerei ndivapeje ngo ushungu hwangu hunobwaka. Pa ndau pavo ndiite iwewe jinja rakakura.”
11 Waro Mosi wakadeketerera Jehovha, Mwari wake eciti: “Nandi Jehovha, ngenyi munosiya ushungu hwenyu hwecibwakira vandhu venyu, pasure pokuvabudisa mu nyika yo Ejipita ngo simba guru?
12 Kudari mukaita izvi, Vaejipita vanozonanga kudari: ‘Mwari wavo wainga no murangariro wakashata paakavabudisa Muejipita muno. Iyena waida kuvauraira mu matundhu no kuvapeja pasi pano.’ Waro ndapota, regeranyi ushungu hwenyu.* Mucavaitira zvamuri kurangarira kuvaitira.
13 Ceukijanyi vashandiri venyu, Abhirahama na Izaki na Iziraeri, vomakapikira ngo zina renyu mecinanga kuti: ‘Inini ndinozowanja mubarihwana wako. Iwona unozowanda inga ndhondho jo kumatenga. Ndinozopa mubarihwana wako nyika jese iji, jondakasana kuti jive ndhaka yavo mbhera na rini.’”
14 Ngo ndava yazvo, Jehovha wakaregera* kuviisa dambujiko raaida kuviisira vandhu vake.
15 Perapo Mosi wakabzuka pa dundhu ano mapuwe maviri munyara o Ucapupu. Mapuwe aya, ainga akatahwa mativi ese o maviri, kumbeji no sure.
16 Ndi Mwari kamare wakaita mapuwe aya perapo womatara masoko ake.
17 Joshuwa paakatanga kuzwa bope ro vandhu vaikhuwa, iyena wakavhunja Mosi kudari: “Ndiri kuzwa kukhuwa ko hondo ku akampamento.”
18 Asi Mosi wakananga kudari:
“Zvatiri kuzwari asipi ndumbo inoimbhwa ngo vandhu vawina,Nee asipizve ndumbo inoimbhwa ngo vandhu vari kucumba.Asi ndiri kuzwa mukhaindi umweni wo ndumbo.”
19 Mosi paakandokhwedera phedo no akampamento, wovona cithombe co cimwana co n’gombe, ushungu hwake hwakatanga kubwaka, wokhandira mapuwe akaita inga tabwa aingaya munyara mwake, ophwanyika-phwanyika ese pasi* po dundhu.
20 Iyena wakatora cithombe ciya, wocipisa ngo muriro no kucikwiya-kwiya. Perapo iyena wakacivhenganija no kumwa, woita kuti Vaiziraeri vamwe kumweyo.
21 Tevere, Mosi wakavhunja Aroni kudari: “Iwewe watungamirira vandhu ava kuti vagume pa kuita cishaishi cikuru cakadari. Manji ivona vazviitisa kudini kuti vakucengeje kuti uite zviro izvi?”
22 Aroni wakadavira kudari: “Mucanyangajwa mambo. Imwimwi munonasa kuzviziva kuti vandhu ava vakapeyamira pa kuita zviro zvakashata basi.
23 Ivona vakandivhunja kudari: ‘Tiitirei cimwari kuti cititungamirire. Ngokuti atizvizivi zvaitika na Mosi uwu, mundhu wakatibudisa mu Ejipita.’
24 Ngo kudaro inini ndakavavhunja kudari: ‘Mundhu wese ano goridhi ngaarivhise andipekeje.’ Inini ndakariashira ndorikhandira pa muriro, robuda cithombe co cimwana co n’gombe.”*
25 Mosi wakavona kuti Aroni aacaikwanisepizve kutungamirira vandhu. Ngokuti iyena wakavasiya veciita kuda kwavo. Izvi zvakavapseruja maningi pamberi po vavengi vavo.
26 Ngo kudaro Mosi wakaima pa musuvo wo akampamento, wonanga kudari: “Ndiyani ari kudivi ra Jehovha? Ngaaviye kuno!” Varevhi vese vakaenda kwaari.
27 Iyena wakati: “Jehovha, Mwari wo Vaiziraeri wananga kudari: ‘Umwe na umwe wenyu ngaatore banga rake, aridire mucihunu* cake. Anghwine mu akampamento jese; musuvo ngo musuvo. Auraye hama yake, na vhizinyu wake no shamwari yake.’”
28 Varevhi vakaita zvavakavhunjwa ndi Mosi. Ngo kudaro pa njiku yondhoyo, pakafa vandhu vanokhwedera kuita 3.000.
29 Tevere Mosi wakati: “Jipirenyi nyamasi mu basa ra Jehovha. Ngokuti umwe na uwme wenyu, wahwisa mwana wake no hama yake. Nyamasi Mwari anozomukomborera.”
30 Pa njiku yakatevera, Mosi wakavhunja vandhu kudari: “Makaita cishaishi cakakura maningi. Waro inini ndinozokhwira kuna Jehovha, kuti ndivone dangani ndingamuviiranisa naye pa cishaishi cenyu.”
31 Ngo kudaro, Mosi wakahwirirazve kuna Jehovha, wonanga kudari: “Vandhu ava vakaita cishaishi cikuru! Vojiitira cimwari co goridhi!
32 Asi kudari mecida, varegererenyi cishaishi cavo. Kudari mucikadi, ndapota pfujuranyi zina rangu mu bhuku ramakatara.”
33 Waro Jehovha wakavhunja Mosi kudari: “Ndinozopfujura mu bhuku rangu, zina ro mundhu wiya wakandishaishira.
34 Wari endai kotungamirira vandhu ava kuti muende ku ndau yandakakuvhunja. Ngirozi yangu inozoenda pamberi pako. Ndinozovatambuja ngo pamusoro po cishaishi cavo.”
35 Jehovha wakakhawisa vandhu ngo ndava yocithombe co cimwana co n’gombe cavakaitihwa ndi Aroni.
Masoko o Pasi
^ Kana: “mbhete.”
^ Kana: “mbhete.”
^ Kana: “no thoyo; no buru.”
^ Kana: “no thoyo; no buru.”
^ Kana: “ndapota zvidembenyi; ndapota zvivazenyi.”
^ Kana: “wakazvidemba woregera; wakazvivaza woregera.”
^ Kana: “panyasi.”
^ Kana: “no thoyo; no buru.”
^ Vonanyi Kudurujihwa ko Magama.
