OSHITOPOLWA SHOKUKONAKONWA 35
EIMBILO 123 Natu kaleni aadhiginini kuKalunga
Ekwatho kwaamboka ya kuthwa mo megongalo
“Uuna wo omulunde a itedhulula, megulu ohamu kala enyanyu enene, li vule okunyanyukilwa aayuuki 99, mboka inaaya pumbwa okwiitedhulula.” — LUK. 15:7.
SHOKA TATU KA ILONGA
Otatu ka ilonga kutya omolwashike oohandimwe ya pumbwa okukuthwa mo megongalo, nongiini aakuluntugongalo taya vulu oku ya kwathela ya itedhulule, opo ya kale ishewe ya hokiwa kuJehova.
1-2. (a) Jehova oha kala e uvitile ngiini aantu mboka haya yonene owina? (b) Jehova oku na einekelo kutya aayoni otaya ka ninga shike?
JEHOVA iha taamba ko eihumbato kehe, ye oku tonde uulunde. (Eps. 5:4-6) Okwa tegelela tu vulike komithikampango dhe dhi li pauyuuki, ndhoka tadhi adhika mOmbiimbeli. Odhoshili kutya Jehova ina tegelela aantu inaaya gwanenena ye mu longele nopwaa na okuyona. (Eps. 130:3, 4) Ihe nonando ongawo, iha idhidhimikile ‘aakeenakonashanakalunga mboka taya goyokitha esilohenda lye nokwaaneidhiliko kwawo.’ (Jud. 4) Ombiimbeli oya popya kutya ‘aakeenakonashanakalunga otaya ka hanagulwa po’ kuKalunga, piita yaArmagedon. — 2 Pet. 3:7; Eh. 16:16.
2 Osha yela kutya Jehova ina hala nando ogumwe a ka hanagulwe po. Ngaashi twa zi nokukundathana miitopolwa ya tetekele, Ombiimbeli oye shi popya sha yela kutya “okwa hala, aantu ayehe ye ethe uulunde wawo.” (2 Pet. 3:9) Aakuluntugongalo ohaya holele Jehova, sho taya kambadhala neidhidhimiko, ya kwathele aayoni ya lundulule oondjila dhawo, opo ya kale ya hokiwa ishewe kuJehova. Ihe nonando ongawo, haayoni ayehe haya taamba ko ekwatho ndyoka taya pewa. (Jes. 6:9) Yamwe ohaya tsikile owala nomapuko gawo, nonando aakuluntugongalo oya ninge oonkambadhala dhoku ya kwathela lwiikando ya itedhulule. Aakuluntugongalo oye na okuninga po shike monkalo ya tya ngawo?
“KUTHII MO OMUNTU NGOKA TA LONGO UUWINAYI”
3. (a) Ombiimbeli oya ti kutya omuntu ngoka inaa itedhulula, oku na okuningilwa shike? (b) Omolwashike tatu vulu okutya, omuyoni okwa ilongela oku kuthwa mo megongalo?
3 Ngele omuyoni ina itedhulula, nena aakuluntugongalo kaye na we ehogololo limwe, ihe okulandula owala omayele ngoka taga adhika mAakorinto yotango 5:13, ndjoka tayi ti: “[Kuthii mo omuntu ngoka ta longo uuwinayi, NW] mokati keni.” Oshi li ngeyi kutya omuyoni ngoka, okwa hogolola ye mwene iilanduliko yokuteya shoka a kuna. (Gal. 6:7) Omolwashike tatu tile ngawo? Oshoka okwa tinda okutaamba ko ekwatho ndyoka a kala ta pewa lwiikando kaakuluntugongalo, sho ya kala taye mu kwathele a itedhulule. (2 Aak. 17:12-15) Okwe shi ulika okupitila moonkatu dhe kutya ina hala okuvulika komithikampango dhaJehova. — Deut. 30:19, 20.
