Dhiladhila konkalo ndjika: Karen okwa li pokatuthi, ihe muule owala wominute omulongo lwaampono, oku uvu ewi lyomuntu e mu shi tali ti:

Karen okwa tanauka nokwa mono kuume ke Jessica e na uukende uyali wombiila, opo wa patululwa. Jessica okwa kutha okakende kamwe e te ka pe Karen ta ti: “Ku shi naanaa omushona nokukala inoo nwa mo kashona mokakende muka, hasho?”

Karen okwa li a hala okutinda, ihe molwaashono Jessica okuume ke, ka li a hala a kale e mu sa uunye. Oshikwawo, Jessica omukadhona ngoka e na omikalo omiwanawa. Ngele naye ota nu, pamwe inashi puka naanaa. Karen okwi ipopile ta ti: ‘Ote nu mo owala kashona, shino kashi shi iingangamithi.’

Ando owa li monkalo ya fa yaKaren, ando owa ningi po shike?

Opo wu ninge etokolo li li mondjila monkalo ndjino, owa pumbwa okwiitseya nawa. Okwiitseya nawa otaku ulike komithikampango ndhoka hwi iyutha kudho nosho wo kwaashoka wi itaala. Ngele owi ishi nawa, oto ka vula okwiipangela pehala lyokweetha yalwe oyo ye ku pangele. — 1 Aakorinto 9:26, 27.

Ongiini to vulu okukokeka uukwatya mboka? Ngele owa yamukula omapulo taga landula otashi ke ku kwathela.

Ngele owa kala wa tokola toko okukala metsokumwe nomithikampango ndhoka hwi iyutha kudho nokwaashoka wi itaala, oto ka kala wa fa omuti gu na omidhi dha kolelela, ngoka ihaagu kungululwa po koshikungulu

Okukala wu shi omaukwatya goye omawanawa nosho wo shoka ho vulu okuninga otashi ku kwathele wu kale wu na omukumo.

OSHIHOLELWA SHOPAMBIIMBELI: Omuyapostoli Paulus okwa nyola a ti: “Otashi vulika ndaa shi enyakwa mokupopya, ihe ondi na ngaa oondunge.” (2 Aakorinto 11:6) Molwaashoka Paulus okwa li u uvite ko Omanyolo, okwa kala omudhiginini sho a li ta makelwa kuyalwe. Ine etha nando omapopyo gawo omawinayi ge mu teye omukumo. — 2 Aakorinto 10:10; 11:5.

IKONAKONA MWENE: Nyola uunkulungu nenge owino ndjoka wu na.

Hokolola uukwatya wa dhenga mbanda mboka wu na. (Pashiholelwa, mbela owu na ko nasha nayalwe? oho gandja? omwiinekelwa? oho kala pethimbo?)

Ngaashi owala elyenge inaali kola hali vulu okutokoka nuupu, omaukwatya goye otaga vulu okulunduluka nuupu ga ninge omawinayi noonkondo ngele owe etha omaunkundi goye ge ku pangele.

OSHIHOLELWA SHOPAMBIIMBELI: Paulus okwa li a tseya omaunkundi ge. Okwa nyola a ti: “Meni lyandje onda hokwa ompango yaKalunga. Ihe ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde.” — Aaroma 7:22, 23.

IKONAKONA MWENE: Omaunkundi geni wu na okwiilonga okupangela?

Mbela oto ka londa ngaa motekisa e to lombwele omuhingi a kale ta dhingoloka pomudhingoloko gweni sigo omahooli ge taga pu mo? Shoka otashi ka kala sha nika uusama notashi ke ku pula iimaliwa oyindji.

Oshike tatu ilongo mwaashika? Omalalakano otage ku kwathele wu ninge po sha sho mu pondo monkalamwenyo, pehala owala lyokukala to dhingoloka nonkalamwenyo yoye. Ohage ku kwathele wu kale wu shi shoka wu na okuninga monkalamwenyo nankene to vulu oku shi gwanitha po.

OSHIHOLELWA SHOPAMBIIMBELI: Paulus okwa nyola a ti: ‘Ondi na okumatuka ndu ukilila ethikilo.’ (1 Aakorinto 9:26) Pehala lyokukala kee na nando elalakano lyasha monkalamwenyo, Paulus okwi itulile po omalalakano e ta kala metsokumwe nago. — Aafilippi 3:12-14.

IKONAKONA MWENE: Nyola omalalakano gatatu ngoka wa hala okwaadha momukokomoko gwomumvo tagu ya.

Ngele owa kala kuu na eitaalo, oto ka kala ho tengauka. Ngaashi thimbithimbi ha lundulula olwaala lwe, oto ka kala ho lundulula iikala yoye, opo wu kale wa fa ookuume koye. Shoka otashi ulike kutya kwi ishi mwene.

Mepingathano naashoka, uuna omatokolo goye gi ikolelela kwaashoka wi itaala, ito ka lundulula omithikampango ndhoka hwi iyutha kudho naashoka wi itaala, kutya nduno aantu oya ninge shike.

OSHIHOLELWA SHOPAMBIIMBELI: Manga omupolofeti Daniel a li omugundjuka, okwa li a “tokola” kutya ota ka vulika koompango dhaKalunga, nonando ka li pamwe noyaandjawo. (Daniel 1:8) Sho a ningi ngawo, oshe mu kwathele a kale ihaa tengauka. Okwa kala metsokumwe naashoka i itaala.

IKONAKONA MWENE: Mbela owi itaala shike? Owi itaala ngaa muKalunga? Ngele osho, omolwashike? Oshike she ku tompa kutya oko e li shili?

Mbela owi itaala ngaa kutya omithikampango dhaKalunga otadhi vulu oku ku kwathela? Ngele osho, omolwashike?

Mbela owa hala okukala wa fa shike? Owa hala okukala wa fa efo lya gwa komuti hali falwafalwa kombepo nenge owa hala oku fa omuti gwa kola ngoka ihaagu tengauka nopethimbo lyoshikungulu oshinene? Ngele owa kala ihoo tengauka, oto ka kala wa fa omuti ngoka. Shoka otashi ke ku kwathela wu yamukule epulo kutya: Ongame lye?