VETERO INODAKAJISA ZVAKADINI! Musiki wedu wakagondesa kuti itusu tingapona kwenda no kwenda pasi pano kamare. Vazinji vanonesehwa maningi kuzvitenda izvi. Ivona vanonanga kuti ‘inozoguma nguva yokuti tese tinozofa nokuti kufa kunoita divi ro upenyu hwedu.’ Kuveni vamweni vanotenda kuti zvinokwanisika kupona kwenda no kwenda asi kuciripi pasi pano. Ivona vanorangarira kuti mundhu angapona kwenda no kwenda akapera kufa, woenda kudenga. Munorangariravo kudini?

Ticito tadavira, ngatibhuye ngo muvhunjo mutatu iji: Tikavona manera akaitwa vandhu, zvinovonesa kuti ivona vaizopona mukuvo wakadini? Ngocapi cainga cidisiso ca Mwari kuno vandhu no nyika? Ngenyi tinofa?

Mwari wakasika zviro zvakawanda zvinopona pasi pano. Asi vandhu vanosisira maningi. Ngenyi? Bhaibheri rinonanga kuti ivandhu basi vakasikwa “ngo muezaniso” wa Mwari. (Genesi 1:26, 27) Izvi zvinoda kurevenyi? Izvi zvinoreva kuti vandhu vakasikwa no mugariro jakaezana no ja Mwari. Jakadari inga rudo no kuda urungami.

Vandhu vakasikwazve mu njira yo kuti ivona vanokwanisa kurangarira. Ivona vanokwanisa kusiyanisa zvakanaka no zvakashata. Cimwenizve, vano cido co kuda kuziva Mwari no kuva no ushamwari nayena. Izvo ngo zvinoitisa kuti tikwanise kudakajihwa patinosota kukura ko denga no nyika ino, zviro zvakasikwaro zviro zvimweni zvakadari inga muzika no poeziya. Kusiyapo zvese izvo, vandhu vanokwanisa kunamata Musiki wavo. Zvese izvi zvinovonesa kusiyana ko vandhu no zvisikwa zvimweni zva Mwari zviri pasi pano.

Amborangariranyi basi: Mwari wakatisika no mugariro jinoshamaisa, jatingakwanisa kusakurira no kuitisa nane. Kunanga kuti iyena waizoita zvese izvi kudari vandhu vaizodikana kugara mukuvo mushoma basi? Zvokadi kamare, Mwari wakatisika no mugariro jese iji no kutiita kuti tiite zviro zvinoshamaisa kuti tidakare no kupona pasi pano kwenda no kwenda.

Vamweni vanonanga kuti Mwari narini aacaida kuti vandhu vagare kwenda no kwenda pasi pano. Ivona vanotenda kuti tiri pa nyika pano ko mukuvo mushoma basi, kana kuti, Mwari ari kutieja kuti avone dangani tinofanera kuzogara nayena kumatenga kwenda no kwenda. Waro imwimwi amutendi kuti izvi no zvainga izvona Mwari ndiyena waizova no ndava ngo pamusoro po matambujiko atiri kusotanari nawo nyamasi uno? Izvo azvizwirani no mugariro jake. Bhaibheri rinonanga kudari ngo pamusoro pa Mwari: “Maitiro ake akarungama. Yena ndi Mwari wokadi-kadi, acina bzicikazivi kururama, ndiyena mururami no murungami.”—Deuteronòmio 32:4.

Bhaibheri rinonasa kujekesa zvakaita kuti Mwari asike nyika, paakati: “Denga, i denga ra Tenji Mwari; asi nyika, yena wakaipa vana va Adamu.” (Nduyo 115:16) Mwari wakasika nyika kuti uve muzi wedu wo kwenda no kwenda, ino zvese zvatinoda kuti tidakajihwe mu upenyu.—Genesi 2:8, 9.

