Oonzapo dhaJehova ohadhi gongala lwaali moshiwike. Ehala moka hadhi gongala dhi longele Kalunga, ohali ithanwa Oshinyanga shUukwaniilwa. Oshike hashi ningwa po, nuuwanawa wuni to ka mona ngele oho gongala?

•  Oshike hashi ningwa pOshinyanga shUukwaniilwa?

•  Omolwashike wa pumbwa okugongala nOonzapo dhaJehova?

•  Shoka oomakula haya ti

Oshinyanga shUukwaniilwa osho ehala mpoka aantu haya longwa unene kombinga yOmbiimbeli. Okugongala hoka haku ningilwa mo, otaku vulu oku ku kwathela:

• wu ilonge oshili kombinga yaKalunga.

• wu uve ko iiningwanima mbyoka tayi ningwa muuyuni.

• wu kale omuntu e na omaukwatya omawanawa.

•  wu mone ookuume aawanawa.

Owe shi tseya ngaa? Ehala mpoka Oonzapo dhaJehova hadhi gongalele ohali ithanwa: Oshinyanga shUukwaniilwa, oshoka Uukwaniilwa waKalunga owo unene hawu kundathanwa po. — Mateus 6:9, 10; 24:14; Lukas 4:43.

Uuyelele mboka hawu kundathanwa po, otawu vulu oku ku kwathela. Omakotampango gOmbiimbeli ngoka haga kundathanwa pokugongala kwOonzapo dhaJehova, otaga vulu oku ku kwathela wu ‘ilikolele owino.’ (Omayeletumbulo 4:5) Shoka osha hala okutya, Ombiimbeli otayi vulu oku ku kwathela, wu ninge omatokolo gopandunge monkalamwenyo. Otayi vulu wo oku ku kwathela wu mone omayamukulo gomapulo ga simanenena, ngaashi:

• Elalakano lyonkalamwenyo olyashike?

• Mbela Kalunga oye tu na okupa ombedhi sho tatu mono iihuna?

• Oshike hashi tu ningilwa ngele twa si?

Pokugongala kwomehuliloshiwike, ohapu kala pu na iipopiwa yi na iipalanyolo ngaashi:

• Omolwashike twa pumbwa okweetha Ombiimbeli yi tu wilike monkalamwenyo?

• Openi to vulu okumona ekwatho uuna wu li muudhigu?

• Mbela Uukwaniilwa waKalunga otawu ningi shike ngashingeyi?

Omukadhona gwedhina Brenda okwa ti: “Omunasikola omukwetu okwi ile pokugongala kwetu. Okwa li a kuutumba pamwe naantu yaandjetu nokwa landula pamwe natse momambo getu. Konima yokugongala okwa lombwele ndje kutya okwa li a panda omayamukulo ngoka aantu ya gandja miitopolwa mbyoka aapulakeni haya kutha ombinga. Okwa ti wo kutya kongeleka yawo, kaye na ko omambo ngaashi ngoka hatu longitha pokugongala kwetu.”

Owe shi tseya ngaa? MOshinyanga shUukwaniilwa ohamu yiwa oshali, naantu ihaya umbu ongalo.

Mboka ye li pokugongala otaya vulu oku ku tsa omukumo. Ombiimbeli otayi ti kutya Aakriste oya pumbwa okukala haya gongala pamwe, opo ya ‘kumagidhathane.’ (Aahebeli 10:24, 25) Okugongala pamwe naantu mboka ye hole Kalunga noye na ko nasha nayalwe, otaku vulu oku tu tsa omukumo, unene tuu sho muuyuni mbuka mu udha aantu yi ihole yo yene.

Elisa okwa ti: “Konima yokuuhala esiku alihe ndi ipyakidhila, ohandi kala nda yemata nonda vulwa. Ihe mboka handi tsakanene nayo pOshinyanga shUukwaniilwa, ohaya talaleke ndje aluhe. Shampa ndu uka kegumbo, ohandi kala nda nyanyukwa nondi ilongekidhila esiku lya landula ko.”

Owe shi tseya ngaa? Omagongalo gOonzapo dhaJehova muuyuni awuhe, oge vulithe po 120 000, nohadhi gongala momahala ge vulithe po 60 000. Omumvo kehe, ohapu tungwa konyala Iinyanga yUukwaniilwa yi li 1 500, omolwomwaalu gwaamboka haya gongala tagu indjipala. *