1. Omalalakano geni to vulu okwiitulila po gokulongela Kalunga?

 TU LI Aakriste yashili, otu hole Jehova noonkondo. Otwa hala oku mu longela iilonga ya dhenga mbanda ngaashi tashi vulika. Ihe opo iilonga mbyoka tu yi longe nawa, otwa pumbwa okwiitulila po omalalakano gankene tu na oku mu longela, ngaashi okukokeka uukwatya wopaKriste, okwiilonga uunkulungu mboka wu na oshilonga, nokutala nkene tatu vulu okukwathela yalwe. *

2. Omolwashike tu na okwiitulila po omalalakano gokulongela Kalunga nokulonga nuudhiginini tu ga adhe?

² Omolwashike tu na okukala twa hala okuninga aalongeli yaJehova ye li hwepo? Shoka unene sha simana osho kutya otwa hala okunyanyudha Tate yetu gwomegulu. Jehova oha kala a nyanyukwa uuna e tu wete tatu longitha iipewa yetu tu mu longele lela miilonga ye. Shimwe ishewe, otwa hala okuninga ehumokomeho mokukala aapiya ye ye li hwepo, opo tu vule lela okukwathela aamwatate naamwameme. (1 Tes. 4:9, 10) Kutya nduno otwa kala moshili ethimbo li thike peni, atuheni otwa pumbwa okuninga ehumokomeho tu ninge aapiya yaJehova ye li hwepo. Onkee, natu ka taleni kunkene tatu vulu oku shi ninga.

3. Ngaashi sha popiwa muTimoteus gwotango 4:12-16, omuyapostoli Paulus okwa ladhipike Timoteus a ninge shike?

³ Sho omuyapostoli Paulus a nyolele Timoteus ontumwafo ye yotango, omulumentu ngoka omugundjuka okwa adhika nale e li omukuluntugongalo e na owino. Nonando ongawo, Paulus okwe mu ladhipike a tsikile okuninga ehumokomeho mokulongela Jehova. (Lesha 1 Timoteus 4:12-16.) Sho to dhiladhila koohapu  ndhoka dhaPaulus, oto ke shi mona mo kutya okwa li a hala Timoteus a ninge ehumokomeho miinima iyali, ano mokukokeka uukwatya wopaKriste ngaashi ohole, eitaalo, uuyogoki noku hwepopale miinima ngaashi okulesha montaneho, okukumagidha nomokulonga aantu. Tu na oshiholelwa shaTimoteus momadhiladhilo, natu ka taleni nkene okwiitulila po omalalakano ngoka tatu vulu okwaadha taku vulu oku tu kwathela tu ninge ehumokomeho mokulongela Jehova. Otatu ka tala wo komikalo dhimwe moka tatu vulu okutamununa mo uukalele wetu.

4. Shi ikolelela kAafilippi 2:19-22, oshike sha ningitha Timoteus a kale omupiya gwaJehova e na oshilonga?

⁴ Oshike sha ningitha Timoteus a kale omupiya gwaJehova e na oshilonga? Omaukwatya ge gopaKriste. (Lesha Aafilippi 2:19-22.) Okutala kunkene Paulus a popi kombinga yaTimoteus, oshi iwetikile kutya okwa li omwiifupipiki, omudhiginini, omunandjungu, noku shi okwiinekelwa. Okwa li omunahole, nokwa li e na ko nasha lela naamwahe. Shoka osha ningitha Paulus a kale e hole Timoteus nokali a kakadhala oku mu inekelela iinakugwanithwa iinene. (1 Kor. 4:17) Sha faathana, natse Jehova ota ka kala e tu hole notatu ka kala tu na lela oshilonga megongalo, ngele otwa kokeke omaukwatya ngoka e hole. — Eps. 25:9; 138:6.

5. (a) Ongiini to vulu okwiitulila po elalakano lyokukokeka uukwatya wontumba wopaKriste? (b) Ngaashi sha ulikwa methano, omumwameme ngoka omugundjuka ota ningi shike, opo a adhe elalakano lye lyokuulukila yalwe olukeno?

