Uuna wu uvu uutumbulilo “ehulilo lyuuyuni,” oshike hashi ya momadhiladhilo goye? Mbela ohamu ya omusita tu uvitha muule e li koalitali e na Ombiimbeli meke, ye ta ningi omayinyengo gaa shi gopaunshitwe? Nenge ohamu ya omulumentu a kulupa a thikama mepandaanda, a zala onguwo onde ya mangwa moombwetelo e na omandhindhiliko getumwalaka lyehulilo lyuuyuni? Omandhindhiliko ngoka otashi vulika ga ningithe aantu yamwe ya kale tayi ipula, omanga yalwe ya limbililwa nenge ya nyanyukwa nokuli.

Ombiimbeli otayi ti: ‘Ehulilo otali ya.’ (Mateus 24:14) Ehulilo otali ithanwa wo “esiku enene lyaKalunga” nenge “Armagedon.” (Ehololo 16:14, 16) Odhoshili kutya opu na engwangwano momalongelokalunga shi na ko nasha nesiku ndika etilithi. Ogendji oge li momilema dhopathaneko, oshoka kage na ontseyo yashili kombinga yalyo. Ihe nonando ongawo, Ombiimbeli oya yelitha nawa kombinga yehulilo noya holola nawa kutya ehulilo oshike noka li shi shike. Oohapu dhaKalunga otadhi tu kwathele nawa tu mone kutya ehulilo oli li popepi. Sha simanenena, otadhi tu longo nkene tu na oku ka hupa! Tango, natu popye omauvoko gamwepo ga puka noku ga yelitha. “Ehulilo” otali ti lela shike shi ikolelela kOmbiimbeli?

1. EHULILO KALI SHI EHANAGULO LYEVI NOMULILO OMUNENE.

   Ombiimbeli otayi ti: ‘Kalunga okwa tula evi komakankameno ga kola, itali tenguka.’ (Episalomi 104:5) Enyolo ndika nosho wo galwe otage tu shilipaleke kutya Kalunga ita ka hanagula po nando evi noita ka etha nando li hanagulwe po! —  Omuuvithi 1:4; Jesaja 45:18.

2. EHULILO KALI SHI OSHINIMA INAASHI LONGEKIDHWA.

   Ombiimbeli otayi ti kutya ehulilo olya longekidhwa kuKalunga nokwe li tulila po esiku lyokondandalunde. Otayi ti: “Esiku notundi ndjoka kaku na ngoka e yi shi, nando aayengeli yomegulu nenge Omwana, oTate awike. Kotokeni ano, ne mu tonate, oshoka inamu tseya kutya ethimbo otali thiki uunake.” (Markus 13:32, 33) Osha yela kutya Tate Kalunga okwa longekidha “ethimbo” lyokondandalunde sho te ke eta ehulilo.

3. EHULILO KALI SHI OSHINIMA TASHI KE ETWA KAANTU NENGE KOMATUNGO NGOKA TAGA KA NGUMUKA PO.

   Oshike tashi ka eta ehulilo? Ehololo 19:11 otayi ti: “Nena onda mono egulu lye eguluka nomo mwa li mu na okakambe okatokele. Omukayili gwako ohi ithanwa Omwiinekelwa nOmunashili.” Ovelise 19 oya tsikile ko tayi ti: “Nena onda mono oshilikama naakwaniilwa yokombanda yevi nomatanga gaakwiita ya gongala, ya kondjithe ngoka a londa okakambe naakwiita ye.” (Ehololo 19:11-21) Nonando Oohapu ndhika odhopathaneko, osha yela kutya: Kalunga ota ka tuma etangakwiita lyaayengeli ye ya hanagule po aatondi ye.

1. OMAPANGELO GOPANTU OTAGA KA HULITHWA PO.

   Ombiimbeli otayi yelitha kutya: “Pomasiku gaaleli mboka Kalunga komegulu ota ka dhika po oshilongo shoka shaa na hulilo. Itashi ka sindika nando,  ihe otashi ka yonagula po iilongo mbyoka ayihe, nosho shene otashi kala sigo aluhe.” (Daniel 2:44) Ngaashi sha tumbulwa moshitsa oshititatu, otapu ka kala ehanagulo ‘lyaakwaniilwa yokombanda yevi nomatanga gaakwiita gawo,’ mboka taya ka ‘gongala ya kondjithe ngoka a londa okakambe naakwiita ye.’ —  Ehololo 19:19.

