OOMVULA onshona dha piti, Cesar nosho wo omukadhi, Rocio, oya li ye na onkalamwenyo ombwanawa moCalifornia, moka Cesar a li ha longo nomashina gokupupyaleka nokutalaleka moondunda, omanga Rocio a li ha longele ndohotola omathimbo gamwepo. Egumbo lyawo oya li ye li futa ko, yo kaya li ye na aanona. Ihe opwa ningwa sha shoka sha lundulula onkalamwenyo yawo. Opwa ningwa shike mbela?

MuKotoba 2009, oshitayimbelewa moAmerika osha nyolele omagongalo agehe moshilongo moka ontumwafo, tashi hiya ayehe mboka ye na uunkulungu wokulonga iilonga yontumba ya ninge eindilo lyoku ka longa kObetel pakathimbo, opo ya ka kwathele mokutamununa mo oshitayimbelewa shaWallkill moNew York. Nokuli naamboka omimvo dhawo dha pitilila po pwaandhoka dha pitikwa okutaambwa mObetel oya hiyilwe. Cesar naRocio otaya ti: “Otwa li tu shi kutya shika otashi vulika tashi kala osho oshikando shetu shotango noshahugunina tatu ka longa kObetel, oshoka oomvula dhetu odha konda po pwaandhoka dha pitikwa okutaambwa mObetel. Katwa li twa hala okuhunutha ompito ndjoka!” Aaihokani mbaka oya ningi nziyanziya eindilo lyawo.

Cesar naRocio oya kala uule womvula nasha inaayi ithanwa natango kObetel.Ihe nonando ongaaka, oya katuka natango onkatu yilwe, opo ya vule okwaadha elalakano lyawo monkalamwenyo, sho yi imangulula ko kiimpwiyu yimwe. Cesar ota ti: “Ongalashe yetu otwe yi ningi okafuleta, opo tu hiilithe egumbo lyetu. Opo ihe otwa tembuka mo megumbo lyetu enene ndyoka opo owala twa tungile omimvo omishona dha piti notu li hole, e tatu tembukile mokafuleta. Okuninga omalunduluko ngaka okwe tu kwathele tu mone ompito ombwanawa yokuya kObetel ngele otwi ithanwa.” Oshike sha ningwa po? Rocio ota ti: “Konima yomwedhi okuza sho twa tembukile mokafuleta, otwi ithanwa tu ka longe koWallkill uule wokathimbo. Osha li she tu yelele kutya Jehova okwa hokwa omalunduluko ngoka twa ningi monkalamwenyo yetu, e te tu yambeke.”

Aamwatate naamwameme oyendji oya ninga omaiyambo ngaashi Cesar naRocio, opo ya vule oku ka longa komatungo ngoka taga tungwa moNew York. Oyendji yomuyo otaya kwathele okutamununa mo omatungo koWallkill, nayalwe oyendji otaya kwathele okutunga oombelewa dhetu oonene moWarwick. * Aaihokani oyendji oya thigi po omagumbo gawo omawanawa, iilonga iiwanawa niinamwenyo yawo yomegumbo, opo ya longele Jehova ya manguluka. Mbela Jehova okwe ya yambeke sho yi iyamba? Osho lela!

Pashiholelwa, Way, ha longo nomalusheno nosho wo omukadhi Debra, ye na oomvula omilongo 50 nasha, oya landitha po egumbo lyawo nosho wo iinima yawo oyindji moKansas e taya tembukile koWallkill ya ka longe kObetel haya zi pondje. * Nonando oya li ye na okuninga omalunduluko monkalamwenyo, inaya ipa uusama omolweiyambo ndyoka ya ninga. Debra okwa popi kombinga yiilonga mbyoka a pewa mObetel a ti: “Omathimbo gamwe ohandi kala ndi wete nda fa tandi tungu ndi li mOparadisa, ngaashi hashi ulikwa momathano miileshomwa yetu!”

