IITOPOLWA YI IKOLELELA KOSHIPALANYOLO SHOKOMBANDA | OTO VULU OKUHEDHA POPEPI NAKALUNGA
Mbela owu uvite ngaa wa hedha popepi naKalunga?
“Okukala nekwatathano lyopothingo naKalunga ohaku ku ningitha wu kale wu uvite wa gamenwa, wa gwanenwa nowu na ekankameno. Oho kala wu uvite kutya Kalunga ote ku ningile aluhe uuwanawa.”— CHRISTOPHER, OMULUMENTU OMUGUNDJUKA GWOKOGHANA.
“Kalunga oha kala e ku wete aluhe uuna wu uvite uukweyi, he ku ulukile ohole yi vule ndjoka wa tegelela kuye.”— HANNAH NGOKA E NA OOMVULA 13, GWOKOALASKA, U.S.A.
“Oshi li eiyuvo ewanawa kaaku na we okukala wu shi kutya owu na ekwatathano lyopothingo naKalunga!”— GINA, OMUKIINTU OMUJAMAIKA NGOKA E LI POOMVULA 40 NASHA.
Christopher, Hannah, naGina hayo ayeke haya kala yu uvite ngaaka. Aantu oyendji muuyuni awuhe oya tompwa kutya Kalunga oha kala e ya tala ko ye li ookuume ke. Ongiini kombinga yoye? Mbela owu uvite ngaa wu na ekwatathano lyopothingo naKalunga? Nenge pamwe owu wete wa pumbwa okukala wu li na? Otashi vulika wu na omaipulo kutya: ‘Mbela otashi wapa ngaa shili komuntu gwowala a kale e na ekwatathano lyopothingo naKalunga Omunankondoadhihe? Ngele osho, owu na oku shi enda ngiini?’
OKUKALA NEKWATATHANO NAKALUNGA OTAKU WAPA
Pakupopya kwOmbiimbeli, otashi wapa okukala nekwatathano lyopothingo naKalunga. Ombiimbeli oya ti kutya Kalunga okwa li i ithana Omuhebeli tatekulululwa Abraham ‘kuume kandje.’ (Jesaja 41:8) Ndhindhilika wo eindilo lyopahole ndyoka lya nyolwa muJakob 4:8 taku ti: “Hedheni kuKalunga, ye nota hedha kune.” Kungawo, osha yela kutya okukala nekwatathano lyopothingo, sha hala okutya uukuume naKalunga otaku wapa. Ihe molwaashoka Kalunga iha monika, ongiini to vulu ‘okuhedha’ popepi naye nokukala nekwatathano lyopothingo naye?
Opo tu mone eyamukulo lyepulo ndyoka, dhiladhila kwaashoka hashi ningwa mokukokeka uukuume pokati komuntu nomuntu. Pakukala ohashi tameke naantu yaali taya tseyathana komadhina. Opo nduno, sho haya popi olwindji, taya lombwelathana omaiyuvo gawo uukuume wawo ohawu kolo. Nuuna haya kambadhala okuningilathana iinima yontumba, ekwatathano lyawo ohali kolo. Otashi vulu okukala sha faathana nokukokeka ekwatathano lyopothingo naKalunga. Natu ka tale kutya ongiini shika sha faathana.
Opu na ishewe uuyelele mbuka
OSHUNGOLANGELO
Mbela owu shi ngaa edhina lyaKalunga noho li longitha?
Kalunga okwe tu lombwela kutya oye lye sho a ti: “Ongame Jehova. Ndyoka olyo edhina lyandje.”
