Nduyo 83:1-18
Ndumbo. Nduyo ya Azafi.
83 Mwari wangu, mucagara makanyarara;Mwari Wangu, vereketanyi zviri zvese, itanyi zviri zvese.
2 Vonanyi! Vavengi venyu vari kuita joweyowe;Vaya vanomuzonda vari kuzvikuja.
3 Ngo kungwara kwavo, vanoronga mazano kuti vahwise Vandhu venyu ngo cifise-fise;Ivona vanoronga mazano akashata kuti vahwise vandhu vamunoda.
4 Vanoti: “Viyanyi, ngatipeje jinja rese iri ro Vaiziraeri,Kuti zina ro Iziraeri ritame kuzorangarihwazve.”
5 Ivona vanopangana mazano ngocavo;Ivona vakaita citenderano kuti vahwise vandhu venyu,
6 Vari mu tende yo Vaedhomi, yo Vaishimaeri, yo Vamowabhi, yo Vahagirite,
7 yo Vagebhari, yo Vaamoni, yo Vaamareki, yo Vafiristiya pamwepo no vagari vo Tiro.
8 Asiriya yakabatanavo navo;Ivona vanobesera vana va Roti. (Sera)
9 Vaitirenyi zvamakaitira Midhiyani,Zvamakaitira Sizera na Jabhini mu murambo wa Kishoni.
10 Ivona vakaurawa pa Eni-dhori;Voita inga ndimo yo mavhu.
11 Itiranyi vandhu vavo vanoreremejwa zviro zvamakaitira Orebhi na ZeebhuItiranyi vatungamiriri vavo zviro zvamakaitira Zebha na Zarimuna.
12 Ngokuti ivona vakati: “Ngatitore nyika inogara Mwari.”
13 Mwari wangu, itanyi kuti vaezane no sora rakavoma rinomburuswa ngo mbhepo,Vaezane no maushwa anotohwa ngo mbhepo.
14 Inga muriro unopisa gwasha,No murazvu wo muriro unopisa matundhu,
15 Imwimwi vatevererenyi ngo dutu renyu,Vathyisenyi ngo zibepo renyu.
16 Fukijanyi kumeso kwavo ngo nyowa,Kuti vapsake zina renyu, imwimwi Jehovha.
17 Ivona ngavapserujwe no kuthyiswa kwenda no kwenda;Ngavashohwe no kuparajwa;
18 Vandhu ngavazive kuti imwimwi zina renyu, ndimwi Jehovha,Ndimwi mwega basi Mukuru-Kuru wo nyika yese yo pasi.
