1-3. (a) Episalomi 147 olya li lya nyolwa lwopethimbo lini? (b) Oshike tatu vulu okwiilonga mokukonakona Episalomi 147?

UUNA gumwe a longa nawa nenge u ulike uukwatya wopaKriste, oha pandulwa. Ngele shono otatu vulu oku shi ningila aantu, ongiini kombinga yaJehova Kalunga? Otatu vulu oku mu pandula, omolwoonkondo dhe oonene ndhoka dhi iwetikile meshito lye ekumithi. Otatu vulu wo oku mu pandula, omolwohole ndjoka e tu hole, sho a tumu Omwana e tu kulile.

² Omunyoli gwEpisalomi 147 okwa li i inyengithwa a tange Jehova. Okwa li wo a ladhipike yalwe ye shi ninge. — Lesha Episalomi 147:1, 7, 12.

³ Katu shi kutya olye omunyoli gwepisalomi ndyoka, ihe aniwa okwa li ko lwopethimbo sho Jehova a galulile Aaisraeli kuJelusalem okuza muupongekwa waBabilonia. (Eps. 147:2) Sho Jehova a galulile oshigwana she kuJelusalem hoka ku na elongelokalunga lyashili, osha li shi inyengitha omupisalomi a tange Jehova. Okwa li wo a popi omatompelo gamwe goku shi ninga. Ogenipo mbela? Omatompelo geni ge ku inyengitha wi igidhe to ti:  “Halleluja!” monkalamwenyo yoye? — Eps. 147:1.

4. Sho omukwaniilwa Kores a mangulula Aaisraeli muupongekwa, oya li yu uvite ngiini, nomolwashike?

⁴ Dhiladhila nkene Aaisraeli ya li yu uvite, sho ya li muupongekwa muBabilonia. Aahepeki yawo oya ti kuyo: “Tu imbileni omaimbilo taga popi Sion.” Pethimbo ndyoka, Jerusalem, moka ya li haya kala ya nyanyukwa noonkondo sho taya longele Jehova, osha adhika nale sha hanagulwa po. (Eps. 137:1-3, 6) Aajuda kaya li ye na ehalo lyokwiimba. Oya li ye ehamekwa shili koomwenyo noya li ya pumbwa ehekeleko. Ngaashi sha hunganekwa mOmbiimbeli, Jehova okwa li a kwathele oshigwana she. Ngiini mbela? Okwe shi ningi okupitila momukwaniilwa Kores gwaPersia, ngoka a sindi Babilonia, e ta ti: ‘Omuwa okwa pe ndje oshilonga shoku mu tungila otempeli muJerusalem. Ngashingeyi, ne amuhe mboka aantu yaKalunga, indeni ko, nOmuwa, Kalunga keni, na kale pamwe nane!’ (2 Ondjal. 36:23) Shoka osha li sha hekeleke Aaisraeli mboka ya li muBabilonia.

5. Omupisalomi okwa popi shike kombinga yoonkondo dhaJehova dhokwaaludha?

⁵ Jehova ka li owala a hekeleke Aaisraeli ye li oshigwana, ihe okwa li wo e ya hekeleke pauhandimwe. Shoka osho ha ningi nokunena. Omupisalomi okwa nyola kombinga yaKalunga a ti: “Ota aludha mboka ye ehamekwa koomwenyo, nota manga iilalo yawo.” (Eps. 147:3) Odhoshili kutya Jehova oku na ko nasha naamboka ye na uupyakadhi palutu nopamaiyuvo. Kunena, okwa halelela oku tu hekeleka nokupupaleka iilalo yetu yokomwenyo. (Eps. 34:18; Jes. 57:15) Ohe tu pe uunongo noonkondo, opo tu idhidhimikile uupyakadhi kehe tatu iyadha muwo. — Jak. 1:5.

