1, 2. (a) Ecishandisa muphorofita Zakaria, zvicinyi zvakananga Jehovha kuti zvaizoitika mu nguva jedu jino? (b) Mubvunjo japi jinozodavihwa pa musoro uno? (Vonanyi pikica yo kutanga.)

JEHOVHA wakanangira nguva yatiri kuraramari, eciti “mu njikujo, gumi ro vandhu vo majinja no vo ndumi jese, vanozobata muJuda ngo mbhiri ro hanju yake, veciti: ‘Tinoda kuenda newe, ngokuti tazwisisa kuti Mwari anemwi.’” (Zak. 8:23) Mu juda anoimirira vaya vakazojwa ndi Mwari ngo mujimu mucena. Ivona vanodanijwavo “Israeli ya Mwari.” (Gal. 6:16) Gumi ro vanarume rinoimirira vaya vano vetero yo kurarama pasi pano. Ivona vanozviziva kuti Jehovha wakakomborera cikwata ici co vokuzojwa zve vanojizwa kureremejeka ngo kunamata Jehovha pamwepo no cikwata ici.

² Mukufanana no muphorofita Zakaria, Jesu wakagogomejera kuti vandhu va Mwari vaizobusa rubatano. Iyena wakanangira vateveri vake kuva zvikwata zviviri, “muxambi mudoko” zve “mabvuta amwenibze,” asi iyena wakanangavo kuti ivona vaizova “muxambi umwe” uno “muhavisi umwe.” (Lc. 12:32; Jo. 10:16) Asi, rubatano wo zvikwata zviviri izvi unoita kuti kuve no mubvunjo iji: “(1) Kureva kuti mabvuta amweni anodikana kuziva mazina o vese  vakazojwa nyamasi uno here? (2) Vokuzojwa vanodikana kujivona kudini pacavo? (3) Kudari ari wese ku ungano kwenyu akatanga kuha pau no kumwa vhinyu pa cirangarijo, munodikana kumuvona kudini? (4) Munodikana kukaya-kaya kudari mukavona kuti mutengo wo vanoha pau no kumwa vhinyu pa Cirangarijo uri kuengejeka here? Musoro uno ucazodavira mubvunjo iji.”

3. Ngenyi zvicikakwanisiki kwatiri nyamasi uno kunasa kuziva kamare kuti pakati po vandhu va Mwari ndiyani anozova ari ku divi ro vo 144.000?

³ Kureva kuti nyamasi uno mabvuta amweni anodikana kuziva mazina o vese vaya vakazojwa here? Mupinguro ngo wokuti, haiwa. Ngenyi? Ngokuti pikija mundhu akakokwa ndi Mwari kuti aende koorarama mugore, iyena anozoashira mupfupo wondhowo kudari akaramba akagondeka. Sathana anozviziva zvondhozvo zve iyena anoshandisa ‘vaphorofeti vokunyepa, . . . kuti vacengejwe, bzingakwanisika, na ivonavo vakasanwa.’ (Mt. 24:24) Apana na umwe wo vokuzojwa anozoashira mupfupo wake wo mugore, mbhera Jehova amuvona kuti mundhu wondhowo anofanera kuashira mupfupo wondhowo. Jehovha ndiyena anotema civaringo cokuti mundhu uwu anofanera zve ndiyena anomupa cidhindo co kupejisira, izvi zvingaitika nguva shomani acito afa akagondeka, kana zvingaitika nguva shomani “dambujiko guru” ricito ratanga. (Ap. 2:10; 7:3, 14) Ngo kudaro, azvina shwiro kuno vaya vanorarama pasi pano kueja kunanga kamare kuti pakati po vandhu va Mwari ngana anozotora rutivi pa 144.000. ^[1]

4. Zvingakwanisika kudini “kwenda” no Iziraeri yo kumujimu, zvecivoneka kuti azvikwanisiki kuziva kamare mazina o vaIziraeri vese vo kumujimu vari pasi pano?

⁴ Zvingaitisa kudini kuti mabvuta amweni ‘aende’ no vo kuzojwa, zvecivoneka kuti azvikwanisiki kuziva mazina avo vese vari pasi pano? Vonanyi zvinonanga ciphorofita ca Zakaria ngo pamusoro po gumi ro vanarume vo kuezanisira. Ivona ‘vaizobata muJuda ngo mbhiri ro hanju yake, veciti: ‘Tinoda kuenda newe, ngokuti tazwisisa kuti Mwari anemwi.’ Pikija apa pecinangihwa muJudha umwe basi, ngo maitiro ari ese, gama ro kuti “newe” riri kunangira vandhu vanodarika kuita umwe. Ngo kudaro, muJudha wo kumujimu uwu, ari kunangira mundhu anodarika kuita umwe, haiwa mundhu umwe! Ngo iyo ndava, akuna dikano yo kuziva muJudha umwe nga umwe wo kumujimu kuti tizomutevera. Kusiapo izvi, tinodikana kuvaziva inga cikwata perepo tovabesera. Matahwa apana paanotivangisa kuti tinodikana kutevera mundhu. Jesu ndiyena mutungamiriri wedu zve Bhaibheri rinotibvunja kuti tinodikana kuteverera iyena basi.​—Mt. 23:10.

