Moshitopolwa sha tetekele otwa tala kombinga yendhindhiliko ndyoka Jesus a gandja. Endhindhiliko ndyoka otali ulike kutya Uukwaniilwa waKalunga owa dhikwa po megulu, na Jesus Kristus oye Omukwaniilwa gwawo.

Ombiimbeli otayi ti kutya sho Jesus a li ta ka tameka okupangela, okwa li te ku umba mo Satana noompwidhuli dhe megulu. Ngashingeyi otaya tyakaleke kombanda yevi, nomolwaasho iinima iiwinayi mbyoka tayi ningwa kombanda yevi ya nayipala noonkondo okuza mo 1914. — Ehololo 12:7, 9.

Nonando oonkalo muuyuni otadhi nayipala, Jesus, e li Omukwaniilwa gwUukwaniilwa waKalunga, okwa ninga iinima yi ili noyi ili a kwathele aantu kombanda yevi. Molwaashono aantu muuyuni awuhe ohaya longwa kombinga yOmbiimbeli, iilonga mbyoka ya hunganekwa kuJesus, oyendji otayi ilongo okutula omakotampango gOmbiimbeli miilonga esiku kehe. (Jesaja 2:2-4) Aantu omamiliyona oyi ilonga okukala ye na etaloko li li pandjele li na ko nasha niilonga, okuhwepopaleka onkalamwenyo yawo momagumbo nokulongitha nawa iinima yopamaliko, ihe hayo yi na okukala ya simanenena kuyo. Aantu mboka otayi ilongo nkene ye na okuhwepopaleka onkalamwenyo yawo ngashingeyi nokuninga aantu mboka Kalunga a hala ya ka kale aalelwa mUukwaniilwa we.

Nonando Jesus ota pangele nale megulu, omapangelo gopantu ogo taga pangele kombanda yevi. Ihe nonando ongawo, Kalunga okwa lombwele Jesus ‘a pangele mokati kaatondi ye.’ (Episalomi 110:2) Masiku, Jesus ota ka hanagula po thiluthilu aapataneki ayehe nota ka etela aantu mboka haya vulika kuKalunga epepelelo.

Pethimbo ndyoka, Uukwaniilwa waKalunga otawu ka katuka onkatu wu

• Hanagule po omalongelokalunga giifundja. Omalongelokalunga ngoka ga kala nokulonga iifundja kombinga yaKalunga noga ningitha onkalamwenyo yaantu ondhigu, itaga ka kala po we. Ombiimbeli otayi popi kutya omalongelokalunga giifundja oga fa ohonda. Ehanagulo lyayo otali ka halutha oyendji. — Ehololo 17:15, 16.

• Hulithe po omapangelo gopantu. Uukwaniilwa waKalunga otawu ka katuka onkatu wu hanagule po omapangelo agehe gopantu. — Ehololo 19:15, 17, 18.

• Hanagule po aakolokoshi. Ongiini kombinga yaamboka ya tokola okukala haya ningi iinima iiwinayi nohaya tindi okuvulika kuKalunga? “Aakaanakalunga otaa ka kombwa mo moshilongo.” — Omayeletumbulo 2:22.

• Mange Satana noompwidhuli dhe. Satana noompwidhuli dhe itaya ka vula we “okupukitha aantu.” — Ehololo 20:3, 10.

Shika otashi ka tya shike kaantu mboka haya vulika kUukwaniilwa waKalunga?

Sho Jesus ta pangele e li Omukwaniilwa megulu, ota ka gwanithila po aantu iinima oyindji e vule aapangeli ayehe yopantu. Ota ka kwathelwa kaapangeli pamwe naye 144 000, mboka ya hogololwa okuza maantu yokombanda yevi. (Ehololo 5:9, 10; 14:1, 3) Ota ka shilipaleka kutya ehalo lyaKalunga otali gwanithwa po kombanda yevi. Uukwaniilwa waKalunga otawu ka ningila shike aantu kombanda yevi?

• Otawu ka hulitha po omikithi, uukulupe neso. “Kape na nando ogumwe . . . ta ka tya: ‘Otandi ehama’” “noitaku ka kala we eso.” — Jesaja 33:24; Ehololo 21:4.

• Otawu ke etela aantu ombili yashili negameno. “Kehe gumwe ota ka kala nombili mokati komiviinu nomikwiyu dhe, nokape na ngoka te mu halutha we.” — Jesaja 54:13; Mika 4:4.

• Otawu ka pa aantu iilonga iiwanawa. “Aahogololwa yandje otaa ka kala ko olule nokunyanyukilwa iilonga yiikaha yawo yene. Itaa ki ihepeka owala.” — Jesaja 65:22, 23.

• Otawu ka kandula po uupyakadhi womudhingoloko. “Ombuga nomalondo otaga ka nyanyukwa, ontale otayi ka tundulukwa nokutemuna oongala.” — Jesaja 35:1.

• Otawu ka longa aantu shoka ye na okuninga, opo ya ka kale nomwenyo sigo aluhe. ‘Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, otaya ka mona omwenyo gwaaluhe.’ — Johannes 17:3, yelekanitha NW.

Kalunga okwa hala wu ka mone omayambeko ngoka. (Jesaja 48:18) Oshitopolwa tashi landula otashi yelitha shoka to vulu okuninga ngashingeyi, opo wu ka kale oshitopolwa shonakuyiwa ndjika ombwanawa.