YOMARA naamwayinamati, Marcelo naHiver, ohaya zi mokamukunda okashona ke li moGuatemala. Yomara okwa tameke okukonakona Ombiimbeli nOonzapo dhaJehova, nahugunina aamwayinamati nayo oya tameke okukonakona Ombiimbeli. Ihe opwa li pu na uupyakadhi wontumba. Aamwayinathana mboka yatatu ayehe aaposi, nokaya li haya vulu okulesha oondanda dhoshiposi. Onkee ano, omumwatate ngoka a li ha konakona nayo Ombiimbeli okwa li ha lesha uutendo nosho wo omanyolo mOmbiimbeli, ngoka ge li moshileshwa shoka taya kundathana.

Osha li wo oshidhigu kaamwayinathana mboka ya ye kokugongala. Ngele otaya ende kolupadhi, osha li hashi ya pula ominute 40 ya thike kOshinyanga shUukwaniilwa shoka shi li popepi. Ihe aamwatate megongalo ndyoka oya li ya ningi elongekidho ya kale haye ya eta kokugongala. Shimwe ishewe, sho ya tameke okugandja iipopiwa pokugongala kwomokati koshiwike, aamwatate oya li ye ya kwathele ya ilonge iipopiwa yawo momutse.

MuMei mo 2019, momukunda gwawo omwa tamekwa okuningwa okugongala. Ihe pethimbo ndyoka, omwa adhika mwa tembukila aaihokani yamwe aakokolindjila yondjigilile. Aaihokani mbono oya li yi itulile po elalakano lyokulonga aamwayinathana mboka yatatu okulesha nokunyola oondanda dhoshiposi, nonando yo yene kaya li ye shi oku dhi lesha noku dhi nyola. Onkee oya li haya yi kongulumambo ye ke dhi ilonge, opo ya vule oku dhi longa yalwe.

Konima yoomwedhi dhontumba, aamwayinathana mbano yatatu oya li ye shi nawa okulesha oondanda dhoshiposi, shono she ya kwathele ya koleke ekwatathano lyawo naJehova. a Ngashingeyi Yomara, Marcelo naHiver, oye li aakokolindjila yondjigilile. oku li omuyakuligongalo. Momukokomoko gwoshiwike ohaya kala yi ipyakidhila noonkondo nokulongela Jehova. Aalaadhi lela mokulongela Jehova, naashoka ohashi ningitha yalwe nayo ya kale aalaadhi.

Aamwayinathana mbaka yatatu oya pandula ekwatho lyopahole ndyoka haya pewa kegongalo. Yomara okwa ti: “Okuza ngaa esiku ndyoka twa tsakanena nOonzapo dhaJehova, odha kala noku tu ulukila ohole yashili yopaKriste.” Marcelo okwa gwedha ko a ti: “Otu na ookuume aawanawa megongalo lyetu notu li oshitopolwa shuukwanegumbo womuuyuni awuhe mboka wu holathane.” Yomara naamwayinamati oya tegelela nondjuulukwe oku ka mona nkene Jehova ta ningi evi oparadisa. — Eps. 37:10, 11; Jes. 35:5.