OMUSIKA oya li oshitopolwa sha simana lela momuthigululwakalo gwAaisraeli. Ombiimbeli oya popya lwiikando kombinga yaantu taya dhana iihikomwa nokwiimba omaimbilo. Oshitopolwa oshinene shOmbiimbeli osha thikama po momaimbilo. Pashiholelwa, Omapisalomi, Ondjimbolela yaSalomo nOontakumandjimbo, odha nyolwa momukalo gwomaimbilo. Embo Music in Biblical Life, olya ti kutya Ombiimbeli oya ulika sha yela kutya “Aaisraeli oya li haya longitha Ombiimbeli momaipyakidhilo ogendji gonkalamwenyo yayo.”

Omusika monkalamwenyo yakehe esiku. Aaisraeli oya li haya dhana omusika opo ya holole omaiyuvo gawo. (Jes. 30:29) Aakiintu oya li haya hiki uuntunda, haya imbi nenyanyu nokundanisa piituthi ngaashi uuna gumwe ta kwaniilekwa, uuna ya sindana miita nopiituthi yelongelokalunga. (Aatok. 11:34; 1 Sam. 18:6, 7, 1 Ki. 1:39, 40) Aaisraeli oya li wo haya imbi omaimbilo ya holole oluhodhi lwawo uuna gumwe a si. (2 Ondjal. 35:25) Embo lyo-Cyclopedia lyaMcClintock naStrong olya ti osha yela kutya “Aahebeli oya li ye hole omusika noonkondo.”

Omusika mombala. Aakwaniilwa muIsraeli oya li haya nyanyukilwa okupulakena komusika. Omukwaniilwa Saul okwa li a ithana David kombala ye, a kale ha hiki omusika. (1 Sam. 16:18, 23) Konima sho David a ningi omukwaniilwa, okwa li a ningi iihikomwa, a toto po omaimbilo omawanawa nokwa li a unganeke ongundu yaahiki yiihikomwa, ndjoka ya li hayi dhana motempeli yaJehova. (2 Ondjal. 7:6; Amos 6:5) Omukwaniilwa Salomo okwa li e na aaimbi aalumentu naakiintu mombala ye. — Omuuv. 2:8.

Omusika melongelokalunga. Shoka sha simanenena, Aaisraeli oya li haya longitha omusika sho taya longele Jehova. Uushili owo kutya, aalumentu 4 000 oya li haya dhana iihikomwa motempeli muJerusalem. (1 Ondjal. 23:5) Oya li haya dhana iikwelengendji, iihikomwa yi na oongodhi, uuharpa nosho wo omankuma. (2 Ondjal. 5:12) Ihe aalumentu mboka oonkulungu, hayo ayeke ya li haya longele Jehova nomusika. Osha fa shi li ngeyi kutya Aaisraeli oyendji oya li haya imbi omaimbilo, uuna ye li momalweendo gokuya kiituthi yokomumvo muJerusalem. (Eps. 120–134) Sha ikolelela kiinyolwa yOshijuda, Aaisraeli oya li haya imbi Omapisalomi a pethimbo lyuulalelo wOpaasa.

Omaimbilo oga simana natango koshigwana shaKalunga nokunena. (Jak. 5:13) Okwiimba omaimbilo oku li oshitopolwa shokulongela Jehova. (Ef. 5:19) Omusika ohayi tu hanganitha nAakriste ooyakwetu. (Kol. 3:16) Ohayi tu tsu wo omukumo uuna twa gwililwa po. (Iil. 16:25) Omusika oyi li omukalo omwaanawa gwokuulika kutya otu na eitaalo muJehova nosho wo kutya otu mu hole.