Mabasa o Vapostori 11:1-30
11 Vapostori no hama jainga Judheya vakazwa kuti vandhu vo majinja vaashiravo soko ra Mwari.
2 Ngo kudaro, Pedhru paakaguma ku Jerusarema, vandhu vaibatisisa shwiro yo kusokwa, vakatanga kumushora,
3 veciti: “Iwewe wakanghwina mu nyumba yo vandhu vacizivi kusokwa, woha navo.”
4 Pedhru wakatanga kuvadurujira zvese zvakaitika, eciti:
5 “Pandainga mu dhorobha ro Jope ndeciita mukumbiro, mucivoniso, ndakavona ciro cakaezana no jira rakakura, recideruswa ngo mativi marongomuna o rupiko hwaro recivha kudenga, roviya pambeji pangu.
6 Pandainga ndecizvisotesesa, ndakavona zvinyama zvo pasi pano zvo makumbo marongomuna, zvinyama zvomusora, zvinyama zvinogwezva no shiri jo mudenga.
7 Ndakazwavo izwi recindivhunja kuti: ‘Pedhru, mukai, urayai, uhe!’
8 Asi inini ndakati: ‘Mambo, azviiti, ngokuti andizivi kumboha ciro cinorambijwa no cicizivi kucena mukuzwirana no mutemo.’
9 Hwocipiri, izwi rakavha kudenga rakadavira kuti: ‘Ucadanija zviro zvakaceneswa ndi Mwari kuti izviro zvakasvipiswa.’
10 Zvakaitikazve hwocitatu, perapo zviro zvese zvakakwevehwazve kudenga.
11 Pa mukuvo wondhowo, vanarume vatatu vakatumwa kuvha Sezareya veciza kondipsaka, vainga vakaima pa nyumba yataiitira mukumbiro.
12 Perapo, mujimu mucena wakandivhunja kuti ndipinde navo, ndicikakani-kani ciri cese. Asi hama ndhandhatu iji jakaendavo na inini, tonghwina pamuzi pa Korneriyo.
13 “Iyena wakativhunja mavonere aakaita ngirozi yakaima mumba make, yeciti: ‘Tumai vandhu vaende Jope, vaende kodanija mwanarume anozwi Simoni, anodanijwa kuti Pedhru,
14 iyena anozokuvhunja zviro zvaunodikana kuita no mbhuri yako kuti muponeswe.’
15 Asi pandakatanga kuvereketa, ivona vakaashira mujimu mucena inga zvatakauashiravo pa kutanga.
16 Pondhopo inini ndakaceuja masoko ainangwa ndi Mambo okuti: ‘Johani waibhabhatija ngo kumwa, asi imwimwi munozobhabhatijwa ngo mujimu mucena.’
17 Asi, kudari Mwari wakavapavo cipo co mwoyo wese inga zvaakatipa itusu takatendari Mambo Jesu Kristu, ndini ani kuti ndiphingaije Mwari?”
18 Ivona vakanyarara pavakazwa zviro izvo, votanga kukuja Mwari, veciti: “Ngo kudaro, Mwari wadavo kuti vandhu vo majinja vakhauye kuti vawane upenyu.”
19 Vajiji vakaparajikaya ngo kuteverehwa kwakamuka pasure po kufa kwa Estefano, vakaguma ku Finisiya, ku Shipre no ku Antiyokiya, asi vaicumaera Vajudha basi.
20 Asi vandhu vamweni vakona vokuvha Shipre no Sirene vakaenda ku Antiyokiya, votanga kubhuya no vandhu vaivereketa Cigiriki, vecitokotesa masoko akanaka ngo pamusoro pa Mambo Jesu.
21 Kusiyapo izvo, nyara ya Jehovha* yainga navo, vandhu vazinji vakava vatendi vova vateveri va Mambo.
22 Masoko aya akaguma ku ungano yo Jerusarema. Ivona vakatuma Bharnabha kuti aende ku Antiyokiya.
23 Naagumeyo, wakavona unyasha hucikaezaniswi hwa Mwari, iyena wakadakara, wotanga kuvavangisa kuti vaenderere mberi vakagondeka kuna Mambo ngo mwoyo wese.
24 Ngokuti iyena wainga mwanarume wakanaka, wakazara ngo mujimu mucena pamwepo no rutendo. Vandhu vakawanda vakatenda Mambo.
25 Bharnabha wakaenda ku Tarso kuti apsake Sauro mbhera amuwane.
26 Paakamuwana, wakamutora woenda naye ku Antiyokiya. Kondhoyo, vakaita gore rese veciungana na ivona no ungano no kujijisa vandhu vakawanda. Mu Antiyokiya ndimona makatanga kudanijwa vajiji zina rokuti Makristu, vecitungamirihwa ndi Mwari.
27 Mu mazuva ondhowo, vaporofeti vakavha Jerusarema vecienda Antiyokiya.
28 Umwe wavo wainga Agabho, wakamuka woporofeta ecishandiswa ngo mujimu mucena kuti mu nyika yese maizova no njara. Njara yondhoyo, yakazoitika mu mukuvo wa Kraudhiyo.
29 Ngo kudaro, vajiji vakasunga kuti umwe nga umwe anodikana kutumira zvokubesera ndizvona hama jo ku Judheya, mukuzwirana no zvaanazvo.
30 Ivona vakazviita, votumira zvirozvo ngo nyara ya Bharnabha na Sauro.
Masoko o Pasi
^ Vonanyi Kudurujihwa ko Magama.