⁵ Itulila po elalakano lyokondandalunde. Galikana e to dhiladhila kombinga yuukwatya mboka wa pumbwa okuhwepopala muwo. Pashiholelwa, mbela ito vulu okukokeka uukwatya wolukeno shi vulithe nale nenge okukala lela wu na ehalo lyokukwathela aamwatate naamwameme? Mbela owa pumbwa okukala ho panga ombili shi vulithe nale noho dhimine po yalwe? Otashi ka kala shi li nawa ngele owa pula kuume koye gumwe omwiinekelwa e ku pe omayele kombinga yankene to vulu okuhwepopala. — Omayel. 27:6.

6. Ongiini to vulu okukokeka uukwatya wontumba?

⁶ Longa nuudhiginini wu adhe elalakano lyoye. Ongiini to vulu oku shi ninga? Omukalo gumwe to vulu oku shi ninga, omokukonakona nuukeka uukwatya mboka wa hala okuhwepopala muwo. Natu tye andola owa hala okukala ho dhimine po yalwe shi vulithe nale. Otashi vulika wu tameke okulesha nokutedhatedha kiiholelwa yomOmbiimbeli yaamboka ya li ya dhimine po yalwe nehalo ewanawa naamboka ya li inaaye shi ninga. Natu taleni koshiholelwa shaJesus. Okwa li a  dhimine po yalwe nehalo ewanawa. (Luk. 7:47, 48) Kali a gandja eitulomo komapuko gawo, ihe okwaashoka taya vulu okuninga. Mepingathano naashono, Aafarisayi yopethimbo lyaJesus oya li ya ‘dhina yalwe.’ (Luk. 18:9) Konima yokutedhatedha kiiholelwa mbyoka, ipula ngeyi: ‘Oshike handi mono muyalwe? Omaukwatya gawo geni handi gandja eitulomo kugo?’ Ngele oto nyengwa okudhimina po gumwe, kambadhala okunyola omaukwatya ge ogendji omawanawa ngaashi to vulu. Opo nduno ipula to ti: ‘Jesus omuntu nguno okwe mu tala ko ngiini? Mbela andola ote mu dhimine po ngaa?’ Ngele otwe shi ningi, otashi ke tu kwathela tu lundulule okudhiladhila kwetu. Petameko, otashi vulika tu kale twa pumbwa okulonga nuudhiginini tu dhimine po ngoka e tu uvitha nayi. Ihe ngele otwa tsikile okukambadhala tu hwepopale, mokweendela ko kwethimbo otatu ka kala hatu dhimine po yalwe nehalo ewanawa.

7. Metsokumwe nOmayeletumbulo 22:29, omomikalo dhini Jehova ha longitha aaiyambi mboka ye na uunkulungu wontumba kunena?

⁷ Elalakano limwe to vulu okwiitulila po, okwiilonga uunkulungu wontumba. Dhiladhila owala kutya aaiyambi yangapi ya pumbiwa ya tunge omatungo gaBetel, Iinyanga yIigongi nosho wo Iinyanga yUukwaniilwa. Oyendji yomaaiyambi mboka, uunkulungu mboka ye na oye wu ilonga kaamwatate mboka ye na owino. Ngaashi tashi ulikwa methano, aamwatate naamwameme ayehe mboka otayi ilongo uunkulungu mboka wa pumbiwa wokukaleka Iinyanga yIigongi nosho wo Iinyanga yUukwaniilwa monkalo ombwanawa. Momikalo ndhika nosho wo dhilwe, Jehova Kalunga, “Omukwaniilwa gwaaluhe” nosho wo Jesus Kristus, “Omukwaniilwa gwaakwaniilwa,” otaya gwanitha po iilonga iinene taya longitha aaiyambi mboka ye na owino. (1 Tim. 1:17; 6:15; lesha Omayeletumbulo 22:29.) Otwa hala okulonga nuudhiginini notu longithe uunkulungu mboka tu na tu simanekithe Jehova, ihe hatse yene. — Joh. 8:54.