5. I ngwajo yapi inodikana kubatisiswa ngo vokuzojwa, zve ngenyi?

⁵ Vaya vanoha pau no vhinyu pa Cirangarijo vanodikana kunasa kungwarira ngwajo iri pana 1 VaKorinto 11:27-29. (Verenganyi.) Ngo rapi fundo raida kunanga mupostori Pauro apa? MuKristu wakazojwa waizonga acikafaneri kuha pau no kumwa vhinyu pa Cirangarijo kudari acizivi kungwarira ushamwari hwake na Jehovha. (Heb. 6:4-6; 10:26-29) Ngwajo iyi inobesera vokuzojwa kuti vaceukije kuti ivona avato vaashira mupfupo wavo. Ivona vanodikana kuramba vecivangisira kuti “vazowane mupocero wo vanodanijihwa kupuwa ndi Mwari, kubvira nyezuru, mwa Kristu Jesu.”​—Fil. 3:13-16.

6. MaKristu okuzojwa anodikana kujivona kudini?

⁶ Pauro wakafemehwa kuti atare kudari:  “Ndibzo, inini, musungwi wa Tenji, ndinomupangira kuti, mufambe ngo maitiro akanaka, o makadanijihwa.” Vangazviitisa kudini izvi? Pauro wakaenderera mberi eciti: “Ngo kujidodokesa no kuthiva mwoyo kwese, ngo kusengerera kwese, mecikorondhana ngocenyu, ngo rudo. Vangiriranyi kugara no mujimu umwewo, ngo rubatano no rugarisiko.” (Ef. 4:1-3) Mujimu wa Jehovha unobesera vashandiri vake kuti vajidodokese, haiwa kujikuja. (Kol. 3:12) Ngo kudaro, vokuzojwa avajivoni inga kuti vano mujimu mucena maningi kupinda vaya vanozorarama pasi pano. Ivona avanangi kuti vanokwanisa maningi kuzwisisa zvokadi zvo Bhaibheri kupinda vamweni; nee avaeji kujivona kuti ngo maitiro ari ese vanosisira maningi kupinda vamweni. Avadikanizve kukoka ari wese kuti atangevo kuha pau no kumwa vhinyu pa Cirangarijo, ngo kuti vanonga vecirangarira kuti iyena wakazojwa, asi no kujidodokesa kwese, vanodavira kuti Jehovha ngaanokoka vandhu kuti vaende mugore.

7, 8. MaKristu okuzojwa aadikani kuvetera cinyi kuno vamweni, zve ngenyi?

⁷ Pikija vokuzojwa vecivona kuti i cidakajiso cinoshamaisa kudanijwa kwenda mugore, ivona avadikani kuvetera kuti vareremejwe maningi ngo vamweni. (Ef. 1:18, 19; verenganyi VaFilipi 2:2, 3.) Ivona vanozviziva kuti Jehovha paakavazoja, iyena aazivi kubvunja mundhu ari wese ngo pamusoro pazvo. Akuzivi kuitwa ciziviso pasi pese. Ngo kudaro ivona avakahamari kudari ari wese akatama kuzvithemba kamare kuti ivona vakazojwa ngo mujimu mucena. Zvokadi, ivona vanotendera kuti Matahwa anotingwaja kuti atidikani kukasika kutendera mundhu wiya anonanga kuti wagajwa basa riri rese rinosisira ndi Mwari. (Ap. 2:2) Zvecivoneka kuti ivona avadi kuvoniwa ngo maitiro akasiyana, ivona avazobvunji ari wese wo vanosongana naye kuti vakazojwa. Ivona avazodadiri vamweni ngo pamusoro po zvavanozoita mugore.​—1 Kor. 1:28, 29; verenganyi 1 VaKorinto 4:6-8.

⁸ Mu kuengejera, maKristu o kuzojwa aadikani kujivona inga vandhu vanotora rutivi pa cimwe cikwata. Ivona avapsaki vamweni vakazojwavo kuitira kuti vabhuisane ngo pamusoro po kuzojwa kwavo kana kuumba zvikwata zvo kujija Bhaibheri. (Gal. 1:15-17) Kuita kudaro kwaizoviisa kupaurana mukati mo ungano zve kwaizohwisana no mujimu mucena uwo unoviisa runyararo no rubatano.​—Verenganyi VaRoma 16:17, 18.

