1, 2. Iilonga yini Noowa negumbo lye ya li ye na, noya li ya taalelwa komaupyakadhi geni?

NOOWA oku ukililitha ombunda ye e ti inana u uthe oontumba dhe ndhoka tadhi ehama. Kala ando wa fa wu mu wete a kuutumba keti enene, ta fudha po kiilonga ye, ye ta tala komutungilo omunene gwonguluwato. Ezimba ewinayi lyeka, lya fa ndyoka hali ningithwa oteya, olya li tali nika apuhe nopokopoko yiilongitho yokuteta omiti oya li yu uvitike apehe. Okuza mpoka a kuutumba, Noowa okwa li ta vulu okumona oyanamati sho taya longo nuudhiginini iilonga yi ili noyi ili yokutunga onguluwato. Oyanamati, aakulukadhi yawo nosho wo nekulu lye ayehe oya kala taya tungu pamwe naye onguluwato ndjika ngashingeyi oomvula omilongo. Iitopolwa yimwe yonguluwato oya pwa, ihe opu na natango iilonga oyindji inaayi pwa.

² Aantu yomoshitopolwa shawo oya li taya dhiladhila kutya oonakutunga mbaka omagoya. Sho Noowa noyanamati taya tungu onguluwato, aantu oya li taya yolo sho yu uvu kutya evi alihe otali ku udha omeya geyelu. Oshiponga shoka Noowa a li ta londodhele aantu osha li tashi monika sha fa itaashi vulu okuningwa nenge kaashi li pandunge. Kaya li yu uvite ko kutya omolwashike omuntu e na okumonitha omwenyo gwe nosho wo oomwenyo dhoyana iihuna, mokuninga oshinima shoka kaashi li pandunge. Ihe Jehova, Kalunga kaNoowa, ka li e wete Noowa ta monitha omwenyo gwe iihuna.

3. Omeityo lini Noowa a kala mekwatathano naKalunga?

³ Oohapu dhaKalunga otadhi ti: ‘Noowa okwa kala mekwatathano naKalunga.’ (Lesha Genesis 6:9, 10.) Mbela shoka otashi ti shike? Itashi ti kutya Kalunga okwa li e ende kombanda yevi, nenge kutya Noowa okwa li a yi megulu. Pehala lyaashono, Noowa okwa li a vulika kuKalunga lelalela nokwa li e mu hole, shoka sha li sha fa ye naJehova taye ende pamwe ye li ookuume. Oomvula omayuvi dha ka pita, Ombiimbeli oya popi kombinga yaNoowa ya ti: “Eitaalo olyo lya longitha Noowa . . . Osho ngeyi okwa pe uuyuni uusama.” (Heb. 11:7) Mbela Noowa uuyuni okwa li e wu pangula ngiini okupitila meitaalo lye? Oshike tatu ilongo nena meitaalo lye?

4, 5. Uuyuni owa li we ende ngiini tawu nayipala pethimbo lya Noowa?

⁴ Noowa okwa kokele muuyuni mboka wa li tawu ende tawu nayipala  neendelelo. Owa li nale wa yonuka pethimbo lyahekulululwa Henok, ngoka a li wo e na ekwatathano ewanawa naKalunga. Henok okwa li a hunganeke kutya esiku lyepangulo oli li pokuya okuhanagula po uuyuni waakaanakalunga. Ihe pethimbo lyaNoowa uuwinayi owa li wa nayipala noonkondo. Pataloko lyaJehova, evi olya li lya yonuka nokuli, oshoka olya li lyu udha iikolokosha. (Gen. 5:22; 6:11; Jud. 14, 15) Mbela oshike sha li sha ningitha iinima yi kale tayi ende nayi ngawo?

⁵ Yamwe yomoyanamati yaKalunga, aayengeli, oya li ya ningi oshinima shiyemateka noonkondo. Gumwe gwomuyo okwa li nale a tukulile Jehova oshipotha sho a lundile Kalunga nokwa hongolola Adam naEva ya yone e ta ningi Satana Ondiapoli. Pethimbo lyaNoowa, aayengeli yalwe oya li ye mu landula mokutukulila epangelo lyaJehova li li pauyuuki oshipotha. Oya thigi po omitumba dhawo megulu e taye ya kombanda yevi, e tayi izaleke omalutu gopantu nokuhokana aakiintu aawanawa. Aayengeli mbaka aanuuntsa naanashipotha oya li ya nwetha mo nayi aantu. —  Gen. 6:1, 2; Jud. 6, 7.

