1, 2. (a) Josef naanegumbo lye oya li ye na okuninga omalunduluko geni? (b) Josef okwa li e na okulombwela omukadhi onkundana ombwinayi yini?

JOSEF okwa tumbile ishewe omutenge omukwawo kombunda yokasino. Kala ando wa fa wu mu wete ongulohi yimwe e li momukunda gwaBetlehem ta lengalenga ye ta thengathenga okasino ke lwomoombati. Osha yela kutya okwa li ta dhiladhila kombinga yolweendo olule lwe ya taalela, oku ka thika kuEgipiti. Mbela ye nomukadhi nokanona otaya ka vula ko ngaa koshilongo hoka ku na aantu kaaye ya shi, elaka kaaye li shi nosho wo omithigululwakalo kaaye dhi shi?

² Kasha li oshipu kuJosef okulombwela Maria, omukulukadhi gwe omuholike, onkundana ndjoka ombwinayi, ihe okwa tula omwenyo mombinzi e te shi ningi. Okwe mu lombwele kombinga yondjodhi ndjoka a yaguma moka omuyengeli e mu lombwele etumwalaka lya za kuKalunga tali ti kutya omukwaniilwa Herodes okwa hala okudhipaga okamwanamati kawo. Oya li ye na okuza mo meendelelo. (Lesha Mateus 2:13, 14.) Maria okwa li ti ipula noonkondo. Akwetu olye a hala okudhipaga okamwana hoka kaake na ondjo yasha ko itaaka vulu okumonitha omuntu oshiponga? Maria naJosef kaya li ye shi uvite ko. Ihe oya li yi inekele ewiliko lyaJehova e tayi ilongekidhile ondjila.

3. Hokolola olweendo lwaJosef noyaandjawo okuza muBetlehem. (Tala wo ethano.)

³ Ongulohi yimwe manga aantu ayehe muBetlehem ya kotha noinaaya nongela shoka tashi ningwa po, Josef, Maria naJesus oya zi mo momukunda ngoka. Otashi vulika Josef a li ti ipula naashoka ta ka adha hoka ta yi sho taya ende yu uka lwokuumbugantu yo ye wete kuuzilo taku ende taku yele. Ongiini omuhongi gwiipilangi omwiifupipiki a li ta ka gamena omukadhi nokamwana kaantu aanankondo? Mbela ota ka vula ngaa oku ya sila aluhe oshimpwiyu? Mbela ota ka vula ngaa okudhiginina oshinakugwanithwa shoka a pewa kuJehova Kalunga shokusila oshimpwiyu nokuputudha okanona hoka ki ikalekelwa? Josef okwa li e na oshinakugwanithwa oshinene lela. Sho tatu ka tala kunkene Josef a li e shi gwanitha po, otatu ka mona kutya omolwashike aasamane aavali nosho wo atuhe kunena twa pumbwa okulandula oshiholelwa she sheitaalo.

4, 5. (a) Ongiini onkalamwenyo yaJosef ya lunduluka thiluthilu? (b) Ongiini omuyengeli a li a ladhipike Josef a taambe oshinakugwanithwa shoka oshinene?

⁴ Oomwedhi opo owala dha piti, onkalamwenyo yaJosef oya li ya lunduluka noonkondo sho a yaleke okamwanakadhona kaEli komomukunda gwawo, Nasareti. Josef okwa li e shi kutya Maria okakadhona okayogoki pamikalo noke shi okwiinekelwa. Ihe e ku uve anuwa oke na epunda! Okwa li a hala e ka henge po ongumitila opo kaaka se ohoni. * Ihe omuyengeli okwe mu lombwele mondjodhi kutya Maria okwa ningi omusimba kombepo ondjapuki yaJehova. Omuyengeli okwe mu lombwele wo kutya okanona hoka Maria ta ka mona otaka ka ‘hupitha aantu moondjo dhawo.’ Okwa shilipaleke wo Josef a ti: “Ino tila okukutha Maria, a ninge omukiintu gwoye.” —  Mat. 1:18-21.

