Sin feel daile wat måkt ware koine, taum oos helpe wen air laiw mësch doodblijwt. Wek fon dës daile sin beeter as andrer. Dat is soo weegen, soo as wij al saie häwe, jërer mësch hät sin moor taum dai waidåg forneeme. Den dat wat gaud is taum air mësch, kan öftens ni soo gaud sin tau anerd mësch.

Åwer wek for dës daile häwe al feel lüür hulpe. Sin daile wat dai dokters un uutstudijrte lüür säge daue wat t’hoopstime daue mit dai wårhëten un inlëren wat wij fijne daue ine Bijbel, air bauk fon früüer heer, åwer woo in wij klaukhët fijne.

• Wek dokters un uutgelërte lüür maine dat dit is air fon dai haupte daile wat måkt ware koine taum sich drëge mit dai truuren. Åwer kan sin wilst duu ni mank andrer lüür sin, un sogår dij argre däist mit dai wat dij helpe wile. Feel daue sich uk soo forneeme.

• Denk ni dat’s duu ümer mank feel lüür must sin, åwer blijw ni ümer alaine weegen kan sin dat’s duu hülp bruukst. Säg tau eer wat’s duu bruuke däist un wat’s duu ni bruukt’s, åwer dau dat säge mit gaurigkët.

• Denk an woo duu dij forneeme däist, un dau uutsuike wofeel tijd duu alaine blijwe wilst un wofeel tijd wilst duu mank andrer lüür sin.

WAT DAI BIJBEL SÄGT: “Beeter twai as air . . . Weegen wen air fale däit, dai anerd kan em upståe helpe.” (Eclesiastes 4:9 un 10)

• Gaud eete helpt dij sër mit taum dij drëge forståe mit dai truuren. Forsuik feel sort fruchtäpel, gruinweesend eete un dau ni daile eete wat sër fetig sin.

• Dau feel wåter drinke un andrer daile wat gaud sin tau dij.

• Wen’s duu ni eete wilst, dau bits eete feel mål up dåg. Duu kast uk dijn dokter säge dat hai dij säge däit wat’s duu eete must urer wen’s duu wat inneeme must taum dijn gesundhët beeter ware. a

• Duu kast dij beeter forneeme wen’s duu rasch gåe däist urer soo wat måke däist taum dij körper beweege. Soo måke, kan dij helpe denke an dat wat passijrt is urer bits anhule dår andenke.

WAT DAI BIJBEL SÄGT: “Ni air kërl hät sijne aigen körper hasst, åwer däit der ernääre un uppasse.” (Efésios 5:29)

• Wij ale bruuke slåpe, un dai wat truure daue bruuke dat nog mër weegen wen dai mësch traurig is, dat kan måke dat dai sich muirer forneeme däit.

• Dau ni taufeel kafe drinke un dau ni taufeel drinke weegen dat kan dijn slåp forstööre.

WAT DAI BIJBEL SÄGT: “Is feel beeter ain handful uutroogen as twai häinful swår arbëd un hijner wind loope.” (Eclesiastes 4:6)

• Tau jërer mësch is dat traurigkët aners. Duu must ruuterfijne wat beeter for dij is.

• Feel daue sich beeter befijne wen sai oiwer een traurigkët fortele daue taum anerd mësch, åwer wek mage ni gërn dåroiwer fortele. Dai uutstudijrte lüür daue ni dai neemlig daile maine oiwer woo gaud as dat is taum anerd mësch fortele oiwer dat truuren. Wen’s duu fortele bruukst oiwer dat wat’s duu forneeme däist, un mainst dat dat ni licht is, duu kast im langsåm anfänge fortele mit air woo’s duu dij upforlåte däist.

• Wek forneeme dat nå dat sai hüüle daue, daue sai sich beeter befijne, åwer andrer lijkerst, dat sai ni sodul hüült häwe, häwe sich uk drëgt kreege mit dem waidåg.

WAT DAI BIJBEL SÄGT: “Jërer ainsig wät wat biter is im sijne härts.” (Provérbios 14:10)

• Taum sich beeter befijne, wek lüür daue taufeel drinke, daue melicin inneeme urer sogår drogas benutse. Åwer dat måke däit bloos dai mësch schåre. In dere stuun däit der mësch sich bits beeter befijne, åwer denåste däit dat nog slimer ware. Is beeter daile måke wat dij helpe daue un uk dij ni denåste schåre daue.

WAT DAI BIJBEL SÄGT: “Dat wij oos rëgen låte fon al daile wat oos . . . drekig mökt.” (2 Coríntios 7:1)

• Dau anneeme dat’s duu öftens dij traurig befijne däist, åwer dau dij uk tijd neeme taum daile måke wat dij helpe daue sich beeter befijne. Feel häwe al saie dat dat gaud is.

