Onda valelwa moSzékesfehérvár, moHungary, oshilando shi na ondjokonona onde, ya za nale oomvula 1 000 dha ka pita. Shiyemateka, otandi dhimbulukwa natango iiyadhi iinyanyalithi mbyoka ya li ye etithwa kiita iitiyali yuuyuni.

Onda putukila pookuku. Otandi ya dhimbulukwa nohole, unene tuu kuku Elisabeth. Okwa kwathela ndje ndi kale neitaalo lya kola muKalunga. Sho ndi na oomvula ndatu, onda kala handi endulula naye egalikano ndyoka haku tiwa egalikano lyOmuwa ongulohi kehe. Ihe nonando ongawo, sho tandi ihilile poomvula 30 opo owala ndu uvu ko egalikano ndyoka.

Ookuku oyo ya li haya sile ndje oshimpwiyu sho nda li omushona molwaashoka aavali yandje oya li haya longo omutenya nuusiku, opo anuwa ya gongele iimaliwa ya gwana yokulanda egumbo lyuuzeko. Ihe mOlyomakaya ontiyali yomomwedhi kehe, uukwanegumbo awuhe owa li hawu li uulalelo pamwe. Onda li ndi hole omathimbo ngoka twa li hatu nyanyukilwa pamwe.

Mo-1958, ondjodhi yaavali yandje osho ya tsu; oya li ya vulu okulanda egumbo ndyoka twa li tatu vulu okukala atuhe yatatu. Hugunina, onda li nda vulu okukala naavali yandje, nonda li nda nyanyukwa noonkondo! Ihe konima yoomwedhi hamano, enyanyu ndyoka olya kana po ombaadhilila. Tate okwa si kokaankela.

Onda li nda dhengwa pomutima. Otandi dhimbulukwa tandi galikana tandi ti: “Kalunga, otandi ku indile wu hupithe tate. Onde mu pumbwa. Omolwashike inoo yamukula omagalikano gandje?” Onda li nda halelela okutseya kutya tate oku li peni. Ondi ipula kutya: ‘Mbela okwa ya megulu? Nenge pamwe okwa hulu ko owala noitandi ke mu mona we?’ Onda li handi kala nda sila efupa aanona mboka ye na oohe.

Uule woomvula odhindji, onda li handi yi komawendo esiku kehe. Onda li handi tsu oongolo pewendo lyatate e te galikana: “Kalunga, kwathela ndje, onda hala okutseya kutya tate oku li peni.” Onda li wo handi galikana opo a kwathele ndje ndu uve ko kutya elalakano lyonkalamwenyo olyashike.

Sho ndi na oomvula 13, onda li nda tokola ndi ilonge Oshindowishi. Onda li nda dhiladhila kutya pamwe miileshomwa oyindji yOshindowishi, otandi adha mo omayamukulo gomapulo  gandje. Mo-1967, onda li nda tameke okwiilonga mondoolopa yaJena, oshitopolwa shi li kUuzilo waNdowishi. Onda li handi lesha nuulaadhi omambo ngoka ga nyolwa kaafilosofi Aandowishi, unene tuu ngoka taga popi kombinga yeityo lyokukala po kwaantu. Nonando onda li nda mono mo omadhiladhilo omahokithi, kapu na nando olimwe lya li lya mbilipaleke ndje. Onda tsikile okugalikana ndi mone omayamukulo.

Mo-1970, onda galukile koHungary, hoka nda tsakanene naRose, ngoka a ka ninga omukulukadhi gwandje. Pethimbo ndyoka, Hungary osha li kohi yepangelo lyUukomunisi. Sho opo twa hokana, ngame naRose otwa yi koAustria. Elalakano lyetu olya li okuya koSydney, shomuAustralia, hoka kwa li tatekulu.