⁵ Molwaashoka Josef okwa li omulumentu omuyuuki nomuvuliki, osho a ningi. Kungeyi okwa taamba ko oshinakugwanithwa oshinene shokuputudha nokusila oshimpwiyu okanona hoka haaye e ka vala, hoka ka li ka simana noonkondo kuKalunga. Konima, Josef nomukadhi, ngoka pethimbo mpoka a li e li metegelelo, oya yi kuBetlehem ye ki inyolithe, palombwelo lyomukwaniilwa. Okanona oko ka ka valelwa hoka.

6-8. (a) Iiningwanima yini ya li ya ningitha onkalamwenyo yaJosef negumbo lye yi lunduluke ishewe? (b) Uumbangi wuni tawu ulike kutya “onyothi” oya li ya tumwa kuSatana? (Tala wo enyolo lyopevi.)

⁶ Josef naanegumbo lye inaya shuna we kuNasareti. Oya ka kala muBetlehem, shi li ookilometa 10 lwaampono okuza kuJerusalem. Oya li oohepele shili, ihe Josef okwa li a ningi kehe shoka ta vulu opo Maria naJesus kaaya kale moluhepo nokaaya mone iihuna. Konima yethimbo efupi, oya ka kala haya kala megumbo eshona. Pethimbo sho onkalamwenyo yawo ya ka lunduluka ishewe, Jesus ka li we okahanona, ihe otashi vulika a adhika a gwanitha nale omvula yimwe.

⁷ Opwe ya aalumentu, aayanekeli haya tala koonyothi nokiikwagulu yilwe, ya za kUuzilo, tashi vulika ya zi koshilando shokokule kuBabilon. Oye ya ya landula onyothi ndjoka ye ya eta pegumbo lyaJosef naMaria, taya kongo okanona hoka ka li taka ka ninga omukwaniilwa gwAajuda. Aalumentu mbaka oya li ye na esimaneko.

⁸ Aayanekeli mbaka oya li ya tula Jesus moshiponga oshinene, kutya nduno oya li ye shi shi nenge kaye shi shi. “Onyothi” ndjoka ye ya ya landula oya li ye ya fala tango kuJerusalem pehala lyoku ya fala yu ukilila kuBetlehem. * Sho ye li muJerusalem oya lombwele omukwaniilwa omukolokoshi, Herodes, kutya otaya kongo okanona hoka kali taka ka ninga omukwaniilwa gwAajuda. Shoka osha li she mu geyitha omolwondumbo.

9-11. (a) Omomikalo dhini gumwe a li e na oonkondo dhi vule dhaHerodes naSatana? (b) Olweendo lwokuya kuEgipiti olwa li lwa yooloka ko ngiini komahokololo gomomanyolo giifundja inaaga nwethwa mo?

 ⁹ Lagwenene, opwa li pu na ngoka e na oonkondo dhi vule dhaHerodes nodhaSatana. Momukalo guni? Aalumentu mboka ya li ye ya okutalela po okanona oya matula omagano gawo, nokaya li ya pula ya pewe sha nokuli. Otashi vulika Josef naMaria ya li inaaye shi tegelela sho yi iyadha ye na iilandithomwa yondilo ngaashi “oshingoli, iitsinino nomagadhi ga nika nawa.” Aayanekeli oya li ya hala oku ka lombwela omukwaniilwa Herodes kutya okanona hoka ya li taya kongo oye ke ka adha peni. Ihe Jehova okwa yi mo olunyala. Okwe ya lombwele okupitila mondjodhi ya shune kegumbo nondjila yilwe. —  Lesha Mateus 2:1-12.

¹⁰ Okuza owala sho aayanekeli ya yi, Josef okwa londodhwa komuyengeli gwaJehova a ti: “Thikama, kutha okanona nayina, ngu u tembukile kuEgipiti. Kala hoka, sigo tandi ku lombwele, oshoka Herodes ota kongo okanona e ka dhipage.” (Mat. 2:13) Ngaashi twe shi lesha petameko, Josef okwa vulika neendelelo kelombwelo ndyoka. Okwa li unene e na ko nasha negameno lyokanona hoka nomolwaashono a kutha omukulukadhi gwe nokanona e taya yi kuEgipiti. Molwaashoka oya adhika opo ya pewa omagano gondilo kaayanakeli mbeyaka aapagani, oya li ngashingeyi ye na sha shokwiikwatha nasho mondjila.