• T’hoop sin mit dai wat dij lijbe, andrer lüür kene, ain nijg dail lëre måke urer sich bits tijd fordrijwe kan dij helpe sich beeter forneeme.

• Mite tijd kan dat aners ware, duu däist dij forhåle fon dai traurigkët, un dai waidåg wart wënige.

WAT DAI BIJBEL SÄGT: “Tau ales is ain richtig tijd . . . Tijd taum hüülen un tijd taum lachen. Tijd taum klågen un tijd taum dansen.” (Eclesiastes 3:1 un 4)

• Wen’s duu dij beeter befijne däist, måk werer dai daile wat’s duu airer måke däirst.

• Dau soo feel slåpe as duu bruukst un dau uk andrer daile måke soo as arbëre. Dat kan dij helpe forneeme dat dij leewend werer gaud kan sin.

• Feel taum dauen häwe, däit helpe dat dijn waidåg wëniger wart.

WAT DAI BIJBEL SÄGT: “Däit ni sodul andenke an dai dågs fon sijn leewend wat rasch forbijgåe däit, weegen dai wår God däit em sij härts ful lustigkët måke.” (Eclesiastes 5:20)

• Feel lüür wat uutsuiken måkt häwe glijk nå dat dai mësch wat sai lijbe doodbleewe is, dat hät eer nåheer lëd dåe.

• Wen mööglig is, dau bits luure airer as uutsuike of’s duu wegtreke däist, anerd arbëd suike däist urer wen’s duu dai daile fon dai mësch wat doodbleewe is weggiwst urer dai wegsmijte däist.

WAT DAI BIJBEL SÄGT: “Dem wirtschaftige mësch sij uutdenken, däit wat gaures ruutergeewe, åwer dai wat nischt uutdenke ware arm.” (Provérbios 21:5)

• Feel maine gaud is daile måke wat eer helpe daue an dai mësch denke wat doodbleewe is.

• Air dail wat’s duu måke kast, is srijwe ine heft dat wat’s duu beleewt häst mit dem mësche taum dat ni forgeete. Duu kast uk bijler un andrer daile forwåre.

• Dau daile forwåre wat dij helpe daue ümer an der mësch denke un ain tijd nåheer, wen’s duu dat måkt krijgst, dau na dës daile kijke.

WAT DAI BIJBEL SÄGT: “Denk an dai früüsche tijd.” (Deuteronômio 32:7)

• Denk ais an air bits rëse, andrer stele kene, air bits uutwanke.

• Wen’s duu ni taufeel dåg wegblijwe kast fon dijne arbëd, dau aine urer twai dåg ruuterneeme taum ruutergåe mit dai lüür spatsijre un uk upe praia gåe.

• Wen’s duu air bits tijd ruuterneeme däist taum andrer daile måke, den däist duu dij al beeter forneeme.

WAT DAI BIJBEL SÄGT: “Daut mit mij mitkåme, up ain apart stel taum oos air bits uutrooge.” (Marcos 6:31)

• Wen’s duu tijd ruuterneeme däist taum dai andrer mithelpe, dat däit dij uk mithelpe.

• Duu kast uk andrer mithelpe wat truure daue weegen dai mësch wat doodbleewe is. Kan sin dat dai womit duu ümgang häst un uk dijn fründe, fortele bruuke mit air mësch wat dat neemlig doirsete däit as sai.

• Andrer helpe un trööste kan dij helpe sich beeter befijne un den däist duu forneeme dat’s duu wërd häst. Kan sin dat’s duu dit bruuke däist.

WAT DAI BIJBEL SÄGT: “Is mër fruir im geewen, as im krijgen.” (Atos 20:35)

• Wen air laiw mësch doodblijwe däit, duu kast saie wat wirklig wërd hät ine leewend.

• Dau dës tijd ruuterneeme taum andenken wosoo as duu leewe däist.

• Wen nöörg is, måk dij leewend aners taum saie wat mëre wërd hät in dij leewend.

WAT DAI BIJBEL SÄGT: “Is beeter gåe in ain huus woo truuren is as gåe in ain huus woo fest is, weegen dai dood is dai ën fon dai ganse lüür, un wee leewe däit mut hijr andenke.” (Eclesiastes 7:2)

 Is wår, dår is nischt wat dijn waidåg gans un går wegbringt. Åwer feel wat truure daue häwe trööst kreege dat sai wek daile måkt häwe wat hijr båwen ståe. Hijr in stäit ni ales wat wij måke koine taum oos waidåg afneeme wen air lijb mësch doodblijwt. Åwer wen’s duu wek daile fon dës måke däist, kan sin duu däist dij beeter forneeme.