Mateu 20:1-34
20 “Umambo hwo kumatenga wakaezana no muno wo muzi, wakafumira comangwanani woenda kopsaka vashandi kuti vashande mu munda wake wo muuvha.
2 Paakapera kuzwirana navo kuzovapoceresa ngo dhenariyo* rimwe pa njiku, wakavaendesa ku munda wake wo muuvha.
3 Pajaikhwedera kuita nguva nvumbamwe jo mangwanani,* wakabudazve, wovona vamweni vakaima pa bazari vacina cavaiita;
4 iyena wakavavhunja kuti: ‘Endanyivo kobatira mu munda wangu wo muuvha, ndinozomupoceresa mukuzwirana no zvamashanda.’
5 Ivona vakaenda. Iyena wakabudazve pajaikhwedera kuita nguva gumi na mbiri jo masikati* no pajaikhwedera kuita nguva ndhatu jo madeko,* woitazve zvondhozvo.
6 Pejisire, wakabudazve pajaikhwedera kuita nguva shanu jo madeko.* Naabuda, wakavona vamweni vakaima, wovavhunjisa kudari: ‘Munogarirenyi apa nguva yese iyi mucikaiti ciro?’
7 Ivona vakamudavira kuti: ‘Ngokuti apana watidanijavo.’ Iyena wakati kwavari: ‘Endanyivo ku munda wangu wo muuvha.’
8 “Zuva noravira, mune wo munda wakavhunja muvonereri wo munda wake wo muuvha kudari: ‘Danijai vashandi, uvapocerese. Tangai ngo vokupejisira, wogumisira ngo vokutanga.’
9 Pavakaguma vandhu vo nguva shanu jo madeko,* umwe na umwe wavo wakaashira dhenariyo* rimwe.
10 Ngo kudaro, novaguma vandhu vokutanga vakarangarira kuti vaizoashira zvakawanda, asi vakapocereswavo dhenariyo* rimwe.
11 Novaashira, ivona vakatanga kun’gun’gutira mune wo muzi
12 veciti: ‘Vandhu vo kupejisira ava vashanda nguva imwe, asi imwimwi mavapoceresa mutengo wondhowo no wedu, kuveni tashanda njiku yese tecipsa ngo zuva!’
13 Asi iyena wakadavira umwe wavo kudari: ‘Shamwari, andiripi kukuitira zvakashata. Atizivi kuzwirana dhenariyo* rimwe?
14 Torai mupocero wako upinde. Ndinoda kupa wokupejisira uwu mutengo wondhowo na iwewe.
15 Anditendehwi kuita zvandinoda no zviro zvangu here? Uri kundiitira thima ngokuti ndakanaka?
16 Ngo maitiro ondhowo, vokupejisira vanozoita vokutanga, vokutanga vanozoita vokupejisira.”
17 Pavaienda Jerusarema, Jesu wakadanija vajiji vake gumi na vaviri pamutivi pavainga mugwanja, wovavhunja kuti:
18 “Vonanyi! Tiri kuenda Jerusarema, Mwana wo mundhu anozopuwa mu nyara jo vapiri vakuru no vatari. Ivona vanozomutongera rufu,
19 vanozomupa mu nyara jo vomajinja kuti ashohwe, kutakwa no kuurawa pa mutanda. Perapo anozomuswa pa njiku yocitatu.”
20 Tevere, mai wo vana va Zebhedhi vakamukhwederera no vana vavo, vomugwadamira kuti vamukumbire ciri cese.
21 Jesu wakavavhunjisa kuti: “Munodenyi?” Mai vaya vakamudavira kudari: “Pamunozova mu Umambo hwenyu, itanyi kuti vana vangu vaviri ava, vagare pamwepo na imwimwi, umwe ku mukono muho, umweni ku mukono boshwe.”
22 Jesu wakadavira kuti: “Amuzvizivi zvamuri kukumbiraro. Munokwanisa kumwa zvandiri kudari kumwa?” Ivona vakati: “Tinokwanisa.”
23 Jesu wakavavhunja kudari: “Imwimwi munozomwadi zvandiri kudari kumwa, asi kuti mugare mukono muho no mukono boshwe asipi inini ndinopa ndau iji, ngo ja vaya vakajinasiririhwa ndi Baba wangu.”
24 Gumi ro vajiji vamweni povakazvizwa, vakanyangajwira Jakobo na Johani.
25 Jesu wakavadanija, wovavhunja kuti: “Imwimwi munozviziva kuti vatongi vo majinja vanobzinyirira vandhu vavo, vakuru vavo vanovatonga.
26 Izvi azvivhiri kuitika pakati penyu; asi wiya anoda kuita mukuru pakati penyu, anodikana kuva mushandiri wenyu.
27 Wiya anoda kuva wokutanga pakati penyu, ngaave muranda wenyu.
28 Inga Mwana wo mundhu, aazivi kuviya koshandihwa, asi wakaviya koshandira no kupira upenyu hwake kuti aponese vandhu vazinji.”
29 Pavaibuda mu Jeriko, mbungano huru yakamutevera.
30 Mapofu maviri aigara mu mbhiripiri mo citaka, paakazwa Jesu ecikhirira, akakhuwa eciti: “Mambo, Mwana wa Dhavhidhi, tiitirevo usizi!”
31 Asi mbungano yakaakharamusa, yecimavhunja kuti anyarare; asi iwona aiengejera kukhuwa, eciti: “Mambo, Mwana wa Dhavhidhi, tiitirevo usizi!”
32 Jesu wakaima, woadanija, woavhunjisa kudari: “Munoda kuti ndimuitirenyi?”
33 Mapofu ayani akati: “Mambo, itanyi kuti tivone.”
34 Ngo pena, Jesu wakapsasa majiso awo. Kuvhira pondhopo, iwona akatanga kuvona, omutevera.
Masoko o Pasi
^ Zingwenjere ro Ciroma rairema mutengo wo 3,85g.
^ Gama ngo Gama: “nguva yocitatu.”
^ Gama ngo Gama: “nguva yocitandhatu.”
^ Gama ngo Gama: “nguva yocipfumbamwe.”
^ Gama ngo Gama: “nguva yocigumi na imwe.”
^ Gama ngo Gama: “nguva yocigumi na imwe.”
^ Zingwenjere ro Ciroma rairema mutengo wo 3,85g.
^ Zingwenjere ro Ciroma rairema mutengo wo 3,85g.
^ Zingwenjere ro Ciroma rairema mutengo wo 3,85g.
