Ji mër as wij aim mësche sijn moors kenelëre, ji mër daue wij der kene. Den oos ümgang mit dem wart stärker. Soo uk, ji mër as wij God sijn moors kenelëre, ji mër daue wij em kene un oos ümgang mit em stärker. God hät feel gaure moors, åwer 4 fon dai sin dai oiwerste: sijn kraft, sijn klaukhët, sijn gerechtigkët un sij lijb.

“Ach, Oiwerst Her Jehovaa! Duu häst der himel un dai Ër måkt mit dijne groote kraft.” (JEREMIAS 32:17)

Ales wat God måkt hät däit wijse dat hai sër feel kraft hät. Denk man’s wen’s duu an aine haite dag uuner bloore himel büst. Wat fornimst duu? Dat dai sün hite däit. Un duu däist uk forneeme air bits fon dai kraft wat God benutst hät taum ales måke. Dai uutgelërte maine dat inwarts dai sün is 15 miljone graus Celsius hait. In jërer sekund, fon dai sün kümt ruuter ain sër stark kraft, wat soo is as dai kraft fon feel miljone fon dai stärkst bumb wen dai upplatse däit.

Åwer dai sün is ni soo groot as sër feel andrer stërne wat am himel sin. Soo as dai stërn wat UY Scuti hit, ain fon dai grötst wat giwt. Dai uutgelërte maine dat dai is 1.700 måls gröter as dai sün. Wen dës stërn in dai sün sijn stel wäir, dai Ër un  dai planëte wat Marte un Júpiter haite, däire in dës stërn in blijwe. Dat kan oos helpe beeter forståe wat Jeremias säge wul as hai sägt hät dat Jehovaa God, mit sijn kraft, hät der himel un dai Ër måkt.

Woo helpt oos God sijn kraft mit? Taum leewen wij bruuke dai gaure daile wat God måkt hät, soo as dai sün un dai gaure daile wat fone Ër kåme daue. God däit uk em sijn kraft benutse taum jërer ainsig helpe. Wosoo? As Jësus upe Ër wääst is, God hät em kraft geewt taum bewunrige daile måke. Dai Bijbel sägt: “Dai bline koine nuu saie, dai låme daue gåe, dai wat lepra häwe ware rëgen, dai doofe daue hööre, dai doore ware upleewt.” (Mateus 11:5) Wat mökt God nuu tau oos? Dai Bijbel däit wijse dat “hai giwt kraft tau dem wat muir is”. Ine Bijbel stäit uk: “Dai wat up Jehovaa luure krijge werer kraft.” (Isaías 40:29 un 31) God kan oos geewe dai kraft wat wij ni häwe taum oos helpe dai slimhëte doirsete. (2 Coríntios 4:7) Gans sicher is doch sër gaud ümgang mit soo’n lijb God häwe wat sijn kraft benutst taum oos helpe, is ni wår?

“Woo feel daile häst duu måkt, ach Jehovaa! Häst ale dai måkt mit klaukhët.” (SALMO 104:24)

Ji mër as wij lëre oiwer dai daile wat God måkt hät, ji mër daue wij oos bewunre mit em sijn klaukhët. Dai uutgelërte daue dat wat Jehovaa måkt hät studijre taum dat nåmåke in dai daile wat sai måke wile. Sai daue dat wat Jehovaa måkt hät nåmåke taum tüüg un sogår luftschife måke. Dat wart nent biomimética.

Air dail wat mëst God sijn klaukhët wijst, is soo’s oos körper måkt woore is. Dau ais denke an wosoo air klairkind in der mama sijn buuk wasse däit. Ales fängt an mit 2 klain células, ain fon dai papa un ain fon dai mama. Den, in dai richtig tijd fon dës 2 células, kümt dai breege, dai knåken un dat blaud fon dem klairkind. 9 månats nåheer is air klair net kind trecht taum geboore ware. Dai klaukhët wat hijr taubruukt, mökt dat feel lüür soo denke as dai wat Salmo 139:14 sreewe hät: “Ik dau dij låwe weegen ik bün up ain sër fain årt måkt woore, wat taum bewunren is.”

Wosoo helpt God sijn klaukhët oos mit? Dai wat oos måkt hät wät wat wij bruuke taum fröölig sin. Un mit sijn groot klaukhët, hai däit oos formåne doir sij Woord. Dai Bijbel däit oos formåne: “Daut juuch ümer wijrer . . . air der ande forgeewe.” (Colossenses 3:13) Is dat air gaur formånen? Gans sicher! Dai dokters häwe al ruuterfuune wen wij forgeewe, koine wij beeter slåpe, dat blaud löpt langsåmer in dai ådrer, häwe wij kain depressão un dai gesundhët wart beeter. God is soo as air klauk mësch wat sich sër ankërt mit oos un däit oos ümer gaur formånen geewe. (2 Timóteo 3:16 un 17) Gans sicher wilst duu ümgang mit soo’n mësche häwe.