Onda mono iilonga nziya moAustria. Esiku limwe, omuniilonga pamwe nangame okwa lombwele ndje kutya otandi vulu okumona omayamukulo komapulo gandje agehe mOmbiimbeli. Okwa pe ndje omambo ngoka taga popi kombinga yOmbiimbeli. Onde ga lesha nuulaadhi nonda li nda hala okwiilonga oshindji. Onkee onda nyolele kondjukithi yimwe yOonzapo dhaJehova, aanyanyangidhi yomambo ngoka, nonda pula ya tumine ndje iileshomwa oyindji.

Esiku lyedhimbuluko lyotango lyohango yetu, ngame naRose otwa li twa talelwa po komugundjuka Onzapo Omuaustria. Okwa li e etele ndje iileshomwa mbyoka nda pula nokwa konakona nangame Ombiimbeli, ekonakono ndyoka nda li nda taamba ko. Molwaashoka onda li nda halelela okwiilonga, otwa li hatu lesha naye lwaalwi moshiwike nekonakono kehe olya li hali kwata konyala oowili ne.

Onda li nda nyanyukilwa shoka Oonzapo dha longo ndje okuza mOmbiimbeli. Sho dhu ulukile ndje edhina lyaKalunga, Jehova, mOmbiimbeli yandje yOshihungary, kanda li tandi vulu oku shi itaala. Muule woomvula 27 ndhoka nda kala handi yi kongeleka, kanda li ndu uva nando edhina lyaKalunga lya tumbulwa nando olumwe. Onda li nda kuminwa omayamakulo ga yela ga za mOmbiimbeli gomapulo gandje. Pashiholelwa, ondi ilongo kutya oonakusa kaye na mpoka yu uvite, oya fa owala ye li moomposi dhoshitula. (Omuuvithi 9:5, 10; Johannes 11:11-15) Onda li wo ndi ilongo kombinga yeuvaneko lyOmbiimbeli lyuuyuni uupe moka ‘itaamu ka kala we eso.’ (Ehololo 21:3, 4) Ondi inekela kutya otandi ka mona tate ishewe, molwaashoka muuyuni mboka uupe, ‘otaku ka kala eyumuko.’ —  Iilonga 24:15.

Rose okwa tameke okukonakona Ombiimbeli pamwe nangame nomutima aguhe. Otwa ningi ehumokomeho nziya, notwa mana okukonakona oshileshomwa shekonakono muule owala woomwedhi mbali! Otwa li hatu kala pokugongala kehe kwOonzapo pOshinyanga shUukwaniilwa. Otwa li twa kuminwa noonkondo ohole, ekwatho nuukumwe mokati kOonzapo dhaJehova. — Johannes 13:34, 35.

Mo-1976, ngame naRose otwa pitikilwa moAustralia. Otwa li twa mono mo nziya Oonzapo dhaJehova. Oonzapo moshitopolwa odhe tu taamba ko nehalo ewanawa. Mo-1978, otwa ningi Oonzapo dhaJehova.

Onda mona omayamukulo komapulo ngoka ga kala ga limbilika ndje ethimbo ele. Sho ngashingeyi ndi li popepi naJehova Kalunga, onda mona wo Tate a dhenga mbanda. (Jakob 4:8) Netegameno lyandje lyoku ka mona tate ngoka a vala ndje muuyuni uupe mboka tawu ya otali ti sha lela kungame. — Johannes 5:28, 29.

Mo-1989, ngame naRose otwa tokola tu galukile koHungary opo tu vule okulombwela ookuume naakwanezimo, nosho wo yalwe kombinga yaashoka twi itaala. Otwa mona uuthembahenda wokulonga aantu omathele Ombiimbeli. Ye vulithe po-70 yomuyo oye tu waimina mokulongela Jehova, mwa kwatelwa meme omuholike.

Onda galikana uule woomvula 17 opo ndi mone omayamukulo komapulo gandje. Opwa pita wo oomvula 39, notandi tsikile okugalikana, ihe ongashingeyi owala tandi vulu okutya, “Tangi, Tate gwomegulu omuholike, sho wa yamukula omagalikano gandje gokuunona.”