Mabasa o Vapostori 7:1-60
7 Asi mupiri mukuru wakamuvhunjisa kuti: “Izvo ndizvonadi?”
2 Estefano wakadavira kuti: “Hama no majicekuru, izwanyi. Mwari wosimba wakabudira cekuru wedu Abhirahama, paainga ku Mezopotamiya acito aenda kogara Harani,
3 womuvhunja kuti: ‘Budai mu nyika yako no pakati po ukama hwako, uende ku nyika yandinozokutatija.’
4 Iyena wakabuda mu nyika yo Vakaradhiya woenda kogara Harani. Pasure po kufa ka baba wake, Mwari wakamuthuthisa kuti aviye kuzogara kwamuri kugarari wari.
5 Asi iyena aazivi kupuwa utaka mu nyika yondhoyo, nee ndau yo kucika soka yake; asi wakamugondesa kumupa ndauyo pamwepo no mubarihwana* wake waizotevera, pikija wainga acito abara mwana.
6 Kusiyapo izvo, Mwari wakamuvhunja kuti mubarihwana* wake unozova vandhu vo nyikanja mu nyika iciripi yavo. Vandhu vo kondhoyo vanozovaita varanda no kuvatambuja pa makore anokwana kuita mazana marongomuna.*
7 Mwari wakati: ‘Jinja rinozovaitaro varanda, ndinozoritonga. Pasure pazvo, vanozobuda kuti vaviye kuzondiitira basa rakacena mu ndau ino.’
8 Perapo, Mwari wakaita naye citenderano co kusokwa. Abhirahama wakabara Izaki, womusoka pa njiku yocisere, Izaki wakabara Jakobe, Jakobe wakabara majicekuru edu gumi na maviri.
9 Majicekuru aya, akaitira ushanje* Josefa, perapo omutengesera ku Ejipita. Asi Mwari wainga naye,
10 iyena wakamuponesa pa matambujiko ake ese, womuitira unyasha no kumupekeja uzivi pamberi pa Faro, mambo wo Ejipita. Faro wakamugaja kuti atonge Ejipita no nyumba yake yese.
11 Asi mu Ejipita no mu Kanani makaita njara, yotambuja maningi vandhu, majicekuru edu akakonehwa cokuha.
12 Asi Jakobe wakazwa kuti ku Ejipita kwainga no zvokuha, iyena wakatuma majicekuru edu pa hwendo hwo kutanga kuti aendeyo.
13 Pa hwendo hwocipiri, Josefa wakaita kuti hama jake jimuzive, Faro wakazivavo ukama hwa Josefa.
14 Ngo kudaro, Josefa wakatumira masoko o kodanija baba wake Jakobe no ukama hwake, vandhu vanokwana makumanomwe na vashanu.
15 Jakobe wakaenda Ejipita wofireyo, majicekuru edu akafireyovo.
16 Mutembo javo jakathwahwa kuenda Shekemi. Mutembo iji jakavigihwa mu guva ro vana va Amori rakatengwa ndi Abhirahama ngo mare yo sirivha mu ndharaundha yo Shekemi.
17 “Nguva yo kukwanirisika ko cigondiso cakaithwa ndi Mwari kuna Abhirahama payainga yecikhwedera, vandhu vakaengejeka veciwanda mu Ejipita,
18 mbhera pa mukuvo wakatanga kutonga mambo umweni mu Ejipita. Mambo uwu acaizivepi kuti Josefa ndiyani.
19 Iyena wakacengeja jinja redu wotambuja majicekuru edu, ecivavangirija kuti vatame kusiya vana vavo vari penye.
20 Pa mukuvo wondhowo, Mosi wakabahwa, iyena wainga akaseja maningi.* Iyena wakarehwa pa muzi pa baba wake mukati mo mweji mutatu.
