Haiwa, atizivi kutemehwa nguva yedu yokufa. Kunja kokubesera zvinotendhwa ngo vamweni zvo kuti mundhu ano nguva yake yokufa, Bhaibheri rinonanga kuti rufu kazinji kakona rinoitika ‘ricikavetehwi.’—Mucumaeri 9:11 Shanduro Yenyika Itsva.

Hino ngenyi Bhaibheri rinonanga kuti kuno “mukuvo wo kufa”?

 Hina, pana Mucumaeri 3:2 panonanga kuti “kuno mukuvo wo kubahwa no mukuvo wo kufa; mukuvo wo kusima, no mukuvo wo kubvita muti wakasimwa.” (King James Version) Asi, zviri kurehwa pa vhesi iyi zvinovonesa kuti Bhaibheri riri kunangira ngo pamusoro po nda-nda-nda yo zviitiko zvinowanika mukurarama. (Mucumaeri 3:1-8) Inga zvaakaitira murimi uwo waacizivi kuvangirija kuti aimire nguva imwe basi yokusima, Mwari aazivi kugaja nguva inofa mundhu. Kusiapo izvi, itusu tinodikana kungwarira kuti ticanghwinira mu shwiro jo nyika jingatiita kuti titame kuzwira Musiki wedu.​—Mucumaeri 3:11; 12:1, 13.

Tingakwanisa kuva no upenyu wakareba

 Pikija hazvo upenyu auzivi kujiviririka, tingararama ko nguva yakareba kudari tikatema zvivaringo ngo ungwaru. Bhaibheri rinoti: “Majijisiro o muzivi, cinyuke co uhomi, kuda kureesa murau yo rufu.” (Mazwi Akangwara 13:14) Ngo iyo ndava Mosi wakabvunja VaIziraeri kuti ‘njiku javo jaizowanda’ kudari vakazwira mupango ja Mwari. (Deuteronòmio 6:2) Mukusiana, itusu tingafupisa upenyu hwedu ngo zviro zvakashata zve zvoupenji.—Mucumaeri 7:17.

 Pikija hazvo tecinasa kungwarira upenyu hwedu, atingazombotizizve rufu. (VaRoma 5:12) Asi, mugariro uwu unozocinja, Bhaibheri rinogondesa kuti kucazoguma mukuvo wo kuti “akucazovi no kufa.”—Apokaripsi 21:4.