Melvin naSharon oya landitha po egumbo lyawo niinima yawo moSouth Carolina, opo ya vule oku ka kwathela koWarwick. Ihe nonando kasha li oshipu oku shi ninga, oya li ye wete shi li uuthembahenda oku ka kwathela moshilonga shoka itaashi ka dhimbiwa nando. Otaya ti: “Ohashi tu nyanyudha noonkondo adhihe, sho tu shi kutya otatu longo iilonga mbyoka tayi kwathele ehangano muuyuni awuhe.”

Kenneth, omutungi a penzelwa nomukadhi Maureen, mboka ye na oomvula 50 nasha, oya tembuka mo moCalifornia ya ka longe koWarwick. Opo ya vule oku shi ninga, oya pula omumwameme megongalo a kale ta sile egumbo lyawo oshimpwiyu, e taya pula ekwatho kaakwanezimo ya tonatele he yaKenneth ngoka a kulupa. Mbela oyi ipa uusama sho taya longo kObetel? Aawe! Kenneth ota ti: “Otwa mona mo uuwanawa kwaa na we. Mbela katu na omashongo ga sha? Otu na, ihe onkalamwenyo yetu ombwanawa, notatu ladhipike yalwe nomutima aguhe nayo ye shi ninge.”

Oyendji yomwaamboka yi iyamba ya ka kwathele oya taaguluka omandangalati gontumba. Pashiholelwa, William naSandra, ye na oomvula 60 nasha, oya li taya nyanyukilwa onkalamwenyo yawo moPennsylvania noya li ya thuwa. Oya li ye na ongeshefa yokuninga iitenda yomashina, ndjoka ya li tayi ende nawa noyi na aaniilonga 17. Oya li megongalo  moka ya putukila. Aakwanezimo yawo oyendji nayo ohaya kala moshitopolwa shoka. Sho ya mono ompito okuya kObetel, oya li ye shi shi kutya oye na okuthiga po ookuume naakwanezimo niinima ayihe mbyoka yi igilila. William ota ti: “Shoka sha li oshidhigu unene, okuthiga po onkalamwenyo yetu ombwanawa.” Ihe nando ongaaka, konima sho ye shi tula megalikano oya tokola ya tembuke noinaya ipa nando uusama. William ota ti: “Enyanyu ndyoka tu na sho tatu kutha ombinga miilonga mbika naasho tatu longo pamwe nAabetel kali shi nando okuyelekwa nasha. Ngame naSandra inatu nyanyukwa nando onale ngeyi!”

Ricky, menindjela gwooproyeka dhokutunga moHawaii, okwa hiyilwe a ka kwathele nokutunga koWarwick, ta zi pondje yaBetel. Sho ya hiywa kObetel, omukulukadhi gwe, Kendra, okwa li a halelela ya ye. Ihe oya li tayi ipula unene nokamwanamati, Jacob, hoka ke na oomvula 11. Oya li tayi ipula ngele oshi li ngaa pandunge ya tembukile koNew York, nongele okamwanamati otake ki igilila ko ngaa.

ota ti: “Oshinima shimwe sha simanenena kutse osha li okukonga egongalo moka mu na aagundjuka oyendji yepipi lye taye shi enditha nawa pambepo. Otwa li twa hala Jacob a kale e na ookuume oyendji aawanawa.” Megongalo moka yi iyadha kamu na uunona owundji, ihe omu na Aabetel oyendji. Ricky ota ti: “Konima yokugongala kwetu kwotango, onda pula Jacob kutya oku uvitile ngiini egongalo lyetu epe, unene tuu sho kaamu na aagundjuka yepipi lye. Okwa lombwele ndje ta ti: ‘Kashi na mbudhi tate, otandi ka panga uukuume naagundjuka Aabetel.

Osha yele kutya Jacob okwa panga uukuume naagundjuka Aabetel. Oshike sha ka ningwa po konima? Ricky ota ti: “Ongulohi yimwe sho nda piti pondunda yokamwandjemati, onda mono kutya olamba yako oya tema natango. Onda li ndi shi otandi adha taka dhana uudhano wokiikwaelektronika, ihe oka li taka lesha Ombiimbeli. Sho Jacob nde mu pula kutya ota ningi shike, okwa ti: ‘Otandi ningi ngaashi aagundjuka yokObetel. Onda hala okulesha Ombiimbeli muule womvula yimwe.’” Otatu vulu okutya Ricky naKendra oya nyanyukwa sho Ricky ta vulu okukwathela miilonga yokutunga koWarwick nosho wo sho okamwanamati kawo taka humu nawa komeho pambepo.— Omayel. 22:6.