4. Omolwashike hapu ningwa etseyitho kutya omuyoni ngoka inaa itedhulula okwa kuthwa mo megongalo?
4 Uuna omuyoni ngoka inaa itedhulula a kuthwa mo megongalo, ohapu ningwa etseyitho kutya ke shi we Onzapo yaJehova. a Etseyitho ndyoka ihali ningwa andola nelalakano lyokusitha omuyoni ohoni. Pehala lyaashono, ohali ningwa, opo egongalo li landule omayele ngoka ge li mOmbiimbeli taga ti kutya “mwaa kwatathane” nomuntu ngoka ‘nokulya pamwe naye nokuli.’ (1 Kor. 5:9-11) Elombwelo ndyoka olya gandjwa netompelo ewanawa. Omuyapostoli Paulus okwa nyola a ti: “Okafulika okashona ohaka tumbike ondombo ayihe.” (1 Kor. 5:6) Aayoni mboka inaa ya itedhulula, ota ya vulu okunkundipaleka etokolotoko lyaamboka taya kambadhala okukala metsokumwe nomithikampango dhaJehova dhi li pauyuuki. — Omayel. 13:20; 1 Kor. 15:33.
5. Otu na okukala twa tala ko ngiini omuntu ngoka a kuthwa mo megongalo, nomolwashike?
5 Otu na okukala twa tala ko ngiini, omwiitaali omukwetu, ngoka a kuthwa mo megongalo? Nonando ihatu endathana we naye, otu na okukala twe mu tala ko e li onzi ya kana, ihe katu na oku mu tala ko kutya ke na we etegameno lyasha. Uuna onzi ya puguma mo muusita woonkwawo, ohayi vulu okugaluka. Dhimbulukwa kutya onzi ndjoka ya kana, oya iyapulila Jehova. Ihe shiyemateka, kayi li we owala metsokumwe neiyapulo lyawo pethimbo ndyoka, shono sha nika oshiponga. (Hes. 18:31) Nonando ongawo, omolwohenda yaJehova, ohatu kala tu na etegameno kutya onzi ndjoka otayi ka galukila moshigunda. Ongiini nduno aakuluntugongalo taya vulu okukwathela omuntu ngoka a kuthwa mo megongalo?
NKENE AAKULUNTUGONGALO HAYA KWATHELE MBOKA YA KUTHWA MO MEGONGALO
6. Oonkatu dhini aakuluntugongalo taya ka kutha, opo ya kwathele gumwe ngoka a kuthwa mo megongalo?
6 Mbela omuntu ngoka a kuthwa mo megongalo, oha ekelwahi, na oye mwene e na okukondja a galukile kuJehova? Hasho nando. Uuna okomitiye yaakuluntugongalo tayi tseyithile omuyoni ngoka inaa itedhulula kutya ota ka kuthwa mo megongalo, ohayi mu yelithile wo kutya oonkatu dhini e na okukatuka a galulilwe mo. Ihe aakuluntugongalo otaya ka ninga oshindji shi vulithe pwaashoka. Moompito odhindji, otaya ka lombwela omuyoni ngoka kutya oye na ehalo lyokutsakanena naye konima yoomwedhi oonshona, ya tale ngele okwa lundulula iikala ye. Ngele omuyoni oku na ehalo lyokutsakanena nayo ishewe, aakuluntugongalo otaya ka longitha ompito ndjoka ye mu kwathele nombili, a itedhulule noku galukile megongalo. Nokuli nonando ina lundulula iikala yomutima gwe pethimbo ndyono, aakuluntugongalo otaya ka kambadhala okutsakanena naye ishewe monakuyiwa, noku mu ladhipika a itedhulule.
7. Aakuluntugongalo ohaya holele ngiini olukeno lwaJehova, uuna taya ungaunga nomuntu ngoka a kuthwa mo megongalo? (Jeremia 3:12)
7 Aakuluntugongalo ohaya kambadhala ya mana mo ya holele olukeno lwaJehova, sho taya ungaunga nomuntu ngoka a kuthwa mo megongalo. Pashiholelwa, Jehova ka li a tegelele aantu aatangalali yomuIsraeli shonale, oyo ya katuke onkatu tango. Pehala lyaashono, oye a li a katuka onkatu tango, e shi kwathele nokuli manga inaashi ulika endhindhiliko lyasha lyokwiitedhulula. Ngaashi twe shi mono moshitopolwa oshi-32, Jehova okwa li a ulike olukeno lwe mokulombwela omuhunganeki Hosea a hangane nomukadhi ngoka a li natango e li muulunde. (Hos. 3:1; Mal. 3:7) Aakuluntugongalo nayo ohaya holele Jehova, mokukala ya hala omuyoni a galuke, noihaye shi ningi oshidhigu kuye a vule okugaluka. — Lesha Jeremia 3:12.