6. Aalefule nenge Aanefilim oya li ya nwetha mo ngiini onkalo yaantu muuyuni, na Jehova okwa li a tokola okuninga shike?

⁶ Niishewe, sho aayengeli mboka ya lala naakiintu yopantu oye ya valele aanona yoombinzi mbali aaleeleeka noye na oonkondo dha pitilila. Ombiimbeli otayi ya ithana “Aalefule” nenge “Aanefilim” shoka tashi ti “aagwithi yaantu.” Oya li aalongi yiikolokosha ye na onyanya noya li ya nayipaleke noonkondo onkalo yokwaanakalunga kombanda yevi. Itashi kumitha sho Omushiti a li a mono “uuwinayi waantu kombanda yevi mpoka wu thike, nomadhiladhilo gawo nkene ga pilaala ethimbo alihe.” Jehova okwa li a tokola kutya konima yoomvula 120 ota ka komba ko aantu ayehe aawinayi. —  Lesha Genesis 6:3-5.

7. Noowa nomukadhi oya li ya taalela eshongo lini mokugamena oyanamati yawo komanwethomo omawinayi gopethimbo lyawo?

 ⁷ Oshi na okukala sha li oshidhigu okuputudha aanona monkalo ya tya ngaaka. Ihe Noowa okwa li a pondola. Okwa li i imonene omukiintu e li nawa. Konima sho Noowa a gwanitha oomvula 500, omukadhi okwa mono aamati yatatu, Sem, Ham naJafet. * Aavali mbaka oya li ye na okugamena oyanamati kaaya nwethwe mo kuuwinayi mboka wa li we ya kundukidha. Aanona yaamati oye na egamo lyokusimaneka nokuholela “oofule naanamadhina,” notashi vulika aanona ya li haya holele Aanefilim nenge aalefule mbeyaka. Otashi vulika sha li oshidhigu kuNoowa nomukadhi okugamena oyana kukehe shimwe shoka sha li tashi ningwa kaalefule mboka, ihe oya li haya vulu oku ya longa oshili kombinga yaJehova Kalunga, ngoka e tonde uuwinayi awuhe. Oya li ye na oku ya kwathela ya mone kutya Jehova oku uvitile nayi uuwinayi mboka tawu longwa nosho wo uukakombwiilitha. —  Gen. 6:6.

8. Ongiini aavali aanandunge kunena taya vulu okulandula oshiholelwa shaNoowa nomukadhi?

⁸ Aavali kunena otashi vulika yu uvite ko onkalo moka Noowa nomukadhi ya li. Uuyuni mbuka tu li, nawo owu udha iikolokosha nuukakombwiilitha. Olundji miilando ohamu kala mu udha oongundu dhaagundjuka taya longo omiyonena. Nokuli nomainyanyudho ngoka ga nuninwa aanona ogu udha iinima ya tya ngaaka. Aavali aanandunge ohaya kambadhala okuninga kehe shoka taya vulu ya gamene oyana komanwethomo ga tya ngaaka moku ya longa kombinga yaKalunga kombili, Jehova, ngoka esiku limwe ta ka hulitha po uukolokoshi awuhe. (Eps. 11:5; 37:10, 11) Aanona otaya vulu okwiilonga shoka shu uka nonando oye li muuyuni wa kolokosha. Noowa nomukadhi oya li ya pondola. Oyanamati oya koko e taya ningi aalumentu ye na omikalo omiwanawa noya li ya hokana aakiintu mboka nayo ya li ya hala okupititha komeho Kalunga kashili, Jehova, monkalamwenyo yawo.

9, 10. (a) Elombwelo lini lya zi kuJehova lya li lya lundulula onkalamwenyo yaNoowa? (b) Jehova okwa hololele Noowa shike kombinga yomutungilo gwonguluwato nelalakano lyayo?

⁹ Esiku limwe onkalamwenyo yaNoowa oya lunduluka thiluthilu. Jehova okwa li a popi nomupiya gwe nguka omuholike e te mu lombwele kutya okwa hala okuhulitha po uuyuni. Kalunga okwa lombwele Noowa a ti: “Itungila onguluwato yiipilangi.” —  Gen. 6:14.