8. Ongiini to vulu okutokola kutya uunkulungu wuni wa pumbwa okwiilonga?

⁸ Itulila po elalakano lyokondandalunde. Uunkulungu wuni to vulu okwiilonga? Pula aakuluntugongalo yomegongalo lyeni nenge omutonatelishikandjo gweni kutya uunkulungu wuni ye wete wa pumbwa okwiilonga. Pashiholelwa, ngele oye ku lombwele kutya owa pumbwa okuhwepopala momukalo gwoye gwokupopya nenge gwokulonga aantu, ya pula ye ku kwathele kutya openi wa pumbwa okuhwepopala. Opo nduno longa nuudhiginini wu hwepopale. Shono oto vulu oku shi ninga ngiini?

9. Ongiini to vulu okulonga nuudhiginini wu adhe elalakano lyoye lyokwiilonga uunkulungu wontumba?

⁹ Longa nuudhiginini wu adhe elalakano lyoye. Natu tye nduno owa hala okuhwepopala mokulonga aantu. Oto vulu okukonakona nuukeka okambo Longitha ethimbo lyoye mokulesha nosho wo mokulonga aantu. Ngele owa pewa oshitopolwa wu ke shi gandje pokugongala kwomokati koshiwike, oto vulu okupula omumwatate ngoka a pyokoka e ku pulakene sho to iyenditha po manga inoo ke shi gandja, e te ku pe omaetopo gankene wa pumbwa okuhwepopala. Kala ho ilongekidhile iitopolwa yoye kuyele, opo aantu ya mone kutya oho longo nuudhiginini nowu shi okwiinekelwa. — Omayel. 21:5; 2 Kor. 8:22.

10. Gandja oshiholelwa shankene tatu vulu okuhwepopala moshinima shoka twa pumbwa okwiilonga okuninga.

¹⁰ Ongiini nduno ngele owa hala okutseya okuninga oshinima shontumba shoka ho mono oshidhigu? Tsikila oku shi ilonga! Omumwatate gwedhina Gerry kali e shi okulesha nawa. Ota dhimbulukwa nkene a li ha kala a sa ohoni sho a li ha kambadhala okulesha muule pokugongala kwegongalo. Ihe okwa tsikile okulonga nuudhiginini a hwepopale. Ngashingeyi oha ti kutya molwaashoka okwa kala nokudheulwa, ngashingeyi oha  vulu okugandja iipopiwa mIinyanga yUukwaniilwa, piigongi yoshikandjo noyoshitopolwa!

11. Ngaashi Timoteus, oshike tashi tu kwathele tu pewe iinakugwanithwa ya gwedhwa po?

¹¹ Mbela Timoteus okwa li ngaa a ningi omupopi nenge omulongi omwaanawa? Ombiimbeli inayi shi popya. Ihe kapu na omalimbililo kutya Timoteus oku na okukala a li he shi enditha nawa miinakugwanithwa mbyoka a pewelwe, molwaashoka okwa landula omayele gaPaulus. (2 Tim. 3:10) Sha faathana, ngele natse otwi ilongo uunkulungu wi li nowi ili, otatu ka kala twa gwana okupewa iinakugwanithwa ya gwedhwa po.

