Ik bün geboore in Londres, Inglaterra, un ik bün uptrekt woore in Paddington, ain stel woo feel lüür wåne däire. Ik däir wåne mit mijn mama un mijn 3 swesters wat üler wäire. Mij papa is oft fon t’huus weggåe weegen hai däir feel drinke.

As ik klain wäir mijn mama hät mij inlërt dat ik müst jërer åwend beere. Ik har ain klain Bijbel woo bloos dai Salmos in stüün. Ik däir mij uutdenke wosoo dat küün sunge ware. Ais häw ik wat leest in aim bauk wat mij ni uutm kop ruutergåe is: “Aine dag däit dai morgen ni mër kåme.” Ik häw dai gans nacht doir dacht oiwer dai tijd foiruut un häw ni slåpe. Ik däir denke: “Wat hät dat leewend up sich? Kan ni sin dat bloos dit dat ales is. Ik wul ni doodblijwe!”

Ik häw anfånge mij anhule an spiritismus, ik däir forsuike mit dai doore fortele, ik däir uk dai kirchhofe besuike mit dai wat mit mij t’hoop lëre däire ine schaul. Un wij däire t’hoop sreklig videos kijke, wij däire maine dat wäir wat faines, åwer dat wäir uk taum beängsten.

As ik bloos 10 jår uld wäir, häw ik anfånge an forkërd leewe, dun häw ik anfånge ane rooken un häw mij dat sër anwent, dat is nog slechter woore, ik häw anfånge an maconha rooke. Dat ik 11 jår uld wäir, ik häw anfånge an drinken. Dat gedränk däir går ni soo gaud smäke, åwer ik wöör gërn besåpe. Ik däir uk gërn musiks hööre un danse, dårweegen wen ik küün, güng ik gërn upt feste un stele taum dansen. Ik güng åwends weg un kaim na huus wen dat bijnå dag wäir, ik däir dit ales haimlig måke. Dårweegen, dat ik sër muir ware däir, wekmåls güng ik ni nåne schaul. Un wen ik hengüng nane schaul, wen dai stuun wäir taum uutrooge, däir ik drinke.

Mij lätst jår ine schaul is sër slecht wääst. Mëst ümer mijn mama däir ni waite dai dumhët wat ik måke däir. Dun dat sai waiten kreege hät dat ik ni gaud lërt har ine schaul, is sai sër traurig un wüütend woore oiwer mij, dun häwe wij oos streere un ik bün uutreete fon t’huus. Ain tijd lang häw ik t’hoop wånt mit mijn bruudman, Tony wäir rastafári, dai däir steele un däir drogen forkööpe, hai wäir uk bekand soo as air sër gewaldig mësch. Kord tijd nåheer, däir ik air kind luure, un as ik bloos 16 jåre uld wäir is mij kind geboore.

Airst mål dat ik fortelt häw mit Jehovaas Tüügen wäir ik up ain stel woo dai mamas åne frijgen blijwe küüne. Ik häw ain stel dår kreege doir hülp fone regirung. Twai fruuges wat Jehovaas Tüügen wäire, däire dår ümer andrer mamas besuike. Aine dag häw ik uk mit Jehovaas Tüügen fortelt, ik wul wijse dat sai forkërd wäire. Åwer, mit feel geduld, häwe sai al mijn frågen antwoort un häwe weese wat dai Bijbel sägt. Sai wäire soo gaud un lijb, dat hät mij härts anstöt. Dun, häw ik annåme dai Bijbel mit eer lëre.