6. Ongiini tatu vulu okumona mo uuwanawa mEpisalomi 147:4? (Tala kethano lyopetameko.)

⁶ Omupisalomi okwa tala kegulu e ta ti: “Otu utha omwaalu gwoonyothi note dhi ithana komadhina.” (Eps. 147:4) Omupisalomi okwa li a tala oonyothi, ihe ka li ta vulu okumona kutya odhi li ngapi. Uule womimvo, oonyothi ndhoka hatu mono, ohadhi ende tadhi indjipala noonkondo. Aantu yamwe ohaya dhiladhila kutya momulalawili gwetu omu na oonyothi omabiliyona. Ohaya ti wo kutya otashi vulika mewangandjo mu na omilalawili omabiliyona eyovi. Aantu itaya vulu okuyalula oonyothi adhihe, ihe Omushiti ote shi vulu, na kehe yimwe ohe yi ithana kedhina. Shono otashi ulike kutya onyothi kehe oyi ikalekelwa momeho gaJehova. (1 Kor. 15:41) Ongiini kombinga yaantu ye mboka a shitila kombanda yevi? Kalunga ngoka e shi onyothi kehe, oku tu shi wo paumwene. Oku shi nawa kehe gumwe mpoka e li, nkene u uvite naashoka a pumbwa.

7, 8. (a) Uuna Jehova ta kwatha aantu ye sho ye li muudhigu, oha gandja eitulomo kushike? (b) Gandja oshiholelwa shoka tashi ulike kutya Jehova oku na ko nasha naantu.

⁷ Jehova ine ku hokwa owala sho wu li omuntu, ihe oku uvite ko wo oonkalo ndhoka to piti mudho noku na oonkondo dhoku ku kwathela muudhigu woye. (Lesha Episalomi 147:5.) Otashi vulika wu kale wu uvite kutya onkalo yoye oya kwata miiti noito vulu oku yi idhidhimikila. Kalunga oku shi omangambeko goye ‘noku shi kutya ngoye ontsi yevi.’ (Eps. 103:14) Ohatu ningi omapuko ga faathana lwiikando, molwaashono inatu gwanenena. Ohatu iyele ombedhi, omolwiinima mbyoka hatu popi, omahalo omawinayi ngoka hatu kala tu na nomolwondumbo ndjoka hatu kala tu na. Jehova iha ningi omapuko, ihe oku shi nkene hatu kala tu uvite, oshoka oku tu shi nawa. — Jes. 40:28.

 ⁸ Otashi vulika wa mona nale nkene Jehova e ku kwathela wu pite muudhigu wontumba. (Jes. 41:10, 13) Natu tale koshiholelwa shomumwameme Kyoko, ngoka e li omukokolindjila. Okwa li a teka omukumo noonkondo, sho a tuminwa kehala lilwe oko a ka kokole ondjila. Jehova okwa li u ulike ngiini kutya oku uvite ko onkalo ye? Aantu oyendji megongalo moka a tembukile oyu ulike kutya oye na ko nasha naye. Okwa li a fa u uvite Jehova te mu lombwele ta ti: “Ondi ku hole, hamolwaasho owala wu li omukokolindjila, ihe oosho wu li omumwandje ngoka i iyapulila ndje. Wu li Onzapo yandje, onda hala wu kale wa nyanyukwa monkalamwenyo.” Omunankondoadhihe okwe ku ulukila ngiini kutya “oondunge dhe kadhi shi kuyelekwa”?

9, 10. Ekwatho lini lya simanenena Jehova he tu pe? Gandja oshiholelwa.

⁹ Omathimbo gamwe otashi vulika oompumbwe dhoye dhi kale dhopalutu. Pashiholelwa, otashi vulika wu kale to ipula kutya ito ka kala wu na iikulya ya gwana. Ihe Jehova okwa shita evi moka hamu mene iikulya ya gwana, nokuli noyuudhilakolagona uuna tawu lili. (Lesha Episalomi 147:8, 9.) Ngele Jehova ota tsikile okupalutha uudhilakolagona, oto vulu okukala wi inekela kutya ote ke ku pa wo shoka wa pumbwa. — Eps. 37:25.