2. IITA, ELONGITHONKONDO NOKWAAHE NA UUYUUKI OTAYI KA HULITHWA PO.

   Ombiimbeli otayi ti: “[Kalunga] ota hulitha po omalugodhi kombanda yevi alihe.” (Episalomi 46:9) “Oshoka aayuuki otaa kala moshilongo, naakaanashipwe oyo taa thigala mo, ihe aakaanakalunga otaa ka kombwa mo moshilongo naakaanuudhiginini otaa ka nakulwa mo.” (Omayeletumbulo 2:21, 22) “Tala, ngashingeyi iinima ayihe otandi yi ningi iipe!” —  Ehololo 21:4, 5.

3. OMALONGELOKALUNGA NGOKA GA NDOPA OKUHANGANITHA AANTU NAKALUNGA OTAGA KA HULITHWA PO.

   Ombiimbeli otayi ti: “Aahunganeki otaa hunganeke iifundja, aayambi otaa pangele pamalombwelo gaahunganeki. . . . Ihe otaa ka ninga shike, ayihe nge ya hulu po?” (Jeremia 5:31) “Mesiku ndyoka oyendji otaa ka lombwela ndje taa ti: ‘Omuwa, Omuwa! Hatse tuu mboka tu uvitha medhina lyoye notwa tidha mo oompwidhuli medhina lyoye notwa longo iilongankondo oyindji medhina lyoye?’ Nena ongame tandi ya lombwele: ‘Kandi mú shi noshitonale. Zii po pungame, one aakolokoshi!’” —  Mateus 7:21-23.

4. AANTU MBOKA HAYA AMBIDHIDHA IINIMA YUUYUNI OTAYA KA HULITHWA PO.

   Jesus Kristus okwa ti: “Ihe epangulo oli li mpoka kutya uuyelele owe ya muuyuni, ihe aantu oye hole omilema shi vulithe pokuhola uuyelele, oshoka iilonga yawo iiwinayi.” (Johannes 3:19) Ombiimbeli otayi popi ehanagulo lyuuyuni ndyoka lya ningwa pethimbo lyaNoa ngoka a li omudhiginini. Otayi ti: “Nokomeya geyelu wo uuyuni owa hanagulwa po. Ihe omagulu nevi sho yi li ko sigo onena, oya gamenenwa po kohapu tuu ndjoka yaKalunga, yi ka hanagulwe po nomulilo. Oya pungulilwa esiku, uuna aakeenakonashanakalunga taa ka pangulwa notaa ka yonagulwa po.” —  2 Petrus 3:5-7.

Ndhindhilika kutya ‘esiku lyepangulo nolyehanagulo’ ndyoka tali ya, otali yelekanithwa nehanagulo ‘lyuuyuni’ wopethimbo lyaNoa. Uuyuni wuni wa li wa hanagulwa po? Evi kalya li lya hanagulwa po; ihe “aakeenakonashanakalunga” mboka ye mu tonde oyo ya li ya “hanagulwa po.” “Esiku lyepangulo” ndyoka tali ya, aatondi yaKalunga otaya ka hanagulwa po. Ihe mboka ye li ookuume kaKalunga otaya ka gamenwa, ngaashi Noa nuukwanegumbo we. —  Mateus 24:37-42.

Dhiladhila owala nkene evi tali ka kala konima ngele Kalunga a hanagula po aakolokoshi ayehe! Osha yela kutya etumwalaka lyOmbiimbeli kombinga yehulilo oli li onkundana ombwanawa, ihe ka yi shi ombwinayi. Natango, otashi vulika wu kale to ipula kutya: ‘Ombiimbeli oye tu lombwela ngaa kutya ehulilo otali ya uunake? Mbela oli li popepi? Mbela otandi ka hupa ngaa ngele lye ya?