Omuyambimukuluntu Eli okwa li e na oyanamati yaali, mboka ya li haya longo ye li aayambi metsalihangano. Omadhina gawo oHofni naPinehas. Kaya li ya vulika koompango dhaJehova noya li yu ungaunga naantu nayi. Uuna Aaisraeli ye eta omayambo gawo kuJehova, Hofni naPinehas oya li hayi ikuthile oonyama oombwanawa mombiga. Eli okwa li u uvu shoka oyanamati taya ningi, ihe ine ya katukila onkatu. Mbela Jehova okwa li te ke etha oshinima shika shi tsikile?

Nonando Samuel okwa li omushona lela kuHofni naPinehas, ine ya holela nando. Jehova okwa li a nyanyukilwa Samuel. Ongulohi yimwe manga Samuel a li a kotha, oku uvu ewi tali mu ithana. Okwa penduka e ta matukile kuEli ta ti: ‘Ongame nguka!’ Eli okwe mu yamukula a ti: ‘Inandi ku ithana; shuna wu ka lale.’ Samuel okwa shuna, a ka lale. Samuel okwi ithanwa ishewe. Sho Samuel uvu ewi oshikando oshititatu, Eli okwa dhimbulula kutya Jehova oye a li ti ithana Samuel. Okwa lombwele Samuel kutya ngele oku uvu ewi tali mu ithana ishewe, na tye: ‘Popya, Jehova, omuntu gwoye onda pulakena.’

Samuel okwa shuna a ka lale. Opo ihe oku uvu natango ewi tali mu ithana: ‘Samuel! Samuel!’ Samuel okwa yamukula a ti: ‘Popya, omuntu gwoye onda pulakena.’ Jehova okwa ti kuye: ‘Lombwela Eli kutya otandi  ke mu geela pamwe naanegumbo lye. Eli oku shi shi kutya oyanamati otaya longo iilonga iiwinayi metsalihangano lyandje, ihe ite ya ganda. Ongula ya landula, Samuel okwe egulula omiyelo dhetsalihangano ngaashi he shi ningi aluhe. Okwa li a tila okulombwela omuyambimukuluntu shoka a lombwelwa kuJehova. Eli okwe mu ithana e te mu pula ta ti: ‘Mumati gwandje! Jehova okwe ku lombwele shike? Ino holeka ndje nando osha.’ Samuel okwa lombwele Eli kehe shimwe.

Samuel sho a koko, Jehova okwa tsikile okukala pamwe naye. Aaisraeli ayehe moshilongo ashihe, oya li ya tseya kutya Jehova okwa hogolola Samuel a kale omupolofeti nomupanguli.