21 Asi paakasiiwa, mwana wo kaji wa Faro wakamutora woenda komurera pa muzi pake inga mwana wake.
22 Ngo kudaro, Mosi wakajijiswa uzivi hwese hwo Ejipita. Zvaainanga no zvaaiita zvainga no simba.
23 Paakava no makumarongomuna o makore, Mosi wakarangarira mu mwoyo make kuenda kovona hama jake, vana vo Iziraeri.
24 Paakavona Muejipita ecitambuja Muiziraeri, iyena wakataka Muejipita wiya, womuuraya.
25 Iyena wakarangarira kuti hama jake jaizozvibata kuti Mwari waida kuvaponesa ecishandisa iyena, asi ijona ajizivi kuzvibata.
26 Pa njiku yakatevera, iyena wakaendazve kovona hama jake, pajainga jecitakana, iyena wakaeja kujipinga,* eciti: ‘Imwimwi muri hama no hama. Waro muri kutakana ngenyi?’
27 Asi wiya waitakaya mudoni wake, wakamusukumija, eciti: ‘Ndiyani wakakugaja kuti uite mutungamiriri no mutongi wedu?
28 Uri kuda kundiuraya inga zvawakaitaya Muejipita wiya zuro kani?’
29 Mosi paakazvizwa, wakatiza woenda kogara ku mutundhu wo Midhiyani, inga munyikanja, kwaakabara vana vaviri.
30 Pakandopera makumarongomuna o makore, ngirozi yakamubudira mu bani raitendeneja Dundhu ro Sinai, pa murazvu wo pfiba ro muzwa raibwaka.
31 Mosi paakazvivona, wakakahamara ndizvona. Asi paaikhwedera kuti anase kuzvivona, wakazwa izwi ra Jehovha* reciti:
32 ‘Inini ndiri Mwari wo majicekuru ako, Mwari wa Abhirahama, Izaki na Jakobe.’ Mosi wakatanga kutetemera. Iyena aazivi kudazve konasa kuzvivona ushoni.
33 Jehovha* wakamuvhunja kuti: ‘Vhisai magwada mu soka jako, ngokuti ndau yauri wari yakacena.
34 Ndavona kushuphwa ko vandhu vangu vari ku Ejipita, ndazwa kucema kwavo. Inini ndaviya kuzovaponesa. Waro, viya kuno, ndikutume kwenda ku Ejipita.’
35 Mosi wondhowo wavakarambaya, veciti: ‘Ndiyani wakakugaja kuti uite mutungamiriri no mutongi wedu?’ ndiyena wakatumwa ndi Mwari kuti ave mutungamiriri anoponesa ecishandiswa ngo ngirozi yakamubudira pa pfiba ro muzwa.
36 Mwanarume uwu, wakavabudisa eciita mushamaiso no zvitatijo ku Ejipita, pa Jombe ro Kupsuka no muzvipare mukati mo makumarongomuna o makore.
37 “Mosi uwu ndiyena wakavhunja Vaiziraeri kuti: ‘Mwari anozomumusira muporofeti wakaezana na inini pakati po hama jenyu.’
38 Uwu ndiyena wainga ari pakati po ungano mu zvipare ano ngirozi yakabhuyaya na iyena no majicekuru edu pa Dundhu ro Sinai. Iyena wakaashira masoko akacena no acikaperi kuti atipekeje.
39 Majicekuru edu akaramba kumuzwira, iwona akamunyenya, mwoyo yawo yohwirira ku Ejipita.
40 Iwona akavhunja Aroni kuti: ‘Tiitirei zvimwari kuti zvititungamirire. Ngokuti atizvizivi zvaitika na Mosi uwu wakatibudisaya mu nyika yo Ejipita.’
41 Ngo kudaro, ivona vakaita mwana wo n’gombe* mu njiku jondhojo, voviisira cithombi ici mupiro, perapo vodakara ngo mabasa o nyara javo.
42 Mwari wakavafuratira wovasiya veciita basa rakacena kuitira zuva, mweji no ndhondho, inga zvakatahwa mu bhuku ro vaporofeti kuti: ‘Imwimwi nyumba yo Vaiziraeri, pa mainga mu zvipare mukati mo makumarongomuna o makore, amucaiitira inini mupiro.