¹⁰ Onguluwato kaya li osikepa ngaashi yamwe haya dhiladhila. Kaya li nokuli ya fa osikepa, kakele owala kutya oya li hayi kaama. Oya li owala ya fa oshiketha oshinenenene. Jehova okwa li a lombwele Noowa kutya oyi na okukala yi na uule nuunene wu thike peni nankene yi na okutungwa, nokwa li wo e mu lombwele e yi hote neka meni nokombanda.  Nokwa li a lombwele Noowa kutya omolwashike, ta ti: “Otandi ka tuma eyelu kombanda yevi . . . Shaa shoka shi na omwenyo kombanda yevi, otashi si.” Ihe Jehova okwa li a gandja elombwelo tali landula kuNoowa: “Inda monguluwato nomukiintu gwoye, aamwoyemati naakadhi.” Noowa okwa li wo e na okukutha iinamwenyo moludhi kehe e yi ete monguluwato. Oombyoka owala tayi ka kala monguluwato tayi ka hupa mEyelu. —  Gen. 6:17-20.

11, 12. Noowa okwa li e na oshilonga oshinenenene shini, nokwa li e shi taamba ko ngiini?

¹¹ Noowa okwa li e na oshilonga oshinene noonkondo. Onguluwato oya li tayi ka kala onenenene, yi na omutamo gwoometa 133, uunene woometa 22 nuule wokuya pombanda woometa 13. Oya li nokuli onene yi vule noosikepa dhiipilangi dhokunena. Mbela Noowa okwa li a kambadhala okuhenuka oshinakugwanithwa shino, ta ti kutya oshidhigu unene nenge a lundulule shoka e na okuninga shi mu ningile oshipu? Ombiimbeli otayi yamukula ngeyi: “Noowa okwa ningi, ngaashi Kalunga e mu lombwele.” —  Gen. 6:22.

¹² Oshilonga shika osha li sha kutha oomvula odhindji, tashi vulika oomvula 40 nenge 50. Oya li ye na okuka omiti, oku dhi kookololela kehala, oku dhi honga noku dhi tula kumwe. Onguluwato oya li yi na okukala yi na oontala ndatu, omala ogendji nomweelo molupati. Osha yela kutya oya li yi na omakende mooha lwopombanda noya li yi na ondunda ya yeluka kashona pokati, opo omeya ga kale taga kunguluka ko nuupu. —  Gen. 6:14-16.

13. Oshilonga shini tashi vulika sha li unene eshongo kuNoowa shi vulithe okutunga onguluwato, naantu oya li yi inyenge ngiini?

¹³ Sho onguluwato taye ende tayi pu nomimvo sho tadhi yi komeho, osha yela kutya Noowa okwa li a pandula sho ta kwathelwa kuyaandjawo. Opwa li pu na wo oshilonga shilwe shoka tashi vulika sha li oshidhigu shi vulithe okutunga onguluwato. Ombiimbeli otayi ti kutya Noowa okwa li “omuuvithi gwuuyuuki.” (Lesha 2 Petrus 2:5.) Ano okwa li ha kwatele komeho mokulondodha aakolokoshi naakaanakalunga nuulaadhi kombinga yehanagulo ndyoka lya li pokuya. Aantu oya li ya ningi po shike sho yu uvu elondodho? Sho Jesus Kristus a dhimbulukwa ethimbo ndyoka, okwa ti kutya aantu “inaye shi tseya” nenge inaya pulakena. Okwa ti kutya oya li yi ipyakidhila niinima yonkalamwenyo ngaashi okulya, okunwa nokuhokana yo inaya pupa ko kuNoowa. (Mat. 24:37-39) Kapu na omalimbililo kutya oyendji oya sheke Noowa noyaandjawo; yamwe otashi vulika ye mu ningile omatilitho noku mu pataneka nayi. Otashi vulika nokuli ya li ya kambadhala okuya iilonga yokutunga moshipala.