Glijk häw ik air dail ine Bijbel lërt wat mij leewend gans un går aners måkt hät. Fon klain an, har ik angst fom dood. Åwer, in dat lëren häw ik ruuterkreege dat aine dag air upleewen fom dood geewe däit! (João 5:28 un 29) Ik häw uk lërt dat God sich wirklig bekümre däir oiwer mij. (1 Pedro 5:7) Air spruch wat mij sër hulpe hät is Jeremias 29:11, wat sägt: “‘Weegen ik wait sër gaud wat ik ine gedanke tau juuch häw’, sägt Jehovaa. ‘Ik wil dat jij freere häwe, ni unglük. Ik wil tau juuch geewe ain gaur tijd wat nog kümt un ain hofnung.’” Soo häw ik anfånge glööwe dat ik kan aine dag up ümer leewe im paradijs hijr upe ër. (Salmo 37:29)

Jehovaas Tüügen häwe weese dat sai mij wirklig lijbe däire. Airst mål dat ik up ain kristlig forsamlung gåe bün, dat hät mij sër gefale, weegen ale wäire sër fründlig un däire ale gaud upneeme! (João 13:34 un 35) Dat wäir gans aners as in ain kirch woo ik hen wääst wäir. Jehovaas Tüügen häwe mij sër gaud upnåme bij al dem dat ik forkërd leewe däir. Sai däire sich tijd ruuterneeme un däire sich mit mij bekümre mit lijb, un sai däire mij uk helpe mit mijn swårhëte. Ik däir forneeme as wen ik tauhööre däir tau ain groot familg.

In mij lëren fone Bijbel häw ik saie dat ik müst gans aners ware taum God gefale. Soo as, air dail wat ni licht wääst is, wäir anhulen an rooken. Ik häw uk saie dat wek musiks wat ik hööre däir, däir mijn wünsch grööter måke taum maconha rooke. Soo häw ik anhule an dai musiks hööre. Dat ik ni mër drinke wul, häw anhule up feste gåe un stele taum dansen, woo dat licht wäir taum wat drinke. Un nog, ik häw ümgang måkt mit lüür wat mij helpe däire aners ware in mij leewend. (Provérbios 13:20)

In dës tijd, Tony däir uk dai Bijbel lëre mit Jehovaas Tüügen. Dat sai Tony sijn frågen antwoore däire, wäir hai sich ümer sicher dat hai dai wårhët lëre däir. Hai is uk sër aners woore in sij leewend: hai hät kaine ümgang mër hat mit gewaldig lüür, hai hät uk anhule an steelen un maconha rooke. Wij bëd häwe saie wen wij Jehovaa gefale wule un oos kind sicherhët geewe, küüne wij ni bloos t’hoop leewe. Dun, in 1982 häwe wij frijgt.

Ik dau mij denke dat ik feel upsuiken måke däir in dai dün buiker Wat Bekandmökt (A Sentinela) un Wåkt Up! (Despertai!) *. Ik däir geschichte leese fon dai lüür wat aners woore sin soo as ik ware wul. Wat sai måkt hare däir mij groot lust geewe! Dës geschichte däire mij helpe foirwärtsgåe un ni nålåte. Ik bün uk ümer bijbleewe beere dat Jehovaa mij ni forlåte däir. Soo, in juli jår 1982, häwe ik un Tony oos tauwe låte soo as Jehovaas Tüügen.

Aine groote ümgang häwe mit Jehovaa hät mij leewend rert. Ik un Tony häwe fornåme dat Jehovaa oos helpe däir as wij swårhëte doirset häwe. Wij häwe lërt an Jehovaa glööwe wen uk swårhëte wäire. Un häwe saie dat Jehovaa oos familg hulpe un uppasst hät. (Salmo 55:22)

Wij häwe uk dai groot frööligkët hat dat wij häwe küüt oos jong un oos määke helpe Jehovaa kenelëre. Nuu uk saie dat oos enkelskiner oiwer Jehovaa lëre, daue oos sër frööge.

Nuu kan ik gaud slåpe weegen ik dau mij kair kopbreeken mër måke oiwer dai tijd wat nog kümt un oiwer der dood. Un nuu dau ik un Tony nå andrer gemainde fon Jehovaas Tüügen henrëse taum dai bruirers un swesters koråsch geewe. Den, wij ale t’hoop daue andrer lüür inlëre, wen sai uk gloobe häwe an Jësus, koine sai uk up ümer leewe.