8. Ethaneko lyaJesus lyomumati a kanene, otali ulike ngiini kutya Jehova oku na olukeno nohenda? (Lukas 15:7)
8 Otashi vulika to dhimbulukwa nkene he a li a inyenge methaneko lyaJesus lyomumati a kanene, ndyoka lya popiwa moshitopolwa oshi-32. Sho a mono omwana ta galukile kegumbo, he okwa “matuka e ke mu tsakaneke e te mu papatele, nokwe mu hupita.” (Luk. 15:20) Ndhindhilika kutya he ka li a tegelele omwana e mu pule e mu dhimine po. Pehala lyaashono, oye a katuka onkatu tango, ngaashi owala tate omuvali kehe omunahole, ha ningi. Aakuluntugongalo nayo ohaya kambadhala okulandula oshiholelwa shaJehova, uuna taya ungaunga naamboka ya puguma mo moshigunda. Oya hala onzi ndjoka ya kana yi galukile kegumbo, oku shi popya pathaneko. (Luk. 15:22-24, 32) Uuna omuyoni a galuka, megulu ohamu kala enyanyu enene nosho wo kombanda yevi. — Lesha Lukas 15:7.
9. Jehova okwa hala aayoni ya ninge shike?
9 Okutala kwaashoka twa zi nokukundathana, osha yela kutya Jehova iha dhimine po aayoni mboka inaa ya itedhulula. Ihe nonando ongawo, ihe ya pilamene. Okwa hala ya galukile kuye. MuHosea 14:4 otamu popiwa nkene Jehovah ha kala e uvite, uuna aantu ya itedhulula. Ovelise ndjono otayi ti: “Otandi ka galulila aantu yandje kungame. Otandi kala ndi ya hole nomwenyo gwandje aguhe; itandi ya geele we.” Molwaashoka aakuluntugongalo oye shi nkene Jehova e uvite, oye na okutala kukehe shimwe shoka tashi ulike kutya omuyoni okwa itedhulula. Shono oshi na wo okwiinyengitha mboka ya thiga po Jehova, ya galukile kuye nziya.
10-11. Aakuluntugongalo otaya ka kwathela ngiini mboka ya kuthwa mo megongalo monakuziwa?
10 Ongiini kombinga yaamboka ya kuthwa mo megongalo monakuziwa, tashi vulika ngashingeyi pwa pita omimvo odhindji? Otashi vulika aantu mboka ihaaya ningi we omayono ngoka ga li ge ya ningitha ya kuthwe mo megongalo. Otashi vulika nokuli yamwe itaaya dhimbulukwa we kutya omolwashike ya kuthwa mo megongalo. Kutya nduno aantu mboka oya ninga ethimbo li thike peni ya za mo megongalo, aakuluntugongalo otaya ka ninga oonkambadhala ye ke ya konge noku ya talela po. Sho taye ya talele po, aakuluntugongalo otaya ka galikana pamwe nayo, noku ya kwathela nombili ya galukile megongalo. Odhoshili kutya ngele omuntu okwa ningi omimvo odhindji a za mo megongalo, oha kala a nkundipala pambepo. Onkee ano ngele omuntu ngono okwa ha la okugalukila megongalo, aakuluntugongalo otashi vulika ya ninge omalongekidho, opo gumwe a konakone Ombiimbeli naye, nonando ina galulilwa natango megongalo. Ihe aakuluntugongalo oyo aluhe ye na okuninga omalongekidho gekonakonombiimbeli ndyoka.