¹¹ Omanyolo giifundja inaaga nwethwa mo kuKalunga noongano dhilwe konima yethimbo odha ka kala hadhi popi kombinga yolweendo ndoka lwokuya kuEgipiti momukalo haagwo, tadhi ti anuwa okanona Jesus oka li ka ningi ondjila ofupi pashikumithalonga, ke ya gamene kaafuthi noka ningitha omilunga dhi lemuke opo yina a vule okutoonona ko iiyimati nuupu. * Ihe oshili oyo ndjika kutya olweendo ndoka lwa li talu ya fala kehala ndyoka ya li kaaye shi, olwa li olule nolululu.

12. Aavali mboka taya putudha aanona muuyuni mbuka wa nika oshiponga otaya vulu okwiilonga shike kuJosef?

¹² Aavali otaya vulu okwiilonga oshindji kuJosef. Okwa li e etha iilonga ye e ta yamba po onkalamwenyo ye, opo a gamene yaandjawo koshiponga. Osha yela kutya okwa li e wete kutya omukadhi nokanona ke eliko eyapuki e li inekelelwa kuJehova. Aavali kunena ohaya putudhile oyana muuyuni wa nika oshiponga moka mu na iinima mbyoka tayi vulu okutula aagundjuka moshiponga, oku ya yona po nenge nokuli oku ya teya po. Oomeme nootate mboka haya ningi ngaashi Josef kaye shi tuu okupandulwa sho haya longo nuudhiginini opo ya gamene oyana komanwethomo ngaka omawinayi!

13, 14. Oshe ende ngiini Josef naMaria ya ka putudhile oyana muNasareti?

¹³ Osha fa shi li ngeyi kutya inaya ka kala ko ethimbo ele kuEgipiti, molwaashoka nziya omuyengeli okwa li a lombwele Josef kutya Herodes okwa sa. Josef nooyandjawo oya shuna kegumbo. Ehunganeko ndyoka lya hunganekwa nale olya ti kutya Jehova okwa li ta ka ‘ithana Omwana muEgipiti.’ (Mat. 2:15) Josef okwa li a dhana onkandangala megwanithopo lyehunganeko ndyoka. Ihe pethimbo mpoka aanegumbo lye okwa li te ke ya ukitha peni?

¹⁴ Josef ka li a katuka nuuhasha. Oshi li pandunge sho a li a tila Arkelaus ngoka a pingene po Herodes, molwaashoka naye okwa li omuhahu nomudhipagi. Josef naanegumbo lye oya li ya wilikwa kuKalunga ya ye kuumbangalantu komukunda gwawo kuNasareti shaGalilea kokule naJerusalem naaniineya yasho. Hoka oko nduno ye naMaria ya ka putudhila oyana. —  Lesha Mateus 2:19-23.

15, 16. Josef okwa li ha longo shike, nokwa li ha longitha iilongitho yini?

¹⁵ Kaya li ye na omauyamba ogendji monkalamwenyo yawo nonkalamwenyo kaya li naanaa ompu. Sho Ombiimbeli tayi ti kutya Josef okwa li omuhongi gwiipilangi, oya longitha oshitya shoka sha kwatela mo omikalo odhindji dhokulonga niipilangi, ngaashi okuteta omiti, oku dhi kookololela hoka tadhi ka longithwa nosho wo oku dhi longekidha opo dhi vule okulongithwa okutunga omagumbo, oombautu, oontopa oonshona, omatemba, omagulu gomatemba, oondjoko niikwaniipangitho yilwe mbyoka hayi longithwa mokulonga omapya. (Mat. 13:55) Oya li iilonga tayi pula lela oonkondo. Olundji aahongi yiipilangi yopethimbo lyOmbiimbeli oya li haya longele komeho yomagumbo gawo nenge mokangulu ka dhikwa pooha dhegumbo.

¹⁶ Josef okwa li ha longitha iilongitho yi ili noyi ili, yimwe tashi vulika e yi pewelwe kuhe. Otashi vulika a li ha longitha ombine, ongodhi yoshumbu, ompya, okakuya, oshisaaha, ekuyakatana, ohamala, ohamala yomutse omunene, oshihokitho, omboola, oonka dhi ili nodhi ili, ngiika noomboha nonando otashi vulika dha li dhi na ondilo.