43 Makatora tende ya Moroki no ndhondho ya mwari anozwi Refani. Zviro izvi zvainga zvithombi zvamakaita kuti muzvinamate. Ngo kudaro, ndinomugogomera moenda ndhambo kunopindirija ku Bhabhironi.’
44 “Majicekuru edu ainga ano tende yo ucapupu mu zvipare, inga zvakanangwa nga Wiya wakabhuya na Mosi kuti ainasirire mukuzwirana no muezaniso waakavona.
45 Majicekuru edu akaiashira oinghwinisa mu nyika yo majinja pamwepo na Joshuwa. Vandhu vo nyika iyi, vakagogomehwa ndi Mwari pa mberi po majicekuru edu. Tende iyi yakagarepo mbhera njiku ja Dhavhidhi.
46 Iyena wakaitihwa unyasha ndi Mwari, wokumbira basa ro kuita ndau yo kugara ya Mwari wa Jakobe.
47 Asi Soromona ndiyena wakazomuvakira nyumba.
48 Pikija zvakadaro, Mukuru-Kuru aagari mu nyumba jakavakwa ngo vandhu, inga zvakanangwa ngo muporofeti kuti:
49 ‘Jehovha* anonanga kuti: Ngokuti kudenga ndikona kwandinogara, pasi ndipona ciciko co soka jangu. Munozondivakira nyumba yo mushovonyi? Kana kuti: Ndau yangu yo kuzorora iri kwapi?
50 Asipi nyara yangu yakaita zviro zvese here?’
51 “Imwi, vandhu vakaoma musoro no vano mwoyo no njeve jicizivi kusokwa, munohwisana no mujimu mucena mukuvo wese. Imwimwi muri kuita zvaiithwa ngo majicekuru enyu.
52 Muporofeti wapi acizivi kuteverehwa ngo majicekuru enyu? Ivona vakauraya vandhu vaizivisa kuviya ko mundhu wakarurama. Imwimwi ndimwi makava vatengesi no vakatumwa kuti mumuuraye.
53 Imwimwi makaashira Mutemo wakaziviswa ngo ngirozi asi imwimwi amuzivi kuuzwira.”
54 Pavakazwa masoko aya, vakanyangajwa maningi votanga kumurumira meno avo.*
55 Asi iyena paakazara ngo mujimu mucena, wakasota kudenga wovona ukuru hwa Mwari, Jesu ari ngo kumukono muho wa Mwari,
56 wonanga kuti: “Ndiri kuvona kumatenga kwakashama, Mwana wo mundhu wakaima pa mukono muho wa Mwari.”
57 Ivona vakadanijira ngo izwi guru vofunga njeve javo vecigogoma vese kwenda kwaari.
58 Pavakapera kumubudisa kunja ko dhorobha vakamufura ngo mapuwe. Zvapupu zvokunyepa zvakasiya nguvo jazvo pamberi po mujaha anodanijwa kuti Sauro.
59 Pavainga vecimufura ngo mapuwe, Estefano wakaita mukumbiro eciti: “Mambo Jesu, ashiranyi upenyu hwangu.”*
60 Ngo kudaro, wakagwadama, wokhuwa ngo izwi guru eciti: “Jehovha,* mucavapa ndava yo cishaishi ici.” Paakapera kunanga masoko aya iyena wakafa.
Masoko o Pasi
^ Gama ngo Gama: “mbeu.”
^ Gama ngo Gama: “mbeu.”
^ 400.
^ Kana: “usanje.”
^ Kana: “wainga akaseja kana kunyara pamberi pa Mwari.”
^ Kana: “kuphinga.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Thoyo; buru.
^ Vonanyi Kudurujihwa ko Magama.
^ Kuvonesa ushungu hwavo.
^ Pneuma Mucigiriki.
^ Vonanyi Kudurujihwa ko Magama.
