Johani 17:1-26
17 Jesu paakapera kubhuya zviro izvi, iyena wakasota kudenga, wonanga kuti: “Baba, yakwana nguva. Kujanyi mwana wenyu, kuti mwana wenyu amukuje.
2 Makamupa simba pakati po vandhu vese, kuti iyena ape upenyu hucikaperi ku vandhu vese vamakamupa.
3 Kuti vawane upenyu hucikaperi, vanodikana kumuziva, imwimwi Mwari umwe basi wo cokwadi, na Jesu Kristu wamakatuma.
4 Inini ndakamukuja pa nyika, ndopeja kuita basa ramakandipa kuti ndiite.
5 Wari Baba, ndiitenyi kuti ndive pa mutivi penyu no rukujo hwandainga nahwo na imwimwi nyika icito yasikwa.
6 “Ndakazivisa zina renyu ku vandhu vamakandipa pa nyika. Vainga venyu, asi imwimwi makavatora mondipekeja, ivona vakazwira soko renyu.
7 Wari, ivona vanoziva kuti zviro zvese zvamakandipa, zvinovha kwamuri;
8 ngokuti ndakavapa masoko amakandipa. Ivona vakamaashira voziva kuti ndakavha kwamuri inga muimiriri wenyu, votenda kuti ndimwi makandituma.
9 Ndinovakumbirira; andiripi kukumbirira nyika, asi ndiri kukumbirira vaya vamakandipa ngokuti ngovenyu;
10 zviro zvangu zvese ngo zvenyu, zviro zvenyu ngo zvangu, inini ndakakujwa pakati pavo.
11 “Andiciripizve mu nyika, asi ivona vari mu nyika, inini ndiri kuza kwamuri. Baba Makacena, vavonererenyi ngo ndava yo zina renyu, zina ramakandipa kuti ivona vaite umwe,* inga itusu tiri umwe.*
12 Pandainga navo, ndaivavonerera ngo ndava yo zina renyu, zina ramakandipa; inini ndaivangwarira. Ngo kudaro, apana na umwe wavo wakasvejeka, kuciripi mwana wo kuparajwa, kuti matahwa akwanirisike.
13 Asi wari ndiri kuviya kwamuri, inini ndiri kunanga zviro izvi pa nyika, kuti ivona vazare ngo mudakaro wangu.
14 Inini ndakavavhunja soko renyu, asi nyika inovanyenya, ngokuti avaiti divi ro nyika, inga ndini ndicikaiti divi ro nyika.
15 “Andikumbiri kuti muvavhise pa nyika, asi kuti muvavonerere ngo ndava yo mushati.
16 Ivona avaiti divi ro nyika, ngokuti inini andiiti divi ro nyika.
17 Vacenesenyi ngo cokwadi, soko renyu icokwadi.
18 Inga zvamakanditumira mu nyika, inini ndinovatumiravo mu nyika.
19 Ndiri kujicenesa ngo ndava yavo, kuti ivona vaceneswe ngo cokwadi.
20 “Andikumbiriri ivona basi, asi na vaya vanonditenda ngo ndava yo masoko avo,
21 kuti vese vave umwe, inga imwimwi Baba muri pamwepo na inini, inini ndiri pamwepo na imwimwi, kuti ivona vabatanevo na itusu, kuti nyika itende kuti makandituma.
22 Ndakavapa rukujo hwamakandipa, kuti ivona vaite umwe, inga itusu tiri umwe.
23 Inini ndakabatana na ivona, imwimwi makabatana na inini, kuti ivona vave vakanasa kubatana kamare. Ngo kudaro, nyika inozoziva kuti makandituma, imwimwi makavada inga kuda kwamakandiita.
24 Baba, ndinoda kuti vaya vamakandipa vave na inini pandinonga ndiri, kuti ivona vavone rukujo hwamakandipa, ngokuti makandida nyika icito yasikwa.
25 Baba Vakarurama, nyika aizivi kumuziva kamare, asi inini ndinomuziva, ivona vanoziva kuti makandituma.
26 Ndakavazivisa zina renyu, ndicarizivisazve, kuti rudo hwamakandida ndihwona huve mukati mavo, inini ndive ndakabatana navo.”