17, 18. (a) Jesus okwa li a longwa shike kuhe ngoka e mu putudha? (b) Omolwashike Josef a li e na okulonga iilonga ye nuudhiginini?

¹⁷ Kala ando wa fa wu wete Jesus sho okanona natango, a tala he ta longo. Nomeho ge ga pwa mo ota konenene einyengo kehe lyaJosef, nokapu na omalimbililo kutya okwa li a fuuka koonkondo dhahe, kuunongo we wokulonga nomake ge nokoondunge dhe. Otashi vulika Josef a  tameke okupa omwana manga omushona natango a longe iilonga iipu ngaashi okuwega iipilangi mbyoka inaayi yelekana nawa ta longitha iipeta yoohi ya kukutikwa. Otashi vulika a li a longo Jesus kombinga yomiti dhiipilangi dhi ili nodhi ili ngaashi, omukwiyu, o-oak, nenge omuti gwooholivi.

¹⁸ Jesus okwa li wo e shi tseya kutya iikaha yaJosef mbyoka yi na oonkondo dhokuteta omiti, oku dhi honga noku dhi mbambangela kumwe, oyo a li ha longitha e mu hekeleke nosho wo yina naamwayina. Kakele kaJesus, Josef naMaria oya ka kala ye na aanona ya konda puyahamano. (Mat. 13:55, 56) Josef okwa li e na okulonga a mana mo opo e ya sile oshimpwiyu noku ya palutha ayehe.

19. Josef okwa li ha sile egumbo lye oshimpwiyu ngiini pambepo?

¹⁹ Nonando ongaaka, Josef okwa li e shi kutya shoka sha simanenena oku ya sila oshimpwiyu pambepo. Nomolwaashono a li ha kutha ethimbo a longe aanona ye kombinga yaJehova Kalunga nosho wo oompango Dhe. Ye naMaria oya li haye ya fala aluhe kosinagoga momukunda gwawo hoka Ompango ya li hayi leshwa mokule nokufatululwa. Otashi vulika Jesus a li ha kala ta pula omapulo ogendji ngele ya zi kosinagoga hoka ngoka Josef a li ha kambadhala okuyamukula, opo e mu gwanithile po ompumbwe ye yopambepo. Josef okwa li wo ha fala yaandjawo kiituthi yopalongelokalunga kuJerusalem. POpaasa otashi vulika Josef noyaandjawo ya li haya kutha iiwike iyali okweenda ookilometa 120 okuya kuJerusalem, taya dhana oshituthi yo taya shuna ishewe kegumbo.

20. Ongiini mboka haya kwatele komeho momagumbo gopaKriste haya landula oshiholelwa shaJosef?

²⁰ Mboka haya kwatele komeho momagumbo gopaKriste ohaya landula oshiholelwa shoka. Nonando ohaya longo nuudhiginini ya kwathele aanegumbo yawo painiwe, ohaya gandja eitulomo lyawo olindji kokulonga oyana kombinga yaJehova. Ohaya ningi oonkambadhala ya ninge elongelokalunga lyuukwanegumbo nokuya noyana kokugongala kwopaKriste mwa kwatelwa niigongi. Ngaashi naanaa Josef a li e shi shi, nayo oye shi shi kutya kapu na eliko lilwe lya simana ndyoka taya vulu okupungulila oyana kaali shi owala ndyoka.

21. Josef naanegumbo lye oya li haya dhana ngiini Opaasa, nuunake ya dhimbulula kutya Jesus ke mo mosheendo?

²¹ Sho Jesus a li e na oomvula 12, Josef okwa li a fala aanegumbo lye kuJerusalem ngaashi he shi ningi shito. Olya li ethimbo lyoshituthi shOpaasa mpoka kehe gumwe noyaandjawo ya li haya ende momikunda dha ziza nawa pethimbo lyoshitemamvula ye li ongundu ya tsa ompola yu  uka kuJerusalem. Sho taya ihilile puJerusalem, oyendji oya li haya tameke okwiimba omapisalomi ngoka ge shiwike nawa noga li haga imbwa sho taya londo ondundu yu uka muJerusalem. (Eps. 120–134) Oshilando otashi vulika sha li hashi kala shu udha aantu omayuvi omathele. Konima yoshituthi, kehe gumwe noyaandjawo oya li haya ende natango ye li ongundu ya tsa ompola taya shuna komagumbo gawo. Molwaashoka Josef naMaria oya li yi ipyakidhila niinima oyindji oya li ye shi Jesus ote ende nayalwe, pamwe tashi vulika naakwanezimo. Oye ke shi dhimbulula kutya Jesus nani ke mo mosheendo moka sho pwa piti esiku, shoka sha li she ya halutha. —  Luk. 2:41-44.

