PaLukas 21:1-38
21 Sho Jesus a li a tala kiiketha yomayambidhidho, okwa mono aayamba taya tula mo iimaliwa.
2 Opo ihe okwa mono omuselekadhi ohepele ta tula mo uumaliwa uyali, waa na naanaa ongushu,*
3 nokwa ti: “Oshili tandi mu lombwele, omuselekadhi nguka ohepele okwa tula mo oshindji e vule ayehe mboka ya tula mo.
4 Oshoka ayehe mbaka oya tula mo iimaliwa ya kutha muuyamba wawo, ihe omuselekadhi nguka, nonando ohepele, okwa tula mo ashihe, shoka a li e na.”
5 Konima yethimbo, sho yamwe ya li taya popi kombinga yankene otempeli ya opalekwa nomamanya omawanawa nosho wo niinima, mbyoka ya yapulilwa Kalunga,
6 Jesus okwa ti: “Kombinga yiinima ayihe mbika mu wete, esiku otali ya uuna mpaka itaapu ka thigwa emanya lya londa kekwawo inaali kumunwa po.”
7 Opo nduno oye mu pula taya ti: “Muhongi, uunake naanaa iinima mbika tayi ka ningwa, nendhindhiliko ndyoka tali ulike kutya iinima mbika oyi li pokuningwa olini?”
8 Okwa ti: “Kotokeni mwaa pukithwe, oshoka oyendji otaye ke ya medhina lyandje taya ti: ‘Ongame Kristus’ nosho wo kutya ‘euthwathimbo olya thika.’ Ihe inamu ya landula.
9 Shimwe ishewe, uuna mwa uvu iita nosho wo omakuyunguto inamu kwatwa kuumbanda, oshoka iinima mbika oyi na tango okuningwa, ihe ehulilo inali ya natango.”
10 Opo ihe okwa ti kuyo: “Iigwana otayi ka kondjithathana, nomaukwaniilwa otaga ka ponokelathana.
11 Otaku ke ya omakakamo gevi omanene, oondjala nomikithi dholutapo koombinga noombinga; notaku ka holoka iinima iitilithi nosho wo omandhindhiliko omakumithi kegulu.*
12 Ihe manga iinima ayihe mbyoka inaayi ningwa, aantu otaye ke mu kwata po noku mu hepeka, notaye ke mu fala koosinagoga mu ka pangulwe, noku mu tulitha moondholongo. Otamu ka falwa kiipala yaakwaniilwa noyaapangeli omolwedhina lyandje.
13 Shoka otashi ke mu pa ompito mu ya lombwele kombinga yeitaalo lyeni.
14 Onkee ano kaleni mwa tokola toko momitima dheni, kaamu kale tamu ipula kutya otamu ka ipopila ngiini,
15 oshoka otandi ke mu pa iitya noondunge, opo aapataneki yeni ayehe kaaya vule oku mu kondjitha noku mu ludhikitha.
16 Kakele kaashono, otamu ka gwaalekwa* nokuli nokaavali yeni, kaamwanyoko, kaakwanezimo nokookuume keni, notaya ka dhipaga yamwe yomune,
17 notamu ka kala mu tondike kaantu ayehe omolwedhina lyandje;
18 ihe kapu na nokuli nando efufu limwe lyokomitse dheni tali ka kana.
19 Ngele omwa idhidhimike, otamu ka hupitha oomwenyo dheni.
20 “Ihe uuna mwa mono Jerusalem sha kondekwa ketangakwiita lya yunga ontanda, tseyeni kutya ehanagulo lyasho olya hedha popepi.
21 Onkee ano mboka ye li muJudea naya tameke okuya ontuku koondundu; mboka ye li musho naya ze mo, naamboka ye li komikunda inaya ya mo musho,
22 oshoka ethimbo lyasho lyokupangulwa* olya thika, opo ashihe shoka sha nyolwa shi gwanithwe.
23 Yayee, aamwali nosho wo aakiintu, mboka taya adhika ye li momategelelo pethimbo ndyoka! Oshoka moshilando otamu ka kala uudhigu uunene, naantu otaya ka adhika kegeelo.
24 Aantu otaya ka sa kegongamwele, notaya ka falwa muukwatwa kiigwana ayihe; na Jerusalem otashi ka lyatagulwa kiigwana,* sigo euthwathimbo lyiigwana lya pu ko.
25 “Shimwe ishewe, otaku ka monika omandhindhiliko ketango, komwedhi nokoonyothi, niigwana kombanda yevi otayi ka kala ya tila, sho kaayi shi kutya nayi ninge po shike, omolwepopomo lyefuta nosho wo okupindjala kwalyo.
26 Aantu otaya ka haluka, omolwuumbanda nomolwiinima, mbyoka tayi ka adha aantu kombanda yevi, oshoka iikwagulu otayi ka kakama.
27 Opo nduno otaya ka mona Omuna gwomuntu te ya miikogo e na oonkondo neadhimo enene.
28 Ihe uuna iinima mbika ya tameke okuningwa, thikameni mwa ukilila, mwa yelutha omitse dheni, molwaashoka ehupitho lyeni olya hedha popepi.”
29 Opo ihe Jesus okwe ya lombwele ethaneko ta ti: “Dhiladhileni komukwiyu nosho wo komiti adhihe dhilwe.
30 Uuna omafo gadho taga mbunyuka, ohamu kala mu shi iwetele nohamu kala mu shi kutya othinge oyi li popepi.
31 Sha faathana, nane wo uuna mu wete iinima mbika tayi ningwa, tseyeni kutya Uukwaniilwa waKalunga owu li popepi.
32 Oshili tandi mu lombwele, epipi ndika itali hulu po nando, sigo oosho iinima ayihe mbika ya gwanithwa.
33 Egulu nevi otayi hulu po, ihe oohapu dhandje kadhi na siku dhi hule po.
34 “Ihe itonateleni ne yene, opo mwaa pwile mokulya nokunwa sha pitilila, nokaamu gwililwe po kiimpwiyu yonkalamwenyo, opo esiku ndyoka kaali mu adhe ombaadhilila,
35 ngaashi omwigo tagu kwata oshinamwenyo; oshoka otali ka adha aantu ayehe kombanda yevi alihe.
36 Onkee ano kaleni mwa tonata nokugalikana mwa mana mo ethimbo alihe, opo mu vule oku ka hupa, sho iinima ayihe mbyoka tayi ka ningwa, nomu ka vule okuthikama koshipala shOmuna gwomuntu.”
37 Onkee ano Jesus okwa kala ta longo aantu motempeli omutenya, ihe kongulohi, okwa li ha ka lala komukunda gu li kOndundu yOoholivi;
38 naantu ayehe oya li haye ya ongula onene kotempeli ya pulakene kuye.
Omanyolo gopevi
^ Eln., “uuhaulapa uyali.”
^ Oshitya shOshigreka shoka sha longithwa movelise ndjika otashi vulu okuukithwa kegulu ndyoka hatu kala tu wete, nenge kegulu, moka Jehova naayengeli haya kala.
^ Nenge “otamu ka gandjwa.”
^ Nenge “esiku lyasho lyokugeelwa.”
^ Nenge “kaantu mboka kaaye shi Aajuda.”