9. Ngenyi tinodikana kungwarira maningi ngo pamusoro po matajire atinoita ari wese anoha pau no kumwa vhinyu pa Cirangarijo? (Vonanyi bokiso rino musoro unoti: “Rudo ‘Ahuiti Zvicikadiki.’”)

⁹ Tinodikana kubatisa kudini ari wese anoha pau no kumwa vhinyu pa Cirangarijo? Jesu wakabvunja vajiji vake kudari: “Imwimwi mwese muri hama no hama.” Iyena wakaenderera mberi eciti: “Wiya anojikuja anozododokeswa, wiya anojidodokesa anozokujwa.” (Mt. 23:8-12) Ngo kudaro, zvaizova zvakashata kukuja mundhu, pikija iyena akava hake hama yo kuzojwa ya Kristu. Recinangira vakuru vo ungano, Bhaibheri rinonanga kuti tinodikana kutevejera rutendo hwavo, asi nakamwe arinangi kuti tinodikana kukhwijirija mundhu ari wese inga mutungamiriri wedu. (Heb. 13:7) Zvokadi kamare, Matahwa anonanga kuti ivona vanofanera ‘kukujwa zvakapetwa kaviri.’ Asi, ivona vanofanera kukujwa, haiwa ngo ndava yo kuti vakazojwa, asi ngokuti ‘vanotungamirira ngo njira yakanaka’ zve ‘vanoshanda ngo simba pa kuvereketa no kujijisa.’ (1 Tim. 5:17, Shanduro yeNyika Itsva) Ngo kudaro, vokuzojwa vaizoita nyowa kudari vamweni vaivakuja kana kureremeja zvicina mutengo. Kusiyapo izvi, kubata vakazojwa ngo maitiro akasiyana, zvaizovaitisa kuti vanesehwe kuramba vecijidodokesa. (Rom. 12:3) Apana na umwe wedu waizoda kuitisa  kuti hama ja Kristu jikhugunyike!​—Lc. 17:2.

10. Mungakhombijisa kudini nderemejo inofanera kuno maKristu okuzojwa?

¹⁰ Tingakhombijisa kudini nderemejo inofanera kuno vaya vakazojwa ndi Jehovha? Atidikani kuvaita mubvunjo ngo pamusoro po kuzojwa kwavo. Ngo kudaro, atidikani kunghwinira mu shwiro jicikatibataniji. (1 Tes. 4:11; 2 Tes. 3:11, Shanduro yeNyika Itsva) Atidikani kurangarira kuti vabari va wiya wakazojwaya, mukaji kana mwamuna wake, kubatanija no ukama hwake , vakazojwavo. Mubarihwana kana kurovorana azvibatanijwi pa shwiro iyi. (1 Tes. 2:12) Atidikani kubvunjisa mukaji kana mwamuna wo umwe wo vokuzojwa kuti anozwa kudini ngo kuziva kuti anozorarama mu Paradhiso pasi pano acina mwamuna kana mukaji wake. Kusiapo kuita mubvunjo jinozohwaja vamweni, tese tinodikana kuva no gwinyiso ro kuti Jehovha anozofunungura nyara yake ‘wogutisisa bzese bzinorarama.’​—Ndu. 145:16.

11. Ngo yapi ngozi yatinozotiza kudari tikareremeja muKristu wakazojwa ngo maitiro anofanera?

¹¹ Vaya vanotaja maKristu o kuzojwa ngo maitiro akafanera vanojingwarira ku murau wo kujidira pa ngozi. Matahwa anonanga kuti mu ungano mungatowanika “hama jokunyepa.” (Gal. 2:4, 5; 1 Jo. 2:19) Ijona jingatonanga kuti jakazojwa. Kusiapo izvo, maKristu amweni o kuzojwa angatopauka mu cokwadi. (Mt. 25:10-12; 2 Ped. 2:20, 21) Kudari tikatama ‘kuemurira vandhu,’ atizopauswi mu cokwadi ndivona; zve atizohwajihwi kudari muKristu anozivikanwa maningi, kana muKristu waano nguva yakareba ari mu cokwadi akaguma pa kutama kugondeka.​—Juda 16.

12, 13. Ngenyi atidikani kuneseka ngo pamusoro po mutengo wo vanoha pau no kumwa vhinyu pa Cirangarijo?