22, 23. Josef naMaria oya ningi po shike sho ya dhimbulula kutya omwana ke mo mosheendo, na Maria okwa ti shike sho ye mu mono?

²² Oya shuna mbalambala kuJerusalem taya kongo Jesus apehe mpoka ya li. Oye ende taye mu ithana kedhina moshilando shoka pethimbo mpoka sha li kaashi na we aantu oyendji. Mbela oku li peni? Sho ye mu  kongo omasiku gatatu, mbela Josef okwa li u uvite kutya okwa ndopa noonkondo moshinakugwanithwa she shoka e shi inekelelwa kuJehova? Hugunina, oya yi kotempeli. Oya kala taye mu kongo sigo ye ya mongulu yimwe moka mwa li mwa gongala aalumentu aalongwantu yompango, nomugundjuka Jesus okwa li a kuutumba mokati kawo. Josef naMaria kaya li tuu ya pepelelwa! —  Luk. 2:45, 46.

²³ Jesus okwa li a pulakena kaalongwantu mbaka, ye ta pula omapulo, a halelela okuuva omayamukulo. Aalumentu mbaka oya li ya kuminwa omayamukulo ge neuvoko lye. Maria naJosef nayo oya li ya kumwa. Mehokololo moka Josef ina popya sha. Ihe oohapu dhaMaria otadhi ulike sha yela nkene ayehe ya li yu uvite, sho a ti: “Mumwandje, omolwashike we tu ningile ngeyi? Ngame naho otwe ku kongo nokunika uuthigwa.” —  Luk. 2:47, 48.

24. Ombiimbeli otayi ulike ngiini shoka sha kwatelwa mokuputudha aanona?

²⁴ Niitya iishona noya popiwa nawa, Oohapu dhaKalunga otadhi  ulike shoka sha kwatelwa mokuputudha aanona. Okuputudha okanona otaku vulu okukala okudhigu nuuna nokuli okanona ka gwanenena. Okuputudha aanona muuyuni mbuka wa nika oshiponga otaku vulu ku ‘nikithe aavali uuthigwa,’ ihe otaya vulu okuhekelekwa sho ye shi shi kutya Ombiimbeli oya popya kutya otapu ka kala eshongo lya tya ngaaka.

25, 26. Jesus okwa li a yamukula ngiini aavali ye, na Josef okwa li e shi uvitile ngiini?

²⁵ Ihe otashi nyanyudha, oshoka Jesus okwa adhika pehala mpoka a li u uvite e li popepi naHe gwomegulu, Jehova, ti ilongo ashihe shoka a li ta vulu okwiilonga kombinga ye. Nomolwaashono a li a yamukula aavali ye ngeyi: “Omwa kongele ndje shike? Kamu shi shi nani kutya ngame ondi na okukala mumbika yaTate?” —  Luk. 2:49.

²⁶ Josef oku na okukala a li ha kala ti ipula noohapu ndhoka. Otashi vulika a ka kala nokuli e dhi uvitile uuntsa, shaashi oye a li a longo nuudhiginini opo a longe omwana a kale u uvite ngaaka kombinga yaJehova Kalunga. Manga a li omushona natango, Jesus okwa li e shi nale kutya oshitya “tate” otashi ti shike. Okupitila meihumbato lye, Josef oye a li a longo Jesus kutya otashi ti shike.

