Ombili nuunongo — Ohayi endele pamwe
Omumwameme Toñi, okwa dheulwa a kale ha sile oshimpwiyu aakulupe. Okwa li ha longele omukulukadhi gumwe, mokusila oshimpwiyu yina ngoka a kulupa. Esiku limwe sho a thindi pokangendjo kopomweelo, omukulukadhi ngoka okwe egulula po. Okwa tameke okuula Toñi omalaka ga honga noku mu nyenyetela, sho inaa thika mbala kiilonga, nonando ka li shili a lata. Toñi okwa pe owala omukulukadhi ngoka ombili.
SHO omumwameme Toñi e ke ya kiilonga oshikando sha ka landula ko, natango omukulukadhi okwe mu ula omalaka omawinayi. Mbela Toñi okwi inyenge ngiini? Okwa ti: “Onkalo ndjoka oya li ondhigu noonkondo. Omukalo moka a popi nangame, kagwa li pauyuuki.” Nonando osho a li u uvite ngawo, okwa gandja natango ombili e ta lombwele omukulukadhi ngoka kutya oku uvite ko onkalo ye.
Mbela ando ongoye wa li Toñi, ando owi inyenge ngiini? Ando owa yamukula ngaa nombili? Ando owa vulu ngaa okupangela ongeyo yoye? Odhoshili kutya uuna wi iyadha monkalo ngaashi ndjoka twa zi nokupopya, otashi vulika shi kale oshidhigu okukala wa ngungumana. Uuna tu uvithwa nayi nenge twa hindwa, ihashi kala oshipu okuulika ombepo yombili.
Nonando ongawo, Ombiimbeli otayi ladhipike Aakriste ya kale aanambili. Oya popya wo kutya uukwatya mboka ohawu endele pamwe nuunongo. Omulongwa Jakob okwa ti: “Olye ngoka omunandunge nomunamayele mokati keni? Oye oku na oku shi ulika mokukala kwe okuwanawa, miilonga ye iiwanawa ya longwa meifupipiko nomoondunge.” (Jak. 3:13) Omomukalo guni ombepo yombili nenge yeifupipiko hayi ulike uunongo mboka hawu zi kuKalunga? Oshike tashi vulu oku tu kwathela tu kokeke uukwatya mboka?
UUNONGO MBOKA HAWU ULIKWA KOMBEPO YOMBILI
Ombepo yombili ohayi loteke oontamanana. Ombiimbeli otayi ti: “Eyamukulo etalala otali loteke ondjahi, ihe elaka lyoshihanyeko otali tukula ongeyo.” — Omayel. 15:1.
Ngele omuntu okwa popi a geya, ohashi nayipaleke owala onkalo, molwaashono okwa fa owala ta tile omulilo omahooli. (Omayel. 26:21) Mepingathano naashono, ngele omuntu okwa yamukula nombili, olundji ohashi hwepopaleke onkalo. Eyamukulo lyombili ohali kwathele nokuli omuntu ngoka a geya a shune pevi.
Toñi okwa li e shi imonene ko ye mwene. Molwaashoka okwa kala ha yamukula nombili, shoka osha lilitha omukulukadhi. Omukulukadhi okwa yelithile Toñi kutya okwa li a gwililwa po komaupyakadhi ogendji. Toñi okwe mu pe uunzapo uuwanawa noya tameke ekonakonombiimbeli. Shika osha ningwa, omolwuukwatya we mboka uuwanawa wombili nowengungumano.
Ombepo yombili ohayi tu kwathele tu kale twa nyanyukwa. Ombiimbeli otayi ti: “Aanelago oomboka aaifupipiki, oshoka oyo taa ka thigulula evi.” — Mat. 5:5.
Omolwashike mboka ye na ombepo yombili nenge yeifupipiko ya nyanyukwa nenge aanelago? Aantu oyendji mboka ya li haya geye mbala oya nyanyukwa ngashingeyi, molwaashono oya kokeka ombepo yombili. Onkalamwenyo yawo oya hwepopala noye shi kutya oye na etimaumbwile lyonakuyiwa ombwanawa. (Kol. 3:12) Omumwatate Adolfo, ngoka e li omutonatelishikandjo moSpania, ota dhimbulukwa nkene onkalamwenyo ye ya li ya tya, manga inee ya moshili.
Okwa ti: “Onkalamwenyo yandje kaya li yi na elalakano lyasha. Onda li handi geye nziya, naashoka osha ningitha yamwe yomookuume kandje ya kale ya tila ndje, omolwiikala yandje yuuntsa noyelongithonkondo. Hugunina opwa ningwa oshinima shoka sha lundulula onkalamwenyo yandje. Esiku limwe onda li tandi kondjo, e tandi tsuwa nomwele lwiikando ihamano. Onda li nda kanitha ombinzi oyindji nonda li popepi nokusa.”
Omumwatate Adolfo ngashingeyi oha longo yalwe ya kale nombepo yombili, okupitila mokupopya kwe nomeihumbato lye. Aantu oyendji ohaya nanenwa kuye, omolwuukwatya we wohole nosho wo wulwe. Adolfo okwa ti okwa nyanyukwa, omolwomalunduluko ngoka a ninga. Okwa pandula wo Jehova, sho e mu kwathele a kokeke ombepo yombili.
Ombepo yombili ohayi nyanyudha Jehova. Ombiimbeli otayi ti: “Mumwandje, ninga oondunge, u nyanyudhe omwenyo gwandje, opo ndi wape okuyamukula ngoka ta sitha ndie ohoni.” — Omayel. 27:11.
Jehova oha shekwa nenge oha sithwa ohoni komutondi gwe omunenenene Satana Ondiyapoli. Nonando Jehova oku na omatompelo gokugeyela shoka ha ningilwa kuSatana, Ombiimbeli otayi mu popi kutya ‘iha geye mbala.’ (Eks. 34:6) Natu kambadhale okuholela uukwatya waJehova wokukala ihaatu geye mbala nowombepo yombili. Ngele otwe shi ningi, otatu ku ulika kutya otu na uunongo, naashoka otashi ka nyanyudha Jehova. — Ef. 5:1.
Muuyuni mbuka tu li, omu udha aantu haya geye mbala. Otashi vulika tu tsakanene naantu mboka ‘aainomi, aanuuntsa, aasheki, aalundili, aapwidhi naadhudhu.’ (2 Tim. 3:2, 3) Shoka kashi na okwiimba Omukriste a kokeke ombepo yombili. Oohapu dhaKalunga otadhi tu dhimbulukitha kutya ‘uunongo wokombanda owu na wo ombili nolukeno.’ (Jak. 3:17) Ngele otwa kala tatu ulike ombepo yombili noyolukeno, kungawo otatu ulike kutya otu na uunongo mboka wa za kuKalunga. Uunongo mboka otawu ke tu inyengitha tu yamukule nombili, uuna twa geyithwa. Otawu ke tu hedhitha wo popepyeelela naJehova, ngoka e li Onzo yuunongo wa shiga ko.