“Dai gerechtigkët gefült Jehovaa sër.” (SALMO 37:28)

God mökt ümer wat richtig is. Dai Bijbel sägt: “Dai wår God däir nij ais måke wat slecht is, un Dai wat al kraft hät däir nij ais måke wat forkërd is!” (Jó 34:10) Jehovaa gericht ümer mit gerechtigkët. Dårweegen, stäit in dem Salmo 67:4: “Duu däist dat folk mit gerechtigkët gerichte.” Dai falsche lüür koine ni Jehovaa belaige, weegen hai süüt wat sai im härts häwe. (1 Samuel 16:7) Jehovaa däit ümer waite wee richtig un wee forkërd is, dårweegen däit hai ümer richtig gerichte. God süüt al ungerechtigkët un slechtigkët upm wild un hät forspråke, dat bald, “dai slechte ware fon dai ër uutrot”. (Provérbios 2:22)

Åwer Jehovaa däit oos ni streng gerichte un däit oos ni stråfe. Wen oos dai süün lëd däit, hai däit dai forgeewe. Dai Bijbel sägt dat hai “is barmhärtsig un hät beduurnis” sogår mit dai slechte lüür, wen dai süün eer lëd däit. Dat is wirklig gerechtigkët, mainst duu ni? (Salmo 103:8 un 2 Pedro 3:9)

Wosoo helpt God sijn gerechtigkët oos mit? God däit ale oiwerain reekne. Dårweegen, sijn gerechtigkët kan oos sër helpe. Dai apostel Pedro hät soo sägt: “Dat God ale oiwerain reekne däit, åwer in al folk, hai nimt an der wat angst hät em ni gefale un mökt wat richtig is.” (Atos 10:34 un 35) Dat bedüürt, hät nischt sägen oos rass, oos land, wolang wij ine schaul lërt häwe, of wij arm urer rijk sin, wij ale koine gaure ümgang mit God häwe.

God wil dat jërer ainsig fon oos forståe däit dat hai ales mit gerechtigkët mökt un dat dat is gaud tau oos. Dårweegen, hät hai oos forstand geewt. Dai Bijbel sägt dat dai forstand is soo as ain lei wat insreewe is in’t härts un wat tüüge geewe däit. Dat bedüürt dat wij doir oose forstand waite wat richtig un forkërd is. (Romanos 2:15) Woo helpt oos dai forstand? Wen wij oose forstand gaud inlëre  daue, dai kan oos helpe dai slechte daile besijdlåte un nischt slechtes måke, un wen wij wat forkërdes måke dat däit oos lëd un helpt oos dai daile wat wij måke in’t raich bringe. Wen wij God sijn gerechtigkët forståe daue dat däit oos helpe un däit oose ümgang mit em stärke!

“God is lijb.” (1 JOÃO 4:8)

God hät macht, dårweegen kan hai ales måke un ales wat hai mökt wijst sijn klaukhët un gerechtigkët. Åwer ine Bijbel stäit God is lijb. Den, ales wat hai mökt is weegen dem lijb.

Doir dat lijb, Jehovaa hät dai lüür upe Ër un uk dai ängels im himel måkt. God däit dai lijbe un uppasse. Jehovaa hät dat ni måkt weegen dat hai wat bruuke däir. Weegen dat lijb, hai hät uk dai Ër måkt dat dai lüür ain gaur stel häwe küüne taum leewen. God däit bijblijwe lijb wijse tau al dai lüür. Wosoo? Hai mökt dat dai “sün oiwer dai slechte un gaure lüür upkåme däit un hai löt oiwer dai gerechte un ungerechte reegne”. (Mateus 5:45)

Jehovaa ‘hät uk groot beduurnis un is barmhärtsig’. (Tiago 5:11) Hai däit ale lijbe wat sich anstrenge taum em kene un taum gaure ümgang mit em häwe. God passt jërer mësche up, un gans sicher ‘hai passt dij’ uk up. (1 Pedro 5:7)

Wosoo helpt God sij lijb oos mit? Denk man’s woo gaud is saie wen dai sün uunergäit un woo schöön is hööre wen air klairkind lache däit. Un is sër gaud forneeme dat oos familg oos lijbe däit. Bruuke wij dës daile taum leewen? Në. Åwer dës daile låte oos frööliger.

Åwer God wijst sij lijb doir anerd dail: dat gebeed. Dai Bijbel sägt: “Daut ni unruig ware weegen irgends air dail, åwer in ales, doir beeren un biren, t’hoop mit danken, måkt tau God bekand ales wat jij wile.” God is soo as air lijblig Fåter un hai wil dat wij em sijn hülp forlange dat wij oos drëgen forståe mit oos kopbreeken, sogår dai wat wij tau kaim fortele daue. Wen wij dat soo måke, Jehovaa doir sij groot lijb, sägt oos dat hai oos sijne freere giwt “wat oiwer al forståen is”. (Filipenses 4:6 un 7)

Wij wile sër gërn dat dit kord uutdüüren oiwer God sijn oiwerste moors, soo as sijn kraft, klaukhët, gerechtigkët un lijb, dij helpt forståe woo God beschafe is. Anerd dail wat dij helpe kan God beeter kenelëre is waite wat God al for dij måkt hät un wat hai nog måke däit. Wiman’s nuu dat saie.