Mboka taya kwathele miilonga yokutunga poWallkill naWarwick, oye shi shi kutya otaye yi longo owala pakathimbo, oshoka onayi ka pwe.Mbela aamwameme naamwatate mbaka otayi ipula unene kutya otaya ka ya peni notaya ka ninga shike monakuyiwa? Aawe. Oyendji otaya tsu kumwe naJohn naCarmen, aanandjokana ya za koFlorida, mboka ye li mepipi lyomimvo 50 nasha. John, omenindjela  yokutunga, nomukadhi Carmen, haya kwathele koWarwick, otaya ti: “Otwa mona nkene Jehova a kala noku tu sila oshimpwiyu sigo oompaka. Ohatu dhiladhila kutya Jehova ine tu eta owala huka, ye monakuyiwa e tu ethe.” (Eps. 119:116) Luis, ha longo nuupomba wokudhima omulilo nosho wo omukadhi, Quenia, ohaya kwathele koWallkill. Oya ti: “Otwa mona nkene Jehova e tu pa kehe shimwe shoka twa pumba. Nonando katu shi kutya otatu ka hupa ngiini, nenge openi tatu ka kala, otwi inekela kutya ote ke tu sila aluhe oshimpwiyu.”— Eps. 34:10; 37:25.

Oyendji mboka taya kwathele nokutunga moNew York oya li taya vulu okutya itaya vulu okukwathela. Ihe oya yeleke Jehova ngaashi e tu pula tu shi ninge, sho a ti: “Yelekii ndje, notamu ka mona, sho tandi egulula oombende dhokegulu, ndi mu lokithile eloolo lyomaliko guuyamba owindji.”— Mal. 3:10.

Mbela nangoye oto ka yeleka Jehova opo e ku yambeke? Galikana e to tala kutya oshike to vulu okuninga, opo wu vule okukutha ombinga miilonga yinyanyudha, kutya nduno omoNew York nenge omiilonga yilwe yokutunga, e to mono nkene Jehova te ku yambeke. —  Mark. 10:29, 30.

Dale, engombatungi, nomukadhi Cathy, ya za koAlabama, otaya popile oshilonga shika.Oya popi kombinga yokukwathela koWallkill ya ti: “Ngele owu na oonkondo okuninga shoka inoo igilila, oto ka mona nkene ombepo yaJehova tayi ku kwathele.” Mbela owa pumbwa okuninga shike opo wu ka kwathele? Dale ota ti: “Imangulula ko kokukala niimpwiyu oyindji. Ngele owe shi ningi, ku na siku wu ki ipe uusama!” Gary, a za koNorth Carolina, okwa kala ta longo uule woomvula 30 miilonga yokutunga. Ye nomukadhi, Maureen, otaya ti kutya limwe lyomomayambeko ngoka ya mona sho taya longo koWarwick “okutseyathana nokulonga pamwe naamwatate nonaamwameme mboka ya kala taya longele Jehova kObetel onkalamwenyo yawo ayihe.” Gary ota ti: “Opo wu vule okulonga kObetel owa pumbwa okushonopeka omaliko goye nokwiimangulula ko kiimpwiyu oyindji. Nguka ogwo omukalo omwaanawaelela gwonkalamwenyo momasiku ngaka gahugunina.” Jason, ngoka a li ha longele ongeshefa yiikwamalusheno nosho wo Jennifer, mboka ya za koIllinois, oya popi ngeyi kombinga yokulonga koWallkill: “Otwa fa owala tu li muuyuni uupe.” Jennifer ota gwedha ko ta ti: “Ohashi nyanyudha noonkondo okutseya kutya kehe shoka tatu ningi mpaka osha hokiwa kuJehova noshi na ongushu kuye sigo aluhe. Jehova oha si oshimpwiyu kutya ote ku laleke lela nuuyamba.”