¹⁰ Shoka sha simanenena osho kutya Jehova ohe tu pe iikulya yopambepo nosho wo ‘ombili ye ndjoka yi vule uunongo auhe wopantu.’ (Fil. 4:6, 7) Natu tale koshiholelwa shomumwatate Mutsuo nomukadhi mboka ya mona nkene Jehova e ya kwathela. Sho oshikungulu shekuthikuthi enene ndyoka hali zi mefuta sha dhengele Japani mo 2011, oya li ya hupu, sho ya yi mondunda yopombanda yegumbo lyawo. Moshikungulu moka oya li ya kanithile mo konyala iinima yawo ayihe. Oya kala uusiku awuhe momilema megumbo lyawo ndyoka lya li lya mona iihuna, mondunda ndjoka. Sho kwa shi, oya kongo sha shoka tashi vulu oku ya tsa omukumo. Oya mono embo 2006 Yearbook of Jehovah’s Witnesses. Sho omumwatate Mutsuo a tala mo, okwa mono oshipalanyolo “The Deadliest Tsunamis Ever Recorded” [“Iikungulu yomakuthikuthi mbyoka ya dhipaga aantu oyendji inaashi monika nale”]. Osha li tashi popi kombinga yekakamo lyevi ndyoka lya dhengele Sumatra mo 2004, ndyoka lye etithile iikungulu yomakuthikuthi shimwe to nyengwa mondjokonona. Mutsuo nomukadhi oya tameke okulila sho taya lesha ehokololo ndjoka. Oya li yu uvite Jehova e ya pa etsomukumo ndyoka ya pumbwa. Jehova okwa li wo e ya pe shoka ya pumbwa, okupitila mooitaali ooyakwawo. Ihe shoka sha li she ya tsu omukumo unene, omatalelopo ngoka ga li ga ningwa megongalo lyawo kaakalelipo yehangano lyaJehova. Mutsuo okwa ti: “Onda li ndi uvite Jehova e li pamwe natse note tu sile oshimpwiyu.” Shoka sha simanenena, Jehova ohe tu pe iikulya yopambepo, ihe ohe tu pe wo shoka twa pumbwa palutu.

11. Opo tu mone uuwanawa moonkondo dhaJehova dhokuhupitha, oshike tu na okuninga?

¹¹ Jehova oha kala aluhe i ilongekidha a ‘yambule po aaishonopeki.’ (Eps. 147:6a) Ongiini tatu vulu okumona uuwanawa mokukala kwe i ilongekidha oku tu kwathela? Otu na okukala nekwatathano ewanawa naye. Opo tu kale tu li na, otwa pumbwa okukokeka uukwatya weifupipiko. (Sef. 2:3) Aaifupipiki oyi inekela muJehova a hulithe po okwaahenuuyuuki hoka taya ningilwa niihuna mbyoka taya mono. Aantu ya tya ngawo Jehova okwe ya hokwa.

12, 13. (a) Oshike tu na okuhenuka, opo tu mone mo uuwanawa mekwatho lyaJehova? (b) Jehova oha hokwa aantu yeni?

 ¹² Ombiimbeli otayi ti wo kutya Kalunga “aakaanakalunga ote ya shundula.” (Eps. 147:6b) Inatu hala shoka shi tu ningilwe! Opo tu mone mo uuwanawa mohole yaJehova notu henuke ondjahi ye, otu na okutonda shoka e tonde. (Eps. 97:10) Pashiholelwa, otu na okutonda ohole yiipala. Shino osha kwatela mo kehe shimwe shoka tashi tu fala mepuko ndyoka, mwa kwatelwa okutala omathano giipala. (Eps. 119:37; Mat. 5:28) Otashi vulika shi kale oshidhigu, ihe ngele otwa ningi oonkambadhala, Jehova ote ke tu yambeka.

¹³ Opo tu sindane molugodhi nduno, otu na okukala twi inekela muJehova, ihe hamutse yene. Mbela Jehova ota ka kala ngaa e tu hokwa, ngele otwi inekela ‘moonkondo dhuukambe,’ sha hala okutya, okukonga ekwatho kiinima mbyoka aantu yi inekela? Hasho nando. Katu na okwiinekela “uufule waakwiita,” mokukala tu wete kutya tse yene nenge aantu yamwe otaya vulu oku tu hupitha. (Eps. 147:10) Pehala lyaashono, otu na okugalikana kuJehova e tu kwathele. Ye iha vulwa okupulakena komagalikano getu kutya nduno otatu mu pula lwiikando. Ye ina fa aagandjimayele yopantu. Ombiimbeli otayi ti: “Okwa hokwa mboka haye mu tila noku mu simaneka naamboka haa inekele esilohenda lye.” (Eps. 147:11) Omolwohole ye yuudhiginini, ke na siku e tu ethe, ye ote ke tu kwathela wo tu sinde omahalo ga puka.