¹² Mu makore o kupejisira ano, takavona kuengejeka ko mutengo wo vanoha pau no kumwa vhinyu pa Cirangarijo co kufa ka Jesu. Izvi zviri kusiyana maningi no kupunguka ko mutengo wavo kwainga kucivoneka ko mazana o makore. Kuengejeka uku kunodikana kutinesa here? Haiwa. Ngatende tivone mafundo manganani atinodikana kuramba tinawo mu murangariro.

¹³ “[Jehovha] anoziva vandhu vake.” (2 Tim. 2:19) Jehovha ngaanoziva kuti zvokadi kamare ndiani wakazojwa, haiwa hama jinoverengaya vandhu vanomwa vhinyu no kuha pau pa  Cirangarijo co kufa ka Jesu. Pa mutengo wo vanomwa vhinyu no kuha pau, pano vayani vanorangarira kuti vakazojwa kuveni avazivi. Inga muezaniso, kuno vamweni vakatanga kuha pau no kumwa vhinyu asi vakazoima. Vamweni vangava no ndhendha jo mu musoro zvotovaita kuti varangarire kuti vano vetero yo kuzotonga na Kristu mugore. Zvakajeka kuti itusu, atiuzivi kamare mutengo wo vokuzojwa vanozoenda mugore.

14. Bhaibheri rinoti kudini ngo pamusoro po mutengo wo vokuzojwa vanozowanika pasi pano dambujiko guru rikatanga?

¹⁴ Vokuzojwa vanozowanika mu mativi mazinji pasi pano Jesu paanozoviya kuzovatora kuti aende navo mugore. Bhaibheri rinonanga kuti Jesu “anozotuma ngirozi jake; ijona ngo izwi guru no mbayapaya, jinozounganija vakasanwa vake vo mativi marongomuna o nyika, divi no divi ro mugore.” (Mt. 24:31) Matahwa anonanga kuti kunozosara cikwata cidoko pasi pano mukati mo mazuva o kupejisira. —Ap. 12:17.

15, 16. Zvicinyi zvatinodikana kuzwisisa ngo pamusoro po vo 144.000 vakakhetwa ndi Jehovha?

¹⁵ Jehovha ngaanokheta nguva yo kusana vokuzojwa. (Rom. 8:28-30) Iyena wakatanga kusana vokuzojwa Jesu paakandomuswa, zve zvinovoneka inga kuti vese mu ungano yo ciKristu yo muzana ro kutanga ro makore vainga vakazojwa. Kubvira mu zana ro kutanga ro makore mbhera pakatanga njiku jo kupejisira, uzinji wo vaya vainanga kuti vaitevera Jesu, vainga maKristu o kunyepa. Jesu wakavaezanisa no “sakuro” kana sora. (Mt. 13:24-30) Mukati mo mazuva okupejisira, Jehovha ari kuramba ecisana vaya vanozotora rutivi pa 144.000. ^[2] Asi kudari iyena akada kuvetera mbhera phedo kamare no mugumo, ndiani waizomubvunjisa? (Is. 45:9; Dan. 4:35; verenganyi VaRoma 9:11, 16.) ^[3] Tinodikana kungwarira maitiro edu inga vashandiri vaya vaka n’gun’gutaya ngo mabatire akaita tenji vaya vakatanga kushanda pa nguva yo kupejisira.​—Verenganyi Mateu 20:8-15.

¹⁶ Asipi vese vano vetero yo kwenda mugore vanotora divi ro “muranda wakagondeka no wakangwara.” (Mt. 24:45-47) Nyamasi uno, Jehovha na Jesu vari kuhisa vazinji vecishandisa vashoma, inga zvovaiita mu zana ro kutanga ro makore. Mu zana ro kutanga ro makore maKristu mashoma ndiwona akashandiswa kuti atare Matahwa o ciGiriki o ciKristu. Mukufananavo, nyamasi uno maKristu mashoma o kuzojwa ndiwona akagajwa kuti ape “bzokuha ngo nguva kwayo.”

17. Ngo magama mashoma, mungati tajijenyi pa musoro uno?

¹⁷ Zvicinyi zvatajija kubvira pa musoro uwu? Jehovha wakatema civaringo co kupa mupfupo jakasiyana—upenyu mugore kuno maJudha o kumujimu zve vetero yo kurarama pasi pano kuno gumi ro vanarume vo kumujimu. Asi vese vo zvikwata zviviri izvi kuti vapuwe mupfupo wavo ndi Jehovha, vanodikana kuzwira mutemo jimwejo zve voramba vakagondeka. Vese vanodikana kuramba vecijidodokesa. Vese vanodikana kushanda pamwepo vakabatana. Zve vese vanodikana kuvangisira kuti mu ungano murambe muno runyararo. Mugumo paunonga wecikhwedera, tese ngatirambe tecishandira Jehovha no kutevera Jesu inga mushambi umwe.