12. Uuwanawa wuni wa mona sho wa kwathelwa kuyalwe?

¹² Atuheni ohatu mono uuwanawa uuna twa kwathelwa kuyalwe. Ngele otu li moshipangelo, ohatu kala twa pandula uuna twa talelwa po kaakuluntugongalo yomOokomitiye dhOkukwatathana nIipangelo nenge yomOongundu dhOkutalela po Aavu. Uuna tu li muudhigu wontumba, ohatu shi pandula ngele omukuluntugongalo gwontumba okwa kutha ethimbo a pulakene kutse noku tu hekeleka. Uuna twa pumbwa ekwatho nekonakonombiimbeli lyetu, ohatu kala twa nyanyukwa ngele omukokolindjila gwontumba okwa zimine naye a kale po a gandje omatyokosha ge. Aamwatate naamwameme ayehe mboka ohaya kala ya nyanyukwa oku tu kwathela. Natse otatu vulu okumona enyanyu ndyoka ngele otwa kala hatu ya kwathele. Jesus okwa ti: ‘Okugandja ohaku e ta enyanyu ku vule okutaamba.’ (Iil. 20:35, yelekanitha NW) Ngele owa hala okutamununa mo iilonga yoye momikalo ndhoka, oshike tashi vulu oku ku kwathela wu adhe omalalakano ngoka?

13. Uuna tatu itulile po elalakano lyontumba, oshike tu na okukaleka momadhiladhilo?

¹³ Kotokela okwiitulila po elalakano ndyoka kaali shi lyokondandalunde. Pashiholelwa, otashi vulika wu tye, ‘Onda hala okuninga oshindji megongalo.’ Ihe otashi vulika wu shi mone oshidhigu kutya elalakano ndyoka oto li adha ngiini nenge wu mone oshidhigu okumona ngele owe li adha ngaa. Onkee, itulila po elalakano lyokondandalunde. Oto vulu oku li nyola pokuma nosho wo kutya owa hala oku li adha ngiini.

14. Omolwashike twa pumbwa okukala tu na ondjele uuna tatu itulile po omalalakano?

¹⁴ Otwa pumbwa okukala tu na ondjele uuna tatu itulile po omalalakano. Omolwashike mbela? Omolwaashoka oonkalo dhetu ohadhi vulu okulunduluka mepathimo lyeho. Natu shi  thaneke ngeyi: Omuyapostoli Paulus okwa li a kwathele a tote egongalo epe moshilando shaTessalonika. Osha yela wo kutya okwa li i itulile po elalakano lyokukala moshilando shoka a kwathele mboka opo ya ningi Aakriste. Ihe aapataneki oya li ya thiminike Paulus a ze mo moshilando shoka. (Iil. 17:1-5, 10) Andola Paulus okwa kalele mo, ando okwa tula aamwahe moshiponga. Ihe nonando ongawo, Paulus okwa tsikile oku ya kwathela. Okwa li a ningi ngaashi ta vulu a igilile onkalo ndjoka ompe. Konima yethimbo, okwa tumine Timoteus kuTessalonika a ka kwathele ooitaali mboka aape ya kale ye na ekwatathano lya kola naJehova. (1 Tes. 3:1-3) Aatessalonika mboka kaya li tuu ya nyanyukwa sho Timoteus e ya kuyo e ya kwathele mpoka ya pumbwa ekwatho!

15. Omalalakano getu otashi vulika ga lunduluke ngiini ngele oonkalo dhetu odha lunduluka? Shi thaneka.

¹⁵ Otatu vulu okwiilonga mo sha moshimoniwa shaPaulus sho a li muTessalonika. Otashi vulika tu itulile po omalalakano, ihe oonkalo dhetu otashi vulika dhi lunduluke, shono tashi vulu oku tu imba tu ga adhe. (Omuuv. 9:11) Ngele nangoye owu li monkalo ndjoka, oto vulu okwiitulila po elalakano limwe li ili ndyoka to vulu okwaadha. Shoka osho sha li sha ningwa kaaihokani yamwe, Ted naHiedi. Omolwokwaana uukolele, oya li ye na okuza mo moBetel. Ihe omolwohole yawo yokuhola Jehova, oya tokola ye Mu longele momikalo dhilwe. Tango, oya kutha uukwathelikokolindjila wondjigilile. Mokweendela ko kwethimbo, oya li ya langekwa po ye li aakokolindjila yi ikalekelwa. Ted okwa li wo a dheulwa a ninge omukalelipo gwomutonatelishikandjo. Ihe omimvo dhokuya muutonatelishikandjo odha li dha lunduluka. Ted naHiedi oya mono kutya kaya li we taya vulu okulongela Jehova momukalo ngoka. Nonando oya li ya yemata, oye shi mono kutya otaya vulu ishewe oku mu longela momikalo dhilwe. Ted okwa ti: “Otwa mona kutya otatu vulu okulongela Jehova momikalo dhilwe.”