27. Wu li omuvali omusamane, owu na uuthembahenda wuni, nomolwashike wu na okudhimbulukwa oshiholelwa shaJosef?

²⁷ Ngele ngoye omusamane, mbela owe shi tseya tuu kutya owu na uuthembahenda okukwathela aamwoye ya kale ye shi kutya otashi ti shike okukala ye na he omunahole nohe ya gamene? Sha faathana, ngele oto putudha aanona mboka haangoye we ya vala, landula oshiholelwa shaJosef mokuungaunga nakehe gumwe gwomuyo momukalo omwaanawa notagu opalele. Ya kwathela ya hedhe popepi naHe gwomegulu, Jehova Kalunga. Lesha Aaefeso 6:4.

28, 29. (a) Oohapu ndhoka dhi li muLukas 2:51, 52 otadhi holola shike kombinga yaJosef? (b) Josef okwa li a kwathele ngiini omwana a koke moondunge?

²⁸ Ombiimbeli inayi popya we oshindji kombinga yaJosef, ihe onawa ngele tatu konakona shoka ya popya. Otatu lesha kutya Jesus ‘okwa  kala ha vulika kuyo,’ ano kaavali ye. Otayi ti wo kutya “Jesus okwa koko palutu nomoondunge, a hokiwa kuKalunga nokaantu.” (Lesha Lukas 2:51, 52.) Oohapu ndhika otadhi holola shike kombinga yaJosef? Otadhi holola kutya Josef okwa kala ta kwatele komeho megumbo lye, molwaashoka omwana ngoka a gwanenena okwa li a simaneka ewiliko lye nokwa kala ha vulika kuye.

²⁹ Otadhi holola wo kutya Jesus okwa kala ta koko moondunge. Osha yela kutya Josef okwa kala ta kutha ombinga moshinima shoka. Pethimbo mpoka opwa li pu na eyele limwe ndyoka lya kala li holike kAajuda uule woomvula. Nokunena aantu ohaye li longitha nohaye li lesha momambo. Otali ti kutya aalumentu owala mboka kaaye na iilonga iidhigu ya li taya vulu okuninga aanandunge, omanga aantu mboka haya longo iilonga yuungomba ngaashi, aahongi yiipilangi, aanafaalama naahambuli, “itaaya vulu okupopya uuyuuki nepangulo; yo itaya vulu okwaadhika mpoka tapu popiwa omayele.” Ihe Jesus okwa li u ulike kutya eyele ndyoka itali popi oshili. Sho a li natango okanona, okwa li olundji hu uvu he te ya longo kombinga “yuuyuuki nepangulo” lyaJehova nonando okwa li owala omuhongi gwiipilangi. Kapu na omalimbililo kutya Josef okwa li he shi ningi olundji.

30. Josef okwa tulila po mboka taya kwatele komeho momagumbo oshiholelwa shini?

³⁰ Opu na wo uumbangi kutya Josef okwa kutha ombinga mokukwathela Jesus a koke palutu. Shaashi okwa li ha silwa nawa oshimpwiyu, okwa li a koko e ta ningi omulumentu e na oonkondo nuukolele. Josef okwa li wo a dheula omwana a kale e shi nawa iilonga yokomake. Jesus ka li owala haku tiwa kutya omwana gwomuhongi gwiipilangi, ihe okwa li haku tiwa naye “omuhongi gwiipilangi.” (Mark. 6:3) Ano Josef okwa li lela a pondola mokudheula omwana. Mboka haya kwatele komeho momagumbo oye na okuholela Josef opo nayo ya kale haya sile oyana oshimpwiyu nokushilipaleka kutya oye ya longa ya kale ye shi okulonga kuyo yene.

31. (a) Uumbangi otawu holola kutya Josef okwa si uunake? (Kwatela mo okampungu.) (b) Josef okwe tu tulila po oshiholelwa shini?

³¹ Okuza peninginitho lyaJesus, sho e na oomvula 30, Josef ina popiwa mo we mOmbiimbeli. Uumbangi owa fa tawu shi holola kutya pethimbo sho Jesus a tameke iilonga ye yokuuvitha, Maria okwa adhika omuselekadhi. (Tala okampungu  “Josef okwa si uunake?”) Ihe nonando ongawo, Josef okwa thiga po oshiholelwa oshiwanawa shankene omusamane e na okugamena aanegumbo lye, oku ya sila oshimpwiyu nokukala omudhiginini sigo okehulilo. Omusamane kehe, omukwatelikomeho gwegumbo kehe, nakehe Omukriste na holele eitaalo lyaJosef.