14. Uushili wuni wa li wa koleke omupisalomi?

¹⁴ Jehova okwe tu shilipaleka kutya ote ke tu kwathela, uuna twa pumbwa ekwatho lye. Sho omupisalomi gumwe a dhiladhila kombinga yokutungululwa kwaJerusalem, okwi imbi kombinga yaJehova ta ti: “Oye ta koleke omiyelo dhoye nota yambeke aantu yoye. Ota gamene oongamba dhoye.” (Eps. 147:13, 14) Omupisalomi okwa li e na uushili kutya Jehova ota ka koleka omiyelo dhaJerusalem a gamene oshigwana she.

15-17. (a) Omathimbo gamwe ohashi vulika tu kale tu uvite ngiini uuna tu li muudhigu, ihe Jehova oha longitha ngiini Oohapu dhe e tu kwathele? (b) Gandja iiholelwa mbyoka tayi ulike kutya ‘oohapu dhaKalunga ohadhi uvika mbala.’

¹⁵ Otashi vulika wu kale muudhigu mboka we ku lulila. Mbela Jehova ota vulu ngaa oku ku pa uunongo wi idhidhimike? Eeno. Omupisalomi gumwe okwa ti kutya Jehova “ota gandja omalombwelo kombanda yevi, noohapu dhe otadhi uvika mbala.” Opo ihe okwa ti kutya Jehova ‘ota lokitha olumi, ota gundu ombambi notu umbu oompawe.’ Okwa pula wo a ti: “Olye ta vulu okwiitakeka uutalala wombambi?” Okwa gwedha ko ishewe a ti kutya “kelombwelo lye olumi otalu hemuka.” (Eps. 147:15-18) Kalunga ketu omunandunge a shiga ko, ye omunankondoadhihe. Oompawe nosho wo olumi oyi li mepangelo lye. Onkee ano, ota vulu oku ku kwathela wu sinde omaudhigu ngoka to iyadha mugo.

¹⁶ Jehova ohe tu pe ewiliko lye kunena okupitila mOmbiimbeli. Shimwe ishewe, ‘oohapu dhe ohadhi uvika mbala,’ sha hala okutya, oha kala i ilongekidha oku tu pa ekwatho, uuna twe li pumbwa. Ohe tu kwathele momikalo dhini? Omokulesha Ombiimbeli nomokukonakona iileshomwa ‘yomupiya omudhiginini nomunandunge.’ Opu na ishewe opolohalama yetu yotiivii JW Broadcasting nepandja lyetu lyokointaneta, jw.org. Okwe tu pa wo aakuluntugongalo nosho wo aamwatate naamwameme. (Mat. 24:45, NW) Mbela owe shi mona monkalamwenyo yoye nkene oohapu dhaJehova hadhi uvika mbala moku tu wilika?

¹⁷ Omumwameme Simone okwa li ha kala u uvite kee na oshilonga, shoka she mu ningitha a kale a limbililwa ngele Jehova okwe mu  hokwa ngaa. Ihe okwe ke shi imonena ye mwene kutya Oohapu dhaKalunga odhi na oonkondo. Uuna a teka omukumo, oha kala ta galikana a mana mo, ta pula Jehova e mu kwathele. Oha konakona wo Ombiimbeli pandjigilile. Simone ota ti: “Kapu na siku ndi iyadhele monkalo moka Jehova inaa kwathela ndje nokuwilika ndje.” Shono oshe mu kwathele a kale e na omukumo.

18. Omolwashike wu uvite wa hokiwa kuKalunga, nowu na omatompelo geni gokutya “hambeleleni” Jehova?

¹⁸ Omupisalomi okwa li a tseya kutya Jehova okwa li a hokwa oshigwana she shonale. Osho owala sha li sha pewa “oohapu” dhe nosho wo “iipango nomautho ge.” (Lesha Episalomi 147:19, 20.) Kunena otwa yambekwa, sho otse owala hatu ithanwa nedhina lyaKalunga. Otwa pandula sho tu mu shi, sho tu na Oohapu dhe tadhi tu wilike monkalamwenyo yetu naasho tatu vulu okukala nekwatathano lyi ikalekelwa naye. Mbela ku na omatompelo ogendji omawanawa wi igidhe to ti: “Hambeleleni” Jehova! ngaashi omunyoli gwEpisalomi 147? Mbela ito vulu okuladhipika yalwe ya ninge sha faathana?