11 Aakuluntugongalo oye na okuholela olukeno lwaJehova, ya kwathele aantu oyendji ngaashi tashi vulika ya mone kutya omiyelo dhokugalukila megongalo odhe ya egulukila. Uuna omuyoni a ulike kutya okwa itedhulula nokwa etha po oondjila dhe dha puka, ota vulu okugalulilwa megongalo nopwaa na okwoongaonga. — 2 Kor. 2:6-8.
12. (a) Oonkalo dhini unene tadhi pula aakuluntugongalo ya kale ya takamitha? (b) Omolwashike kaatu na okukala tu uvite kutya aayoni yamwe, Jehova ita vulu oku ya sila ohenda? (Tala wo enyolo lyopevi.)
12 Omathimbo gamwe, aakuluntugongalo oye na okukala lela ya takamitha, manga inaaya galulila omuntu megongalo. Pashiholelwa, ngele omuntu okwa kuthwa mo megongalo, molwaashoka ha hepeke aanona, nenge molwuushunimonima, nenge a li ta kengelele a teye ondjokana, aakuluntugongalo oye na okushilipaleka kutya omuntu a tya ngawo okwa itedhulula shili. (Mal. 2:14; 2 Tim. 3:6) Aakuluntugongalo oye na okugamena oshigunda. Kakele kaashono, otu na okukala tu shi kutya Jehova ota ka taamba ko omuyoni kehe ngoka a itedhulula shili, nokwa hulitha po eihumbato lye ndyoka lya puka. Aakuluntugongalo oye na okukala ya takamitha aantu mboka ya ungaunga nayalwe niineya. Ihe nonando ongawo, kaye na okuthika pehulithodhiladhilo kutya Jehova ke na esiku a sile ohenda, aayoni yontumba. b — 1 Pet. 2:10.
SHOKA EGONGALO TALI VULU OKUNINGA PO
13. Eyooloko lini, li li pokati komukalo moka hatu ungaunga nomuntu ngoka a geelwa nosho wo naangoka a kuthwa mo megongalo?
13 Ngaashi twe shi kundathana moshitopolwa oshi-31, omathimbo gamwe ohapu ningwa etseyitho kutya omuntu okwa geelwa. Uuna etseyitho ndyoka lya ningwa, ohatu tsikile okweendathana naye, molwaashoka otu shi kutya okwa itedhulula nokwa etha po ondjila ye ya puka. (1 Tim. 5:20) Oha kala natango oshitopolwa shegongalo, nokwa pumbwa etsomukumo, ndyoka hali zi mokweendathana nooitaali ooyakwetu. (Heb. 10:24, 25) Ihe onkalo ohayi kala ya yooloka ko komuntu ngoka a kuthwa mo megongalo. Ombiimbeli otayi ti kutya ‘mwaa kwatathane’ nomuntu ngoka ‘nokulya pamwe naye nokuli.’ — 1 Kor. 5:11.
14. Aakriste oye na okulongitha ngiini eiyuvo lyawo lya dheulwa kOmbiimbeli, sho taya ungaunga naantu mboka ya kuthwa mo megongalo? (Tala wo ethano.)
14 Mbela shono twa zi nokukundathana osha hala okutya otu na okwiidhimbika thiluthilu omuntu ngoka a kuthwa mo megongalo? Hasho nando. Odhoshili kutya itatu ka endathana naye. Ihe Aakriste otaya vulu okulongitha eiyuvo lyawo lya dheulwa kOmbiimbeli ya tokole, ngele otaya ka hiya kokugongala omuntu ngoka a kuthwa megongalo, tashi vulika omukwanezimo nenge a li kuume kawo kopothingo. Ongiini ngele okwe ya kokugongala? Monakuziwa, katwa li hatu popitha omuntu ngoka. Ihe ngashingeyi, Omukriste kehe okwa pumbwa okulongitha eiyuvo lye lya dheulwa kOmbiimbeli monkalo ndjoka. Yamwe otashi vulika ya kale ya manguluka okupopitha omuntu ngoka nenge oku mu lombwela kutya oya pandula sho e ya kokugongala. Ihe itatu ka tula ko omahokololo omaleeleka naye, nenge tu kale hatu kutha naye ombinga momainyanyudho.