16. Oshike tatu ilongo mAagalati 6:4?

¹⁶ Ihatu vulu okukeelela iinima ayihe mboka hayi vulu okuholoka monkalamwenyo yetu. Onkee osha simana kaatu itale ko kutya otu na owala ongushu omolwiinakugwanithwa mbyoka tu na nenge tu yelekanithe iinakugwanithwa yetu naambyoka yayalwe. Heidi okwa ti: “Ombili yoye ohayi kana po, ngele oho yelekanitha onkalamwenyo yoye nonkalamwenyo yayalwe.” (Lesha Aagalati 6:4.) Osha simana tu konge omikalo moka tatu vulu okukwathela yalwe nosho wo moka tatu vulu okulongela Jehova. *

17. Oshike wu na okuninga, opo wu kale wa gwana okupewa iinakugwanithwa?

¹⁷ Oto vulu okulonga oshindji miilonga yaJehova, ngele ino indumbila iinima yopamaliko noho yanda oongunga inaadhi pumbiwa. Ihe  owu na okwiitulila po omalalakano omashona tango ngoka tage ku kwathele wu adhe omalalakano omanene. Pashiholelwa, ngele elalakano lyoye enene olyokuninga omukokolindjila gwondjigilile, mbela ito vulu manga okukutha uukwathelikokolindjila tawu tsikile? Ngele owa hala okuninga omuyakuligongalo, mbela ito vulu okukala ho kala ethimbo olindji miilonga yokuuvitha nenge wu kale ho talele po mboka taya ehama nosho wo aakokele yomegongalo lyeni? Owino ndjoka to mono ngashingeyi otayi vulu oku ku pa ompito wu ka pewe iinakugwanithwa yilwe monakuyiwa. Kala wa tokola toko okuninga ngaashi to vulu moshinakugwanithwa kehe shoka wa pewa. — Rom. 12:11.

18. Ngaashi sha ulikwa methano, oshike tatu ilongo koshiholelwa shomumwameme Beverley?

¹⁸ Nonando otwa kulupa, otatu vulu okwiitulila po omalalakano gokulongela Jehova e tatu ga adha. Tala koshiholelwa shomumwameme gwomimvo 75 gwedhina Beverley. Okwa li e na omukithi gwa kwata miiti ngoka gwa li hagu shi ningitha oshidhigu kuye a ende. Ihe okwa li a hala okukutha ombinga moshikonga shokuhiya aantu kEdhimbuluko. Onkee okwi itulile po elalakano lyokondandalunde. Sho Beverly a adha elalakano lye lyokukutha ombinga moshikonga shoka, okwa li a nyanyukwa noonkondo. Oonkambadhala dhe odhi inyengitha yalwe nayo ya longe nuudhiginini miilonga yokuuvitha. Jehova okwa lenga iilonga yaamwatate naamwameme mboka aakokele, nonando oonkalo dhawo ohadhi ya imbi ya ninge shoka taya vulu okuninga. — Eps. 71:17, 18.

19. Omalalakano geni gokulongela Kalunga tatu vulu okwiitulila po?

¹⁹ Itulila po omalalakano ngoka to vulu okwaadha. Kokeka uukwatya mboka tawu ku ningitha wu kale wu holike kuJehova. Ilonga uunkulungu mboka tawu ku ningitha wu longithwe shi vulithe nale kuKalunga nokehangano lye. Tala omikalo moka to vulu okukwathela aamwatate naamwameme shi vulithe nale. * Ngaashi Timoteus, Jehova ote ke ku yambeka, ‘nokuhuma kwoye komeho otaku ka monika kwaayehe.’ — 1 Tim. 4:15.