LUZIA OHA TINA KOKUGULU KWE KWOKOLUMOHO. Sho a li okanona, okwa kwatelwe komukithi gwomukwawu gwedhina poliomyelitis, ngoka hagu yonagula omithipa molutu. Sho Luzia e na oomvula 16, okwa li ha longele omukulukadhi gumwe nokwa li e mu lombwele a ti: “Kalunga okwe ku geele nuuvu wombanda molwaashoka kwa li ho vulika kunyoko nowa tseya.” Konima yoomvula Luzia oha dhimbulukwa natango nkene oohapu ndhoka dha li dhe mu uvitha nayi.

SHO DAMARIS U UVU KUTYA OKU NA OKAANKELA YOKUULUYI, he okwe mu pula a ti: “Owa ningi shike opo shono shi ku ningilwe? Owu na okukala wa ninga sha oshinene. Sho osho Kalunga te ku geele.” Damaris okwa li a dhengwa pomutima.

Edhiladhilo ndyoka kutya Kalunga oha geele aantu nuuwehame olya za nale. Embo lyedhina Manners and Customs of Bible Lands olya ti kutya aantu oyendji yopethimbo lyaKristus oya li yi itaala kutya “uuwehame owa li hawu etithwa kuulunde waangoka te ehama nenge kuwaakwanezimo lye, nowa li hawu tumwa, opo a geelwe omolwuulunde we.” Embo lyedhina Medieval Medicine and the Plague olya ti kutya mOmathelemimvo goPokati “aantu yamwe oya li yi itaala kutya Kalunga oha geele aantu omolwuulunde wawo.” Sho aantu omamiliyona ya sile koEuropa methelemumvo eti-14 mbela oKalunga a li e ya geele? Nenge omukithi ngoka ogwa li owala gwa holoka omolwombakiteli ngaashi sha li sha popiwa kaaningi yomakonakono gopaunamiti? Yamwe otashi vulika ya kale ye na omaipulo kutya mbela Kalunga oha longitha ngaa shili uuwehame a monithe aantu iihuna omolwuulunde wawo? *

DHILADHILA KWAASHIKA: Omolwashike Jesus a li a aludha aantu mboka ya li taye ehama, ngele nani uuwehame nokumona iihuna owu li egeelo lya za kuKalunga? Mbela sho a ningi ngawo, ando inashi ulika kutya ota pataneke uuyuuki waKalunga? (Mateus 4:23, 24) Jesus ke na esiku a ye iilonga yaKalunga moshipala. Okwa ti: “Otandi longo aluhe shoka she mu opalela” nosho wo kutya “otandi longo ayihe, ngaashi a lombwele ndje.” — Johannes 8:29; 14:31.

Ombiimbeli oya popya sha yela kutya, Jehova Kalunga ‘ke na uugoyoki.’ (Deuteronomium 32:4) Pashiholelwa, Kalunga ke na esiku e etithe oshiponga shondhila, e tashi dhipaga aantu omathele kaaye na ondjo, molwaashoka owala a hala okugeela omuntu gumwe ngoka e li mondhila ndjoka! Metsokumwe nuuyuuki waKalunga, Abraham omupiya omudhiginini gwaKalunga, okwa ti kutya Kalunga ke na esiku a ‘yone po omuyuuki pamwe nomukolokoshi.’ Okwa ti shoka “itashi vulika.” (Genesis 18:23, 25) Ombiimbeli oya ti wo kutya “itashi vulika Kalunga a longe uugoyoki” noita vulu “okulonga uuwinayi.” — Job 34:10-12.

Iihuna mbyoka hatu mono kayi shi egeelo lyaKalunga omolwuulunde wontumba mboka twa longa. Jesus okwe shi popi sha yela sho ye naalongwa ye ya mono omulumentu ngoka a valwa omuposi. “Aalongwa ye oye mu pula ya ti: ‘Muhongi, olye a yono, omulumentu nguka opo a valwe omuposi? Aakuluntu ye nenge oye mwene?’ Jesus okwa yamukula. ‘Uuposi we kau na sha noondjo dhe nenge dhaakuluntu ye. Ye okwa ningi omuposi, opo oonkondo dhaKalunga dhi hololwe muye.’” — Johannes 9:1-3.

Kokutala kedhiladhilo ndyoka lyi ihanena apuhe, aalongwa yaJesus oye na okukala ya li ya kumwa sho e ya lombwele kutya kawu shi uulunde womumati nenge waavali ye owo we mu ningitha a tsike. Jesus ka li owala a tsikulula omulumentu ngoka ihe okwa li wo u ulike kutya edhiladhilo ndyoka kutya okumona iihuna oku li  egeelo lya za kuKalunga oku li eitaalo lya puka. (Johannes 9:6, 7) Aantu mboka ye na uupyakadhi wa kwata miiti wuukolele otaya vulu okumona ehekeleko mokutseya kutya Kalunga haye e etitha uupyakadhi wawo.

Omanyolo otage tu shilipaleke

• “Kalunga iha makelwa kuuwinayi noiha makele nando omuntu.” (JAKOB 1:13) Uushili owo kutya, ‘uuwinayi’ mboka wa kala tawu hepeke aantu uule woomvula omathele, mwa kwatelwa omikithi, uuwehame neso otawu ka hulithwa po masiku.

• Jesus Kristus okwa li a “aludha ayehe mboka ya li taa alukwa.” (MATEUS 8:16) Sho a aludha ayehe mboka ya li ye ya kuye, Omwana gwaKalunga okwa li ulike shoka Uukwaniilwa waKalunga tawu ka gwanitha po kongonga yevi alihe.

• “[Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” — EHOLOLO 21:3-5.

Omolwashike nduno aantu taya mono iihuna? Aantu oya kala nokwiipula epulo ndyoka uule woomvula omathele. Ngele nduno Kalunga haye e na okupewa ombedhi, olye nduno e na oku yi pewa? Omayamukulo gomapulo ngoka otatu ke ga mona moshitopolwa tashi landula.