Aakriste otaya vulu okulongitha eiyuvo lyawo lya dheulwa kOmbiimbeli, ya tokole ngele otaya ka hiya kokugongala omuntu ngoka a kuthwa mo megongalo, nenge oku mu lombwela kutya oya pandula sho e ya kokugongala, moku mu popitha paufupi (Tala okatendo 14)
15. Aayoni yoludhi luni taya popiwa muJohannes omutiyali 9-11? (Tala wo oshimpungu: “ Mbela Johannes naPaulus oya li taya popi kombinga yeyono limwe?”)
15 Yamwe otashi vulika ya tye, ‘Ano Ombiimbeli itayi ti kutya shaa ngoka ta popitha omuntu a tya ngaaka, oye ota kwatathana niilonga iiwinayi mbyoka te yi longo?’ (Lesha 2 Johannes 9-11.) Oshikalimo shEnyolo ndika, otashi ulike kutya Johannes okwa li ta popi aashunimonima nosho wo yalwe mboka yi ipyakidhila nokuhumitha komeho eihumbato lya puka. (Eh. 2:20) Onkee ano ngele omuntu ota humitha komeho omalongo gaashunimonima, nenge omayono galwe, aakuluntugongalo itaya ka ninga omalongekidho ye ke mu talele po. Nonando ongawo, otu na einekelo kutya esiku limwe lyomomasiku, omuntu ngoka otashi vulika a ka itedhulule. Omanga shono inaashi ningwa, katu na nando okupopitha omuntu ngoka, nenge tu mu hiye e ye kokugongala.
HOLELA OLUKENO NOHENDA YAJEHOVA
16-17. (a) Jehova okwa hala aayoni ya ninge shike? (Hesekiel 18:32) (b) Ongiini aakuluntugongalo taya vulu okuulika kutya oye li aalongi pamwe naJehova, sho taya kambadhala okukwathela aayoni?
16 Oshike twa ilonga miitopolwa yokukonakonwa itano, mbyoka yi li moshifo shika? Jehova ina hala nando omuntu gumwe a ka hanagulwe po. (Lesha Hesekiel 18:32.) Okwa hala aayoni ya hangane ishewe naye. (2 Kor. 5:20) Onkee ano okuza konalenale, Jehova okwa kala nokwiindila oshigwana she shoka oshitangalali nosho wo oohandimwe mboka aatangalali, ya itedhulule noya galukile kuye. Aakuluntugongalo oye na uuthembahenda wokulonga pamwe naJehova, sho taya kambadhala okukwathela aayoni ya itedhulule. — Rom. 2:4; 1 Kor. 3:9.
17 Dhiladhila owala kenyanyu ndyoka hali kala megulu, uuna aayoni ya itedhulula. Tate yetu gwomegulu, Jehova, oha kala a nyanyukwa, uuna yimwe yomoonzi dhe ndhoka dha kana, ya galukile megongalo. Ohole yetu yokuhola Jehova ohayi tsikile nokukoka, sho tatu tedhatedha kombinga yolukeno lwe, yohenda ye nosho wo yesilohenda lye. — Luk. 1:78.
EIMBILO 111 Otu na omatompelo gokukala twa nyanyukwa
a Ngashingeyi ihatu ti we omuntu okwa kondwa, ihe ohatu ti kutya okwa kuthwa mo megongalo, shoka shi li metsokumwe noohapu dhaPaulus ndhoka dhi li mAakorinto yotango 5:13.
b Ombiimbeli oya popya kutya opu na aantu yamwe itaaya vulu okudhiminwa po oondjo dhawo. Aantu mboka oya tokola kutya otaya kala aluhe ye li ompinge naKalunga. Kapu na omuntu ta vulu okuutha kutya eyono lyagumwe itali vulu okudhimwa po, ihe Jehova naJesus oyo owala taya vulu oku shi ninga. — Mark. 3:29; Heb. 10:26, 27.
