Jehovha wakapa pasi pano mwanarume no mwanakaji. Ndiwona muzi wedu. Kaveta, varovorani vo kutanga, Adhamu na Evha, avazivi kuruhwa kuti vazaje mugore—Mwari wainga arura ngirozi kuti jirarame mugore. (Jobe 38:4, 7) Zvokadi-kadi, wakatora mwanarume wo kutanga omudira mu paradhesi yakanyara maningi yaizwi munda wo Edheni. (Genesi 2:15-17) Jehovha wakapa Adhamu zve no mubarihwana wake vetero yo kuzobusa upenyu hucina magumo pasi pano.​—Verenganyi Nduyo 37:29; 115:16.

Pakutanga, munda wo Edheni basi ngo wainga paradhesi. Varovorani vo kutanga vaidikana kuti vazaje pasi ngo mu barihwana wavo. Ngo kufamba ko mukuvo, vaizozaja nyika yese zve kuiita paradhesi. (Genesi 1:28) Pasi apazomboparajwi mbhera na rini. Pacazondova muzi wo vandhu.​—Verenganyi Nduyo 104:5.

Vonanyi vhidhio inoti Ngenyi Mwari Wakarura Pasi?

Adhamu na Evha vakaphwanya mutemo wa Mwari, ngo kudaro Jehovha wakavagogomera mu munda. Paradhesi yakaruzika zve apana mundhu waikwanisa kuimusijira. Bhaibheri rinoti: “Anoregera vakaxata kutonga nyika”.—Jobe 9:24.​—Verenganyi Genesi 3:23, 24.

Kunanga kuti Jehovha waramwa cidisiso cake co kutanga here? Andizvopi! Iyena ngo wo masimba ese. Iyena aambokonehwi. (Isaia 45:18) Iyena anozomusijirazve mavhumbo o vandhu kudari ngo zvaainga akaemesera.​—Verenganyi Nduyo 37:11, 34.

Paradhesi inozomusijihwa pasi pano pa kutonga ka Jesu inga Mambo wakagajwa ndi Mwari. Mu hondo inodanijwa  kuti Armagedhoni, Jesu anozotungamirira ngirozi ja Mwari zve anozoparaja vaya vanozondana na Mwari. Perapo Jesu anozosunga Sathana ko makore 1.000. Vandhu va Mwari vanozopokonyoka mu kuparajwa uku ngo kuti Jesu anozovatungamirira no kuvangwarira. Ivona vanozova no upenyu hucingaperi mu Paradhesi pasi pano.​—Verenganyi Apokalipsi 20:1-3; 21:3, 4.

Mwari anozopeja rini zvakashata pasi pano? Jesu wakapa “civoniso” caizotatija kuti mugumo waaphedo. Zviitiko zvo munyika zviri kunesa mugariro wo vandhu zve zvinotatija kuti zvino tiri ku rarama mu “kupera ko nyika.”​—Verenganyi Mateu 24:3, 7-14, 21, 22.

Jesu acazopeja matambujiko ese paanozotonga pasi pano ari kudenga mu 1.000 co makore. (Isaia 9:6, 7; 11:9) Kunja ko kutonga basi inga Mambo, Jesu acazoshanda inga Mupiri Mukuru zve acazopeja zivishaishi zvo vandhu vanoda Mwari. Ngo kudaro, Mwari ecishandisa Jesu, acazopeja ndhwaji, ukarahwa zve rufu.​—Verenganyi Isaia 25:8; 33:24.

Vanozwira Mwari vacazorarama mu Paradhesi. (1 Johani 2:17) Jesu wakatuma vateveri vake kuti vapsange vandhu vakapfava zve vavajijise kuti vangaitisa kudini kuti vatendehwe ndi Mwari. Nyamasi uno, Jehovha ari kunasirira zviuri no zviuri zvo vandhu kuti vararame mu Paradhesi pasi pano. (Sofonia 2:3) Ku Nyumba jo Umambo jo Zvapupu zva Jehovha, vandhu vanojija kuva majimwamuna, majibaba, vakaji no majimai akanaka. Vana no vabari vanonamata pamwepo vecijija kuti masoko akanaka angavabeseresa kudini.​—Verenganyi Mikeya 4:1-4.