AAHEBELI mbono ya li mEvi lyEuvaneko oya li ye shi tala ko kutya omumvo ohagu tameke nokukuna nokupulula, moomwedhi ndhono ngashingeyi hatu ti oSeptemba naKotoba.

Aantu oya li haya yalula kutya omwedhi ogu na uule wu thike peni, shi ikolelela kedhingoloko lyomwedhi ngoka gu na omasiku 29 nenge 30 lwaampoka. Oya li haya tala kutya omumvo omule shi thike peni taya longitha etango. Ihe omumvo ngono gwa yalulwa shi ikolelela kedhingoloko lyomwedhi, omufupi gu vulike komumvo ngono gwa yalulwa shi ikolelela kedhingoloko lyetango. Onkee oya li ya pumbwa okukonga po omukalo gulwe ngono tagu ningitha omikalo ndhoka mbali dhi tse kumwe. Shono oya li haye shi ningi mokugwedha ko omasiku nenge omwedhi, tashi vulika manga omumvo gwa landula ko inaagu tameka. Pamukalo ngoka, okalindeli oka li haka tsu kumwe nethimbo lyokukuna nolyokuteya.

Ihe pethimbo lyaMoses, Kalunga okwa li a lombwele oshigwana she kutya omumvo gwoku mu longela ogwa li gu na okutameka momwedhi Abib, nenge Nisan, poshitemamvula. (Eks. 12:2; 13:4) Oshituthi shimwe sha li hashi ningwa momwedhi ngoka osha li sha kwatela mo okuteya iilya. — Eks. 23:15, 16.

Omulongwantu gumwe okwa ti kutya osha li oshipu okumona kutya uunake aantu ye na okutula mo omwedhi gwa gwedhwa po mokalindeli. Okwa ti: “Oshituthi shOpaasa osha li hashi dhanwa pethimbo lyomwedhi gu li ko gu udha kegulu mo 14 gaNisan, nosha li hashi ningwa poshitemamvula, konima yesiku ndyoka omutenya nuusiku yi na uule wu thike pamwe. Ngele osha li sha ndhindhilikwa mo pehulilo lyomumvo kutya Opaasa otayi ka ningwa manga esiku ndyono lyomutenya nuusiku wu thike pamwe inaali thika, Aajuda oya li haya gwedha ko omwedhi gumwe manga omwedhi Nisan inaagu thika.”

Oonzapo dhaJehova ohadhi longitha omukalo nguka, uuna tadhi tala kutya Uulalelo wOmuwa otawu ningwa uunake, esiku ndyoka hali kala poshitemamvula notali tsu kumwe nomasiku 14 gaNisan mokalindeli kOshihebeli. Omagongalo muuyuni awuhe ohaga lombwelwa kuyele kutya esiku ndyoka uunake. *

Ihe Aahebeli oya li haya mono ongiini kutya omwedhi otagu hulu uunake nomwedhi omupe otagu tameke uunake? Kunena omuntu ohashi vulika owala wu tale mokalindeli hono wu na nenge hono ke li moshikwaelektronika shoye, ihe pethimbo lyOmbiimbeli kasha li oshipu.

Pethimbo lyEyelu lyaNoa, oomwedhi odha li dha tali ka ko kutya odhi na omasiku 30. (Gen. 7:11, 24; 8:3, 4) Ihe konima yethimbo, Aahebeli mokalindeli kawo omwedhi kagwa li guna omasiku 30 komutse. Omwedhi gwawo ogwa li hagu tameke ngele omwedhi omupe gwa tameke okukala gu wetike nziya kegulu. Onkee shono osha li hashi kala omasiku 29 nenge 30, konima ngele omwedhi gwa tetekele gwa pu ko.

Pompito yimwe, David naJonatan oya li ya popi kombinga yomwedhi gumwe ya ti: “Ongula omwedhi omupe.” (1 Sam. 20:5, 18) Onkee osha fa shi li ngeyi kutya sigo omethelemimvo 11 K.E.N., oomwedhi odha li hadhi yalulwa komeho yethimbo. Aaisraeli oya li haya vulu ngiini okumona kutya omwedhi ogwa tameke uunake? Embo Mishnah lyoompango nomithigululwakalo dhAajuda otali gandja uuyelele wumwe. Otali ulike kutya konima sho Aajuda ya galuka muupongekwa muBabilon, Ompangu yopombanda yAajuda oya li ya kwatelwa mo. Momukokomoko gwoomwedhi heyali moka mwa li hamu ningwa iituthi, ompangu ndjoka oya li hayi gongala mesiku eti-30 lyomwedhi. Aalumentu mboka oya li ye na oshinakugwanithwa shokutala kutya omwedhi gwa landula ko otagu tameke uunake. Oya li haye shi ende ngiini?

Aalumentu yamwe oya li haya londo koondundu muJerusalem uusiku ya tale kegulu ngele omwedhi omupe ogwe ya ko, naashoka oya li haye shi lombwele nziya Ompangu yopombanda yAajuda. Ngele Ompangu ndjono oya mono kutya aalumentu mbono oye na uumbangi wi ihwa po kutya omwedhi omupe ogwa monika, oya li hayi ningi etseyitho kutya omwedhi omupe ogwa tameka. Ongiini ngele uusiku mbono okwa li ku na iikogo nenge ondawu ndjono ya ningitha aalumentu mbono kaya mone omwedhi omupe?  Omwedhi mono ya li ogwa li hagu tali ka ko kutya ogu na omasiku 30, opo nduno omwedhi omupe ogwa li hagu tameke.

Embo Mishnah otali yelitha kutya uuna Ompangu yopombanda yAajuda ya ningi etokolo, olya li hali tseyithwa mokutema omulilo kondungu yOndundu yOoholivi popepi naJerusalem. Koondundu dhilwe muIsraeli nako okwa li wo haku temwa omulilo, opo aantu yu uve onkundana ndjoka. Konima yethimbo, aantu oya li haya tumwa ya ka gandje etumwalaka ndyoka. Onkee Aajuda ayehe muJerusalem nomuIsraeli nosho wo momahala galwe oya li haya mono kutya omwedhi omupe ogwa tameka. Kungawo ayehe oya li haya vulu okudhana iituthi yawo pethimbo limwe.

Oshimpungu shoka sha pamba oshitopolwa shika otashi ke ku kwathela wu uve ko oomwedhi, iituthi, nomathimbo gokomumvo yomokalindeli kAahebeli.