Varoma 2:1-29
2 Ngo kudaro, iwewe mundhu, azvinenyi kuti uri ani, kudari wecitonga vamweni, uri kujipa ndava, ngokuti unoitavo zviro zvondhozvo.
2 Itusu tinoziva kuti Mwari anotonga vandhu vanoita zviro zvakadari. Matongero ondhowo anozwirana no cokwadi.
3 Asi iwewe unotongaro vandhu vanoita zviro izvi, kuveni uri kuitavo zviro zvondhozvo, unorangarira kuti auzotonghwivo ndi Mwari kani?
4 Zvaunorerusaro kukura ko unyasha hwake, kunonoka kwake kucamwa no kusengerera, auzvizivi kuti Mwari ari kukukhombijira unyasha kuti ukhauye here?
5 Asi ngo kutama kuzwa kwako no kutindivara mwoyo kwako, iwewe uri kujiunganijira ushungu pa njiku yo ushungu no kuvonesa kutonga kwakarurama ka Mwari.
6 Iyena anozohwirijira umwe na umwe mukuzwirana no mabasa ake:
7 Anozopa upenyu hucikaperi kuna vaya vanovangirira vecipsaka zvakanaka, rukujo, nderemejo no upenyu ucikavori;
8 ngo kudaro, vaya vanobara joweyowe vacikazwiri cokwadi asi vecipurukira zvicizivi kururama, vanozowana ushungu no kucamwa.
9 Vandhu vese vanoita zviro zvakashata, vacazova no dambujiko no kucamwa, kutangira ku Vajudha mbhera ku Vagiriki;
10 asi vandhu vese vanoita zvakanaka, vacazova no rukujo, nderemejo no runyararo, kutangira ku Vajudha mbhera ku Vagiriki.
11 Ngokuti Mwari aana mukheto.
12 Ngokuti vese vakashaisha vacikazivi mutemo, vanozofa vacikazivi mutemo, asi vese vanoshaisha veciziva mutemo, vanozotongwa ngo mutemo.
13 Vanoziva mutemo, andivopi vakarurama pamberi pa Mwari, asi vanozwira mutemo ndivona vanozodanijwa kuti vakarurama.
14 Vandhu vo majinja vacina mutemo vanoita zviro zvinodiwa ngo mutemo mu cibarihwe cavo, vandhu ava, pikija vacina mutemo, ivona ndivona kamare mutemo pacavo.
15 Ivona kamare vanokhombija kuti mutemo wakatahwa mu mwoyo javo, hana yavo inoita ucapupu, kuti zvavanorangarira zvivape ndava kana kuti vatame kuwana ndava.
16 Izvi zvinozoitika pa njiku yokuti Mwari anozoshandisa Jesu Kristu kuti atonge zviro zvese zvakafisika zvo vandhu mukuzwirana no masoko akanaka andiri kuzivisari.
17 Kudari iwewe uri Mujudha, wecithemba mutemo, wecidada ngokuti unonamata Mwari,
18 weciziva kuda kwake, wotenda zviro zvakanaka ngokuti unojijiswa Mutemo,
19 unokhohwa kuti uri mutungamiriri wo mapofu, urizve ruvheneko hwo vandhu vari mu cidima,
20 murungamisi wo vacina hwiru, wo vana vadoko, wecizwisisa maumbihwe akaithwa uzivi no cokwadi cinowanika mu Mutemo.
21 Iwewe unojijisa vamweni, aujijijisivo wega? Iwewe unocumaera kuti: “Ucaba,” iwewe aubi here?
22 Iwewe unonanga kuti: “Ucaita upombo,” iwewe auiti upombo here? Iwewe unonyenya zvithombi, waro ngenyi unoba mu themberi?
23 Iwewe unodada ngo mutemo, waro ngenyi unorerusa Mwari ngo kutama kuzwira Mutemo?
24 Ngokuti zvakatahwa kuti: “Zina ra Mwari riri kutukwa pakati po vandhu vo majinja ngo ndava yenyu.”
25 Zvokadi, kusokwa kwako kuno mutengo kudari ukazwira mutemo; asi kudari ukatama kuzwira mutemo, kusokwa kwako akuna zvakunoreva.
26 Ngo kudaro, kudari mundhu acizivi kusokwa eciita zvakarurama zvinonangwa ngo mutemo, kutama kusokwa kwake akuzoverengwi inga kuti wakasokwa here?
27 Wiya acizivi kusokwa mu muviri ecizwira mutemo, anozokutonga iwewe, ucikazwiri mutemo pikija kuti uno mutemo wakatahwa no kuva kwako wakasokwa.
28 Mujudha wokadi asipi wiya anovoneka ngo kunja. Kusokwa kokadi kunopindirija ko pamuviri.
29 Kuva Mujudha wokadi kunobatanija undhu hwo mukati, iyena wakasokwa mu mwoyo mwake ngo mujimu mucena, kuciripi ngo mutemo wakatahwa. Kusimbhwa ko mundhu uwu kunovha ka Mwari, akuvhi ku vandhu.
