• Wakasanwa ndi Mwari. “Ndini ndakacenesa mambo wangu . . . ndinozokupa majinja inga ndhaka, no magumo o nyika, aite ako.”—Nduyo 2:6, 8.

• Mubarihwana wa Mambo Dhavhidhi. “Takabarihwa mwana, takapuwa mwana . . . kutonga kwake kunozoita kukuru, kunyarara akuzoperi pa dendemaro ra Davidi, no pa umambo hwake; yena anozohuvangisa.”—Isaia 9:5, 6.

• Wakabahwa ku Bheterehema. “Betrehema . . . , mouri munozobuda wiya anozotonga . . . Anozoita mukuru mbhera ku magumo o nyika.”—MIKEYA 5:1, 3.

• Wakashohwa no kuuraiwa. “Wakaxohwa, apana waimutaja. . . . Wakabaiwa ngo ndava yo kuposa kwedu, wakakwiiwa ngo ndava yo bzixaixi bzedu.”—Isaia 53:3, 5.

• Wakamuswa no Kukujwa. “Ngokuti aazondisii mu iba, amuzoregi kuti mutendi wenyu avore! . . . ngo kudakara, ndikagara nemwi ndinozobusa mbhera narini.”—Nduyo 16:10, 11.

Mu ndhorondho yese yo upenyu wo vandhu, Jesu ndiyena basi anokwanirisa kuva Mutongi wakanaka. Kusiapo izvo, ngirozi yakavhunja Mariya mai wa Jesu kuti: “Tenji Mwari anozomupa dendemaro ro Umambo hwa baba wake Davidi . . . umambo hwake ahuzoperi.”—Luka 1:31-33.

Jesu aazivi kuva Mambo pasi pano. Iyena anozotonga vandhu naari kudenga, inga Mambo wo Umambo hwa Mwari. Ngenyi Jesu ndi Mutongi wakanaka? Vonanyi zvaakaita paainga pasi pano.

•   Jesu waineseka ngo vandhu. Jesu waibesera vese, vanarume, vanakaji, majaha no vasikane, vasharuka, vakhupuki no varombo. Iyena waitaja ushoni vese acikasoti kuti mundhuwo wainga ani kana waivha kwapi. (Mateu 9:36; Marco 10:16) Nyamapere umweni wakakumbira Jesu kuti: “Kudari mecida, mungandirapa,” Jesu wakamuzwira unyasha womurapa.—Marco 1:40-42.

• Jesu wakatijijisa zvatingaita kuti tidakajise Mwari. Iyena wakati: “Amukwanisi kubatira Marure pamwepo no upfumi.” Iyena wakativangisa kuti titaje vamweni ngo manera atinoda kutajwavo. Kusiapo izvo, Jesu wakatatija kuti Mwari anodakarira zvatinoita. Mwari anoziva zvatinorangarira no zvatinozwa. Ngo kudaro, kuti tidakajise Mwari, tinodikana kusotesesa zvatinorangarira. (Mateu 5:28; 6:24; 7:12) Jesu wakatijijisa kuti kudari tecida kuva takadakara, tinodikana kuziva zvinoda Mwari perapo tomuzwira.—Luka 11:28.

• Jesu wakakhombija rudo ngo magama no zviito. Magama a Jesu no zviito zvake zvainga no simba guru zve zvaibaya mwoyo jo vandhu vaimupurukira. “Vandhu vazinji vakakahamara ngo majijisiro ake; ngokuti wakavajijisa inga mune wo mazwi.” (Mateu 7:28, 29) Jesu wakati: “Disanyi vakorore venyu.” Jesu wakaguma pakuita mukumbiro kuti Jehovha aregerere vandhu vaida kumuuraya paakati: “Baba! vakungurirenyi ngokuti avabzizivi bzo vanoita.”—Mateu 5:44; Luka 23:34.

Jesu ndiyena anofanera kutonga nyika yese, ngokuti ano unyasha zve anoneseka ngo vandhu. Asi anozotanga kutonga rini pasi pano?