Omwedhi kehe ohatu kala twa tegelela okutala oopolohalama nuuvidio mboka opo wa piti kOpolohalama yotiivii JW. Ihe aamwatate oyendji muAfrika ihaya vulu okutala oopolohalama ndhoka kointaneta. Mbela omolwashike?

 Omolwaashoka iitopolwa oyindji muAfrika kayi na ointaneta nopomahala mpoka pu na ointaneta, olundji ohayi ende kashona nenge yi na ondilo. Pashiholelwa, omutonatelishikandjo gumwe moMadagascar okwa li ha tapa Opolohalama yotiivii JW yokomwedhi pokasitola kamwe mpoka pu na ointaneta. Okwa li ha futu iimaliwa yi thike poondola dhaNamibia 230 lwaampo. Oshimaliwa shoka oshi vule ondjambi ndjono yamwe haya mono koshiwike.

 Nonando opu na oonkalo oondhigu dha tya ngawo, aamwatate omamiliyona muAfrika ngashingeyi otaya vulu okunyanyukilwa okutala Opolohalama yotiivii JW itaaya longitha ointaneta. Oye shi ende ngiini?

 Okuza mo 2017 opwa li pwa ningwa omalongekidho, opo aamwatate yomenenevi Afrika mboka ya gama koSahara ya kale haya tala Opolohalama yotiivii JW okupitila mosatelite. Opolohalama oyi li momalaka 16 nohayi talwa oshali ethimbo kehe esiku alihe.

 Opo Oonzapo dhaJehova dhi shi pondole, ohadhi futu ositaasi yotiivii, opo opolohalama yi kale tayi ulikwa okuza kosatelite. Osatelite ndjoka ohayi longithwa miilongo 35 lwaampono mbyoka ya gama koSahara, moAfrika. Ohadhi futu iimaliwa yi thike poondola dhaNamibia 172 380 lwaampo komwedhi. Omathimbo gamwe ohaya gwedha ko komwaalu ngoka, opo opolohalama yi ulikwe kositaasi yi ili pethimbo mpoka tayi dhanwa. Shika ohashi pe aamwatate oyendji ompito ya vule okunyanyukilwa iigongi nenge oopolohalama dhi ikalekelwa, ngaashi omatalelopo giitayimbelewa.

 Aantu oyendji naamboka kaaye shi Oonzapo, ohaya tala opolohalama ndjika kotiivii momagumbo gawo. Ihe aamwatate yamwe kaye na iiniwe ya gwana, opo ya vule okulanda iikwaniipangitho mbyoka ya pumbiwa ya vule okutala opolohalama ndjoka kosatelite. Opo tu ya kwathele, mIinyanga yUukwaniilwa yi vulithe 3 670 omwa tulwa iikwaniipangitho, opo aamwatate naamwameme ya vule okukala haya tala Opolohalama yotiivii JW kosatelite. Iikwaniipangitho mbyoka nosho wo oku yi eta pOshinyanga shUukwaniilwa mpoka pu nale otiivii nenge eshina lyokuulika omathano (projector), ohashi pula iimaliwa yi thike lwopoondola dhaNamibia 1 014 lwaampo. Ngele kapu na sha otiivii nenge eshina lyokuulika omathano, ohashi vulu oku tu pula oondola dhaNamibia 7 680 lwaampo.

 Aamwatate naamwameme oya pandula noonkondo elongekidho ndika. Omukuluntugongalo gumwe ota ti: “Tse naanegumbo lyandje otwa fa owala aantu ye li mokati kombuga ya pewa omanna.” Omumwatate Odebode gwokoNigeria, ota ti: “Tse naanegumbo lyandje ohatu tala opolohalama lutatu moshiwike. Aamwandje ohaya kala aluhe ya tegelela nondjuulukwe oku yi tala. Omathimbo gamwe uuna tatu tala otiivii, ohaya pula nokuli tu lundulukile kositaasi yo-JW.” Omumwameme Rose, naye a za koNigeria, ota ti: “Ngashingeyi onda nyanyukwa sho handi tala Opolohalama yotiivii JW kosatelite, pehala lyokukala tandi tala aluhe oonkundana. Uuna tandi tala oonkundana, ohandi kala tandi ningilwa nayi kiinima mbyoka hayi ulikwa ko nohashi londeke ombinzi yandje. Ihe Opolohalama yotiivii JW, ohayi tungu nohayi ningitha ndje ndi kale ndi uvite ombili. Ondi yi hole lela noyi li omagano ga za kuJehova.”

 Omutonatelishikandjo gumwe gwokoMosambike okwa ti kutya mIinyanga yUukwaniilwa mbyoka yi li moshikandjo she, omwa tulwa iikwaniipangitho, opo aamwatate ya vule okutala opolohalama okuza kosatelite. Aamwatate ohaya thiki kuyele manga okugongala inaaku tameka, opo ya vule okutala Opolohalama yotiivii JW.

 Poshigongi shopaigwana shomo 2019 shoka sha li moJohannesburg, moSouth Afrika, ositaasi yosatelite oyo ya li ya longithwa, opo iipopiwa yimwepo, mwa kwatelwa mbyoka ya gandjwa koshilyo shOlutuwiki, yi pulakenwe nokiitopolwa yilwe omugoyi. Omumwatate Sphumelele gwokOshikondo shokwaandjaganeka iikwamawi nuuvidio koshitayimbelewa shaSouth Afrika, okwa ti: “Nale otwa li hatu andjaganeke iipopiwa okupitila kointaneta. Ihe shika ohashi pula ointaneta yi li nawa nokulanda oodata. Ositaasi yosatelite oyi na ombiliha nohayi longo nawa.”

 Omolwomayambidhidho geni gehalo ewanawa giilonga yomuuyuni awuhe, ngashingeyi aamwatate naamwameme moAfrika otaya vulu okutala Opolohalama yotiivii JW okuza kosatelite. Otwa pandula noonkondo omayambidhidho geni ngoka hamu gandja okupitila momikalo dhi ili nodhi ili ndhoka dhi li ko-donate.pr2711.com.