Nduyo 77:1-20
Ku mutungamiriri. Yakaimbhwa ndi Jedhutuni.* Nduyo ya Azafi.
77 Ndinozocemera Mwari ngo izwi rangu;Ndinozocemera Mwari, iyena anozondizwa.
2 Inini ndinopsaka Jehovha pa njiku yo dambujiko rangu.
Cousiku ndinomutambanujira nyara jangu ndicikarembi.
Apana ciro cingandinyaraja.
3 Pandinoceukija Mwari, ndinogomera;Ndinobararika hwiru no kupera simba (Sera)
4 Imwimwi amutenderi kuti inini ndivate;Ndinoneseka, ndokonehwa kuvereketa.
5 Murangariro wangu unohwirira ku mukuvo wokare,Makore o kare kamare.
6 Cousiku, ndinoceukija mumbo wangu;Ndinorangarijisisa mu mwoyo mwangu;Ndinonasa kupsakisisa kuti ndinase kuzwisisa.
7 Kureva kuti Jehovha anozotiramba kwenda no kwenda here?
Kureva kuti iyena aazotikhombijirizve unyasha hwake here?
8 Rudo hwake hucikacinji hwapera hwese kamare here?
Kureva kuti cigondiso cake cinozogara cicikakwanirisiki ku mubarihwana yese here?
9 Kureva kuti Mwari wakanganwa kutikhombijira unyasha here?Kureva kuti ushungu hwake hwapeja usizi hwake here? (Sera)
10 Kureva kuti ndinozoenderera mberi ndecinanga kuti: “Ndiri kutambujika,
Ngokuti Mukuru-Kuru wacinja manera aaititaja here?
11 Inini ndinozoceukija mabasa a Jehovha;*Inini ndinozoceukija zviito zvake zvinoshamaisa zvo mukuvo wo kare kamare.
12 Ndinozorangarijisisa ngo pamusoro po mabasa enyu eseNdinozorangarijijisa ngo zvamakaita.
13 Mwari wangu, makwanja enyu akacena.
Mwari wangu, ngowapi mwari umweni wakakura wakaezana na imwimwi?
14 Imwimwi ndimwi Mwari wo cokwadi, anoita zviro zvinoshamaisa.
Makavonesa vandhu simba renyu.
15 Makaponesa vandhu venyu ngo simba* renyu,Vana va Jakobe no vana va Josefa. (Sera)
16 Mwari wangu, kumwa yakamuvona;Kumwa yakamuvona yoneseka.
Kumwa yakajika yakatetemera.
17 Makore akanisa nvura.
Denga rakasvipa rakatindhira.Mupasha yenyu yaienda ku mativi ese.
18 Kutindhira ko mbheni yenyu, kwaiezana no kutindhira ko ngoro* yo hondo;Kurazva kwaivheneka pa nyika yese;Nyika yakatetemera, yozungunyika.
19 Makafunungura gwanja mu jombe,Gwanja renyu rakapinda ngo mu kumwa yakawanda;Asi apana mundhu wakakwanisa kuvona soka jenyu.
20 Makatungamirira vandhu venyu inga mushambi,Mecishandisa* Mosi na Aroni.
Masoko o Pasi
^ Vonanyi Kudurujihwa ko Magama.
^ Kana: “Jah.” Uku ikugurisihwa ko zina ra Jehovha.
^ Gama ngo Gama: “mukono wenyu.”
^ Kana: “kareta.”
^ Gama ngo Gama: “Ngo nyara ya.”