14. Oshike aanegumbo Aakriste kunena taya vulu okwiilonga kuNoowa noyaandjawo?

¹⁴ Ihe nonando ongaaka, Noowa noyaandjawo inaya sa uunye. Oya tsikile okulonga nuudhiginini nonando oya li muuyuni moka aantu ya tala ko okutunga onguluwato oshinima kaashi na oshilonga, ehepitho lyethimbo nokaashi li pandunge. Onkee ano, Aakriste momagumbo kunena otaya vulu okwiilonga ko oshindji keitaalo lyaNoowa naanegumbo lye, oshoka  natse otu li pethimbo ndyoka Ombiimbeli tayi li ithana ‘omasiku gahugunina’ guuyuni mbuka. (2 Tim. 3:1, OB-1954) Jesus okwa ti kutya ethimbo lyetu otali ka kala lya fa ethimbo lyaNoowa sho a li ta tungu onguluwato. Ngele Aakriste oya mono uuyuni kaawu na ko nasha netumwalaka lyUukwaniilwa waKalunga, tawu ya sheke nenge nokuli tawu ya hepeke, naya dhimbulukwe Noowa. Hayo yotango okutaalela omashongo ngoka.

15. Sho Noowa a li e li pokuninga oomvula 600 okwa li a silwa oolye?

¹⁵ Konima yoomvula omilongo dhontumba, onguluwato osho ya pu. Sho Noowa a li e li pokuninga oomvula 600 okwa li a silwa yamwe yomaaholike ye. Okwa li a silwa he, Lamek. * Konima yoomvula ntano, he yaLamek, hekulu yaNoowa, Metusala, naye okwa si mepipi lyoomvula 969. Maantu ayehe ya popiwa mOmbiimbeli, Metusala oye a kalele ko ethimbo ele kombanda yevi. (Gen. 5:27) Metusala naLamek oya li ko pethimbo limwe naAdam.

16, 17. (a) Noowa okwa li a mono etumwalaka lilwe tali popi shike sho e na oomvula 600? (b) Hokolola oshinima kaashi shi okudhimbiwa shoka Noowa noyaandjawo ya li ya mono.

¹⁶ Sho tatekulululwa Noowa a gwanitha oomvula 600, okwa yakula etumwalaka lya zi kuJehova Kalunga, tali ti: “Inda monguluwato negumbo lyoye alihe.” Kalunga okwa li wo a lombwele Noowa a tule iinamwenyo yoludhi kehe monguluwato, ooiheyali yaambyoka inaayi nyata notayi vulu okuyambelwa Jehova, niikwawo ooiyali owala. —  Gen. 7:1-3.

 ¹⁷ Oshi na okukala sha li oshinima kaashi shi okudhimbiwa shili okumona iinamwenyo omathele tayi mbombolokele monguluwato. Ayihe oye ya mo pamaludhi gayo, iinene niishona, iihahu niinambili noyomishitilo dha yoolokathana. Yimwe oya li tayi ende, yimwe otayi tuka, yo yimwe otayi ipwedha, yimwe otayi gogonyotoka, omanga yimwe tayi mbandanga. Katu na okudhiladhila kutya Noowa okwa li te yi kondjithile monguluwato nenge te yi hekele mo. Ehokololo otali ti: ‘Oya yi monguluwato pamwe naNoowa.’ —  Gen. 7:9.

18, 19. (a) Otatu vulu ngiini okuyamukula omapulo ngoka mboka ihaayi itaale nuupu haya pula kombinga yehokololo lyaNoowa? (b) Uunongo waJehova owi iwetikile ngiini momukalo moka a li a hupitha iinamwenyo?

¹⁸ Yamwe mboka ihaayi itaale nuupu otashi vulika ya tye: ‘Oshinima sha tya ngawo otashi vulu ngiini okuningwa? Nongiini iinamwenyo ayihe mbyoka tashi vulika yi kale pamwe nombili mehala eshona ngawo?’ Mbela oshidhigu ngaa kOmushiti gwiinima ayihe okupangela iinamwenyo yomeshito lye noku yi vulikitha nenge oku yi dheula ngele osha pumbiwa? Dhimbulukwa kutya Jehova oye Kalunga ngoka a shiti iinamwenyo. Nokonima oye a ka topola Efuta Etiligane pokati noye a li a thikamitha etango. Mbela otashi vulika ngaa a nyengwe okuninga iinima mbyoka ya popiwa mehokololo lyaNoowa? Kapu na omalimbililo kutya ota vulu oku shi ninga nosho a li a ningi.