“Denga, i denga ra Tenji Mwari; asi nyika, yena wakaipa vana va Adamu.”—Nduyo 115:16

Bhaibheri rinojekesazve zvakaita kuti Mwari asike vandhu. Iyena wakati kuno varovorani vokutanga: ‘Zajani nyika, muitonge. Muite veno vo [zvese] mu nyika yo pasi.’ (Genesi 1:28) Ivona vaizova no cidakajiso co kutaja no kuita kuti nyika yese ive Paradhiso. Zvakajeka kamare kuti, cidisiso ca Mwari cainga co kuti Adhamu, Evha no vana vavo vapone kwenda no kwenda pasi pano haiwa kudenga.

Waro, ngenyi tinofa? Bhaibheri rinovonesa kuti ngirozi imweni yakapandukira, pa kufamba ko nguva iyona yakazozivika inga Dhiyabhu, yakaeja kuphwanya nasiriro yakaita Mwari mu munda wo Edheni. Yakazviitisa kudini?

Sathana wakaita kuti Adhamu na Evha vabatane na iyena pakupandukira Mwari. Iyena wakananga kuti Mwari wainga ecivarambisa kuita zviro zvakanaka, kuziva zvakanaka no zvakashata. Ngo kudaro, ivona vakasana kugara ku divi ra Sathana kusiyapo kugara ku divi ra Mwari. Ngowapi wakava muviyo wakona? Pakufamba ko nguva ivona vakafa inga zvainga zvakananga Mwari. Ivona vakaruza mukana wo kupona kwenda no kwenda mu Paradhiso pasi pano.—Genesi 2:17; 3:1-6; 5:5.

Kupandukira kwakaitari Sathana, kuri kupsasavo itusu nyamasi uno. Bhaibheri rinoti: “Cishaishi cakanghwina mu nyika ngo ndava yo mundhu umwe basi [Adhamu], rufu hwonghwinavo ngo ndava yo cishaishi. Ngo maitiro ondhowo, rufu hwakagumira vandhu vese.” (Varoma 5:12) Cishaishi no rufu azviiti divi ro ‘urongwa’ ucikazwisisiki hwa Mwari kuitira vandhu. Takazvigara utaka kuvha ku vabari vedu vokutanga.

Kutama kuzwira ka Adhamu na Evha akuzivi kucinja cidisiso ca Mwari kuno vandhu no pasi pano. Rudo no urungami hwa Mwari wakamuita kuti aite ciri cese kuti atisujunure ku cishaishi no rufu. Mupostori Pauro wakazvisanangura kudari: “Mupocero wo cishaishi irufu, asi cipo cinovha ka Mwari, ndihwona upenyu hucikaperi ecishandisa Jesu Kristu Mambo wedu.” (Varoma 6:23) Ngo ndava yo rudo hwake, Mwari wakapa “Mwana wake [Jesu Kristu], wakabahwa ari ega, kuti vese vanomutenda vatame kuparajwa, asi vawane upenyu hucikaperi.” (Johani 3:16) Ngo mwoyo wese, Jesu wakapira upenyu hwake inga muripo kuti vandhu vakwanise kuwanazve zvese zvakaruzwa ndi Adhamu. a

Sambiri pano, cigondiso ca Mwari co kuita kuti nyika ino ive paradhiso cinozokwanirisika. Munozokwanisavo kuvona kukwanirisika ko cigondiso ici, kudari mukazwira ngo mwoyo wese magama aya a Jesu: “Nghwinanyi ngo musuvo mudoko, ngokuti musuvo wakapambhama wokura, igwanja rinoendesa kooparajwa, ndirona rinotevehwa ngo vazinji; kuveni musuvo mudoko no gwanja doko, rinoendesa ku upenyu, vashoma ngo vanoriwana.” (Mateu 7:13, 14) Kumbeji kwenyu kunofira pa zviya zvamunosana wari uno. Munozosana kuitenyi?