¹⁹ Kalunga okwa li shili ta vulu okuhupitha iinamwenyo yomeshito lye momukalo gulwe. Ihe okwa li a hogolola oku shi ninga momukalo ngoka tagu tu dhimbulukitha oshinakugwanithwa shoka e tu pe petameko, shokusila iinamwenyo ayihe kombanda yevi oshimpwiyu. (Gen. 1:28) Aavali oyendji ohaya longitha ehokololo lyaNoowa okulonga oyana kutya Jehova okwa lenga aantu nosho wo iinamwenyo mbyoka a shita.

20. Otashi vulika Noowa noyaandjawo ya li yi ipyakidhila nashike moshiwike sha tetekele Eyelu?

²⁰ Jehova okwa li a lombwele Noowa kutya Eyelu otali ya konima  yoshiwike. Noowa naanegumbo lye oye na okukala ya li yi ipyakidhila noonkondo oshiwike shoka. Dhiladhila owala kiilonga mbyoka ya li ye na okulonga ya tule iinamwenyo, iikulya nomitsalo dhawo adhihe melandulathano monguluwato. Otashi vulika omukulukadhi gwaNoowa, gwaSem nogwaJafet ya li yi ipyakidhila nokuninga onguluwato yi kale ehala tali vulu okukalwa.

21, 22. (a) Omolwashike kaatu na okukuminwa okwaanakonasha kwaantu yopethimbo lyaNoowa? (b) Omasheko ngoka aantu ya li haya sheke Noowa naanegumbo lye oga hulu uunake?

²¹ Aantu momudhingoloko oya li taya ningi shike? Natango kaya li ye “shi tseya” nenge kaya li ye shi ndhindhilika nonando opwa li iinima oyindji tayi ulike kutya Jehova ota yambeke Noowa miilonga ye. Oya li ye wete nkene iinamwenyo tayi mbombolokele monguluwato. Ihe katu na okukuminwa okwaanakonasha kwawo. Aantu kunena nayo oya fa owala inaaya tseya kutya otu li momasiku gahugunina guuyuni mbuka. Ngaashi naanaa omuyapostoli Petrus a li a hunganeke, opwe ya aasheki taya sheke mboka taya vulika komalondodho gaKalunga. (Lesha 2 Petrus 3:3-6.) Sha faathana, aantu oye na okukala ya li haya sheke Noowa naanegumbo lye.

²² Omasheko oga li ga hulu uunake? Ehokololo otali ti kutya sho Noowa a tula aanegumbo lye nosho wo iinamwenyo monguluwato, Jehova “okwa pata omweelo konima yaNoowa.” Ngele opwa li aasheki ye shi wete, osha yela kutya oshe ya mweneke. Ngele hasho she ya mweneke, omvula oyo ye ya mweneke, sho ya tameke okuloka. Oya li ya loko, e tayi loko, ndele e tayi loko sigo ya yelula uuyuni awuhe ngaashi Jehova a tile. —  Gen. 7:16-21.

23. (a) Otu shi shi ngiini kutya Jehova ka li a nyanyukilwa eso lyaakolokoshi yopethimbo lyaNoowa? (b) Omolwashike shi li pandunge okuholela eitaalo lyaNoowa kunena?

²³ Mbela Jehova okwa li a nyanyukilwa eso lyaakolokoshi mbeyaka? Aawe. (Hes. 33:11) Pehala lyaashono okwa li e ya pa ompito ya lundulule onkalamwenyo yawo nokulonga shoka shu uka. Mbela oya li ngaa taya vulu oku shi ninga? Onkalamwenyo yaNoowa otayi shi ulike kutya oya li taya vulu. Noowa okwa li u ulike kutya aantu oya li taya vulu okuhupa, sho a kala mekwatathano naJehova nokuvulika kuye miinima ayihe. Kungeyi eitaalo lye olya li lya pe uuyuni wopethimbo lye uusama nokwa li u ulike kutya aantu oya li taya vulu okuvulika kuKalunga. Eitaalo lye olya li lye mu hupitha naanegumbo lye. Ngele owa holele eitaalo lyaNoowa, nangoye otashi vulika wu hupithwe pamwe naanegumbo lyoye. Nangoye oto vulu okukala mekwatathano naJehova Kalunga noku mu ninga kuume koye ngaashi Noowa. Nuukuume mboka otawu vulu okukala sigo aluhe.